قازاقستان – ەو-نىڭ ماڭىزدى ارىپتەسى

كەشە ەلىمىزدىڭ سىرتقى ىستەر ءمينيسترى ەرلان ىدىرىسوۆ ەۋروپارلامەنت دەلەگاتتارىمەن كەزدەستى. سىرتقى ساياسات ۆەدومستۆوسىنىڭ باسشىسى مەن ەو پارلامەنتتىك دەلەگاتسياسى اراسىندا وتكەن كەزدەسۋدەن شىعىپ, جۋرناليستەرمەن جۇزدەسكەن دەپۋتات ەليزابەت يەگگلە قازاقستان ەو-نىڭ ورتالىق ازياداعى ماڭىزدى ارىپتەسى سانالاتىنىن جەتكىزۋمەن قاتار, قازاقستان ءۇشىن ەو-نىڭ دا ساۋدا جانە ينۆەستيتسيا جونىندەگى نەگىزگى ارىپتەس ەل ەكەنىن العا تارتتى. ءبىز ەكى اراداعى قارىم-قاتىناستاردىڭ تەرەڭدەۋىن جانە نىعايا ءتۇسۋىن قالايمىز. وسى رەتتە 2013 جىلى قازاقستان پرەزيدەنتى نۇرسۇلتان نازارباەۆ پەن ەۋروكوميسسيا پرەزيدەنتى جوزە مانۋەل بارروزۋ ارىپتەستىكتى ودان ءارى تەرەڭدەتە ءتۇسۋ جايىندا كەلىسسوزدەر جۇرگىزۋگە كەلىسكەن بولاتىن. ول 1999 جىلى قول قويىلعان ارىپتەستىك پەن ىنتىماقتاستىق تۋرالى كەلىسىمدى الماستىرۋى ءتيىس. ءبىز ءۇشىن ارىپتەستىك پەن ىنتىماقتاستىق جونىندەگى جاڭا كەلىسىم بويىنشا كەلىسسوزدەردىڭ العا جىلجۋى ەلدە اشىق دەموكراتيالىق قوعام ورناتۋداعى ساياسي رەفورمالاردىڭ جۇرگىزىلۋىنە, وپپوزيتسيا مەن ازاماتتىق قوعامنىڭ ءومىر سۇرۋىنە بايلانىستى, دەگەن دەپۋتات ءارى قارايعى ويىن بىلاي دەپ جالعادى: «قازاقستاننىڭ تۇراقتىلىعى مەن ءارى قارايعى دامۋى ءۇشىن مىقتى ينستيتۋتتاردىڭ قۇرىلۋى, زاڭ ۇستەمدىگى بيلىك جۇرگىزىپ, ازاماتتار قۇقىقتارىنىڭ ساقتالۋى, مىقتى مەملەكەتتىك باسقارۋ جۇيەسىنىڭ حالىقارالىق ستاندارتتارعا ساي ءومىر ءسۇرۋى ماڭىزدى. مىنە, وسىنداي ماڭىزدى ماسەلەلەر توڭىرەگىندە اڭگىمە ءوربىتۋ ماقساتىندا ءبىز قازاقستاندىق ارىپتەستەرىمىزبەن كەزدەستىك». وسىلاي دەگەن ەليزابەت يەگگلە ءسوزىنىڭ سوڭىندا ەو-نىڭ قازاقستانداعى ازاماتتىق قوعام دامىتۋداعى جۇمىستاردىڭ جۇرگىزىلۋىن جانە بيلىك پەن ازاماتتىق قوعام اراسىنداعى ۇنقاتىسۋدىڭ جۇزەگە اسىرىلۋىن قولدايتىندىقتارىن جەتكىزدى. انار تولەۋحانقىزى, «ەگەمەن قازاقستان».