ءبىزدىڭ بۇگىنگى قوعام كۇردەلەنىپ كەتتى. بيلىك تە كوپتەگەن ماسەلەدە قوعامنىڭ مۇددەسىنەن شىعا المادى دەي الامىز. ءبىر جاعىنان, بۇعان قوعامنىڭ جاسارۋى دا اسەر ەتتى. كەيبىر ءورىستىلدى زەرتتەۋلەردى قاراعانىمىزبەن, قازاقتىلدى ورتاعا ارنالعان ۇلكەن زەرتتەۋلەردى كورىپ جۇرگەن جوقپىز. مىسالى, ءبىزدىڭ قوعام قانداي, ونىڭ باستى تۇلعاسى كىم, جۇرت كىمدى تىڭدايدى؟ نەگە سوڭعى كەزدە بولعان وقيعالارعا جول بەردىك دەگەن سان ساۋال ماسەلەگە جاۋاپ تابا الماي كەلەمىز.
دەگەنمەن كەيىنگى كەزدە جاقسى باستامالار شىعىپ جاتىر. ماسەلەن, اقساقالدار كەڭەسى قولعا الىندى. تاعى باسقا دا الاڭدار ۇسىنىلدى. بىراق سونىڭ ءبارى ءوزىمىزدى جۇباتۋ ءۇشىن جاساپ جاتقان جوبالار سەكىلدى. اقساقالدار كەڭەسىنىڭ ۇندەۋىن جاستار تىڭداپ, وعان قوعام نازار اۋدارا ما؟ جالپى, ەلىمىزدە جۇرت ۇلگى تۇتىپ, ءسوزىن تىڭدايتىن اقساقال بار ما؟ كەشەگىدەي ۇلكەن ءنوپىر كۇش شىققاندا ولار كىمدى تىڭدايدى, جالپى, تىڭداتا بىلەتىن قايراتكەر قالدى ما, قالمادى ما دەگەن ماسەلە دە الدىمىزدا تۇر.
سونداي-اق قازىرگى قازاق قوعامى جىكتەلىپ دامىپ كەلە جاتقان سەكىلدى. ءبىر جىگىمىز, ەكىنشى جىكتى تۋدىرىپ, قوعامنىڭ ءوزىن جىكتەردەن قۇرالعان قوعامعا اينالدىرىپ جىبەرگەندەي. داعدارىس كەزەڭىندە بۇل ءۇردىس ايقىن كورىنەدى. ەكىنشىدەن, قوعامدا ەكسترەميستىك-راديكاليستىك كوزقاراستاردىڭ باسىم بولۋى, وسىنىڭ كارتوگرافياسىنىڭ جوقتىعى ۇلكەن ماسەلە تۋدىرادى.
مەملەكەت باسشىسىنىڭ جولداۋىنان ۇلكەن ءۇمىت كۇتەمىز. بۇل جولداۋ ۇلتتىق جانە قوعامدىق كەلىسىمشارتتاردىڭ جيىنتىعى سەكىلدى. سونىڭ ىشىندە جاڭادان ءۇش وبلىستىڭ قۇرىلۋى مەن تاعى باسقا وزەكتى ماسەلەلەردىڭ كوتەرىلۋى, قازاقتىڭ ۇلتتىق كەلىسىمىن قاجەت ەتەدى. سونىڭ العىشارتى باستالىپ, سەنىم قادامدارى جاسالدى. قازىر ءبىز اركىم ءوز ورنىن بىلەتىن, وتكەن عاسىردىڭ 60-70-80 جىلدارداعى ۇلتتىق ىمىرانىڭ نۇسقاسىنا جەتە الماعان سياقتىمىز. كەشەگى توقسانىنشى جىلدارداعى قيىندىقتان, سونىڭ ارقاسىندا امان شىقتىق. بۇگىندە سونىڭ ەشبىر ءۇردىسى قالماي بارادى. بۇل دا ويلاناتىن شارۋا.
ۇلتتىق مۇددەدە نەگە كەلىپ تىرەلۋىمىز كەرەك, توقتايتىن جەرىمىز قايسى؟ نەگىزىنەن, ۇرەي مەن قورقىنىشتىڭ ءبارى ۇلتتىق ازشىلىق پسيحولوگياسىنان تۋىندايدى. سوڭعى وتكەن ۇلتتىق ساناقتا قازاقتىڭ سانى 71 پايىزعا جەتسە دە, ءالى دە ءتىل سەكىلدى ماسەلەلەرگە قاتىستى ۇرەيىمىز 60-70-جىلدارداعى الماتىدا اۆتوبۋستا «نەگە قازاقشا سويلەدىڭ؟» دەپ جۇرگەن ادامنىڭ جانايقايىنا كەلەدى.
كەشەگى قاڭتار وقيعاسى ەلدەگى تۇراقتىلىق پەن تىنىشتىقتىڭ قۇنىن كورسەتتى. وسى قۇندىلىقتىڭ قادىرىن ءبىلۋىمىز قاجەت. سونىمەن بىرگە ۇلتتىق ينفراقۇرىلىمدى دامىتۋعا قانداي ۇيىم كەرەك, قوسىمشا زەرتتەۋ ورتالىقتارى قاجەت. وسى ماسەلەلەردى قاراستىرعان ءجون. سوعان بايلانىستى ءبارىمىز بىرىگىپ جۇمىس ىستەۋىمىز قاجەت. بەرىك ابدىعالي ۇلى «قازاق ميسسياسى» دەگەن ءبىر الماناح شىعاردى. وسىنداي ءتاسىلدى ديالوگ الاڭى اياسىندا جاڭا فورماتتا قولعا الىپ, ايتۋلى عالىمدار مەن قالامگەرلەردىڭ, قوعام قايراتكەرلەرىنىڭ جاڭاشىل يدەولوگياعا ساي جازىلعان دۇنيەلەرىن جاريالاپ وتىرساق دەگەن ۇسىنىسىم بار.
ايدوس سارىم,
پارلامەنت ءماجىلىسىنىڭ دەپۋتاتى
