پرەزيدەنتتىڭ قاڭتار قاسىرەتىنەن كەيىن: «مەن سول كۇندەرى قولىمنان كەلگەننىڭ ءبارىن ىستەدىم. بۇل مەنىڭ پەرزەنتتىك ءارى پرەزيدەنتتىك پارىزىم ەدى» جانە «رەفورما جاساپ جاتىرمىز دەگەن اتاق ءۇشىن رەفورما جاساۋدىڭ قاجەتى جوق» دەگەن ەكى سوزىنەن-اق ونىڭ قازاق جۇرتى ءۇشىن وتتان دا, سۋدان دا تايىنبايتىن پاتريوت ءارى ىسكەر رەفورماتور ەكەنىن دالەلدەپ بەرگەندەي.
مەن دە تەلەديدارعا ءۇڭىلىپ وتىرىپ, جولداۋدان كەيىن سەمەي مەن جەزقازعاننىڭ كەيبىر جۇرتشىلىعىنىڭ جىلاعانىن كوردىم. كەزىندە وبلىس ورتالىعى مارتەبەسىنەن ايىرىلعان سەمەيدىڭ ءبىراز كىسىنىڭ وسكەمەنگە كوشىپ كەلۋى ارقىلى بۇل قالانى دا ءبىرشاما قازاقىلاندىرعانىنا قۋانعانبىز. الايدا تۋعان جەرگە عانا تۋىن تىككىسى كەلەتىن جانە اتا-بابالارىنىڭ وتاۋ كوتەرىپ, وت جاققان جەرىنە, ونىڭ ۇستىنە قازاقتىڭ ادەبيەتى عانا ەمەس, رۋحاني بولمىسىمىزدىڭ الىپتارىن بەرگەن سەمەي ولكەسىنىڭ قايتا جاڭارىپ, جاڭعىرۋ ءداۋىرىن باستاۋى ايتارلىقتاي قۋانىش ەدى. سول سياقتى كيەلى مەكەن ۇلىتاۋدىڭ اتاۋى وبلىسقا بەرىلىپ, جەزقازعان قالاسىنىڭ دا ەكىنشى ءومىرىن باستاۋى جۇرتشىلىقتىڭ كوپتەن كۇتكەن حابارى بولاتىن. ال الماتى وبلىسىنىڭ بولاشاق ورتالىعى قاپشاعاي قالاسىنا حالقىمىزدىڭ اياۋلى پەرزەنتى دىنمۇحامەد قوناەۆتىڭ ەسىمىن بەرۋ جونىندەگى ۇسىنىسىن بۇكىل ەلدىڭ قولدايتىنىنا سەنىمدىمىن. ءوز وتاۋلارىنىڭ شاڭىراعىن قايتا كوتەرىپ جاتقان ءۇش ولكە حالقىنىڭ قۋانىشتارىنا ورتاقپىن. تورعاي ولكەسىنىڭ دە قايتا تۇلەۋ ماسەلەسىنە جانە كەزىندە شەكارالىق ءبىراز اۋدانداردى ەكى-ەكىدەن قوسىپ تاستاعاندىقتان, ولار دا جاقسى كۇندەرگە بولاشاقتا جەتەر دەگەن وي كەلەدى.
پرەزيدەنت قاسىم-جومارت كەمەل ۇلىنىڭ ۇلىستىڭ ۇلى كۇنى قارساڭىندا «جاڭا قازاقستان: جاڭارۋ مەن جاڭعىرۋ جولى» اتتى حالقىنا جاساعان جولداۋىنىڭ ءار تارماعى شىنىندا دا ۇلكەن ۇمىتكە جەتەلەر جاڭالىققا, جاقسىلىققا تولى بولدى. كوكەيدە جۇرگەن كوپ ماسەلەنىڭ ءتۇيىنىن شەشۋدىڭ توتە جولىن كورسەتتى دەسە بولار.
بار مىندەتتى تەك پرەزيدەنتكە جۇكتەي بەرمەي, پارلامەنت پەن ۇكىمەتتىڭ جۇگىن دە اۋىرلاتىپ, ولاردىڭ ىسكەرلىكتەرىن ارتتىرۋ ماسەلەسى, بۇگىنگە دەيىن بەدەلىن جوعالتا باستاعان سايلاۋ پروتسەسىن جاڭاشا وتكىزۋ, دەپۋتاتتار مەن بيلىك وكىلدەرىنىڭ حالىق الدىنداعى جاۋاپكەرشىلىكتەرىن ارتتىرۋ, كونستيتۋتسيالىق سوت, ۇلتتىق قۇرىلتاي, جاڭا پارتيالاردى تىركەۋدەگى جەڭىلدىكتەر, ەڭ ءبىر جۇرتتى ريزا قىلعان پرەزيدەنتتەن باستاپ, اكىم-قارالاردىڭ تۋىس-تۋعاندارىن باسشىلىق جۇمىستارعا جولاتپاۋ جونىندەگى شەشىمدەرى ەدى. جاسىرارى جوق, مۇنىڭ ءبارى دە ءوز ۋاقىتىن كۇتىپ تۇرعان اياققا تۇسكەن تۇساۋداي تۇيتكىلدەر بولاتىن.
ەندىگى اڭگىمە جارقىن بولاشاق ءۇشىن بۇل مىندەتتەردى جۇزەگە اسىرۋعا ءبىر كىسىدەي جۇمىلۋ قاجەت. مەن ەرتەڭىمە كامىل سەنەمىن.
كادىربەك سەگىزباي ۇلى,
جازۋشى, قازاقستاننىڭ ەڭبەك سىڭىرگەن قايراتكەرى
