ورتالىق كوممۋنيكاتسيالار قىزمەتى الاڭىندا وتكەن بريفينگتە ە.قيلىمجانوۆ قازىرگى تاڭدا جەدەل تەرگەۋ توپتارىنىڭ وندىرىسىندە 3 666 سوتقا دەيىنگى تەرگەپ-تەكسەرۋ ءىسى بار ەكەنىن مالىمدەدى. ونىڭ ىشىندە تەرروريزم اكتىلەرى مەن جاپپاي تارتىپسىزدىكتەر تۋرالى ىستەردەن بولەك, توناۋ, ۇرلىق, قارۋ ۇرلاۋ, قۇقىق قورعاۋ ورگاندارى قىزمەتكەرلەرىنە كۇش قولدانۋ فاكتىلەرى دە تەرگەلۋدە. باس پروكۋراتۋرا وكىلىنىڭ مالىمدەۋىنشە, 162 ايىپتالۋشىعا قاتىستى 101 قىلمىستىق ءىس سوتقا جولدانسا, 62 ادام سوتتالعان. سوتتى بولعانداردىڭ ىشىندە الماتى قالاسىنداعى «الپامىس» اڭشىلىق دۇكەنىنەن قارۋلاردى ۇرلاعانى ءۇشىن كىنالى دەپ تانىلعان ەكى ازامات تا بار. المالى اۋداندىق سوتىنىڭ ۇكىمىمەن ب.ونتاي پەن ءو.جەڭىسحان 5 جىلعا باس بوستاندىقتارىنان ايىرىلدى. «تەرگەۋ بارىسىندا 5 قاڭتاردا اقتوبە قالاسىندا «ۆاز 21014» ماركىلى كولىگىندە وتىرعان جىگىتتىڭ وبلىس اكىمدىگىنىڭ الدىندا تۇرعان پوليتسەيلەردىڭ قورشاۋىن ۇلكەن جىلدامدىقپەن كەلىپ سوققانى انىقتالدى. بۇل كورىنىس ۇيالى تەلەفونعا جازىلىپ قالعان. اۋىر سوققىدان 4 پوليتسيا قىزمەتكەرى دەنە جاراقاتتارىمەن اۋرۋحاناعا جاتقىزىلدى. كەيىننەن ءتارتىپ ساقشىلارىنىڭ ومىرىنە قاۋىپ توندىرگەن كۇدىكتى سوت سانكتسياسىمەن قاماۋعا الىندى. سونداي-اق الماتىدا قالا اكىمدىگىنىڭ الدىندا پوليتسيا قىزمەتكەرلەرىن اياۋسىز سوققىنىڭ استىنا العان ەكى كۇدىكتى دە قاماۋدا وتىر», دەيدى ە.قيلىمجانوۆ.
ەستەرىڭىزدە بولسا, قاڭتار وقيعاسى كەزىندە 4 مىڭنان استام ادام جاراقاتتانعان بولاتىن. ونىڭ 2 402-ءسى پوليتسيا قىزمەتكەرى بولسا, 990-ى اسكەري قىزمەتشى.
باس پروكۋراتۋرا وكىلى قاڭتار وقيعاسىنا قاتىستى باق پەن الەۋمەتتىك جەلىلەردەگى جاريالانىمدارعا مونيتورينگ جۇرگىزۋ, قاماۋدا وتىرعان ادامداردى ۇستاۋ جاعدايلارىنا تەكسەرۋ ءىس-شارالارىنىڭ جالعاساتىنىن دا حابارلادى. قازىرگى ۋاقىتتا تەرگەۋ يزولياتورلارىندا 751 ادام وتىر. ال 199 كۇدىكتىنىڭ بۇلتارتپاۋ شاراسى ەشقايدا كەتپەۋ تۋرالى قولحاتقا, كەپىلگە, ۇيقاماققا الۋعا جانە جەكە كەپىلگەرلىككە اۋىستىرىلعان. سونىمەن قاتار ادام قۇقىقتارى جونىندەگى ۋاكىل, ۇيلەستىرۋ كەڭەسىنىڭ مۇشەلەرى جانە ۇلتتىق الدىن الۋ تەتىگىنىڭ قاتىسۋشىلارى تەرگەۋ, ۋاقىتشا ۇستاۋ يزولياتورلارى مەن ارنايى قابىلداۋ ورىندارىندا 118 كەزدەسۋگە قاتىسقان.
قاڭتار وقيعالارىن تەرگەۋدىڭ الدىن الا ناتيجەلەرى تۋرالى حابارلاعان سانجار ءادىلوۆ تەرگەۋ وندىرىسىندەگى 2997 قىلمىستىق ءىس بويىنشا سوت سانكتسياسىمەن 194 ادام ۇستالعانىن ايتتى. ولاردىڭ 152-ءسى جاپپاي تارتىپسىزدىك بارىسىندا ۇرلىق جاساعانى, 22-ءسى قارۋدى زاڭسىز ساقتاعانى جانە 24 ادام قارۋدى ۇرلاعانى ءۇشىن قاماققا الىنعان. تەرگەۋشىلەر 174 كۇدىكتىگە قاتىستى قىلمىستىق ىستەردى ايىپتاۋ اكتىسىمەن اياقتادى. «پوليتسيا قىزمەتكەرلەرى جاپپاي تارتىپسىزدىكتەر كەزىندە ۇرلىق جاساپ, توناۋعا بارعانداردى انىقتاۋ جۇمىستارىن ءالى دە جالعاستىرىپ كەلەدى. تەك وتكەن اپتا ىشىندە م ۇلىكتى جانە قارۋدى ۇرلاۋ فاكتىلەرى بويىنشا 7 كۇدىكتى ۇستالدى. ولاردىڭ اراسىندا الماتىدا پوليتسيا قىزمەتكەرلەرىنىڭ ارنايى قۇرالدارىن قولدى قىلىپ, 4 دۇكەندى توناپ كەتكەن 5 ادامنان قۇرىلعان توپ بار», دەپ مالىمدەدى س.ءادىلوۆ.
ءىىم-ءنىڭ دەرەكتەرىنە قاراعاندا, قاڭتار وقيعاسى كەزىندە 1502 بيزنەس وبەكتىسىنە شابۋىل جاسالعان. ونىڭ ىشىندە 1360 ساۋدا ورنى مەن دۇكەن, 36 بانك ءوفيسى مەن كوشەدەگى بانكومات, 31 قوعامدىق تاماقتانۋ ورنى, 26 لومبارد, 21 جانارماي ستانساسى, 6 بازار, 4 ۆاليۋتا ايىرباستاۋ پۋنكتى, 3 ءدارىحانا, 1 اۆتوسالون مەن كاسىپكەرلىكتىڭ باسقا دا نىساندارى بار. پوليتسيا ورگاندارى ەڭ الدىمەن زارداپ شەككەن ازاماتتار مەن بيزنەس وكىلدەرىنە جاردەمدەسىپ, كەلتىرىلگەن زالالدىڭ ورنىن تولتىرۋ بويىنشا شارالار قابىلداپ جاتقانىن ايتقان س.ءادىلوۆ پوليتسيا قىزمەتكەرلەرىنىڭ قۇنى 288 ملن تەڭگەدەن اساتىن ۇرلانعان م ۇلىكتى انىقتاعانىن مالىمدەدى. سونداي-اق ۇرلانعان مىڭنان استام قارۋ تاركىلەنىپ, 21759 وق-ءدارى تابىلعان.
