«قازىرگى كەزەڭدەگى ازاماتتىق جوعارى وقۋ ورىندارىنداعى اسكەري دايىندىق» دەپ اتالاتىن حالىقارالىق جيىنعا ۋنيۆەرسيتەت رەكتورى ەرلان سىدىقوۆ, قورعانىس ءمينيسترىنىڭ ورىنباسارى, گەنەرال-مايور مۇحامەدجان تالاسوۆ, زاپاستاعى گەنەرال-لەيتەنانت, ۇلتتىق قورعانىس ۋنيۆەرسيتەتى باس شتابى اكادەمياسى فاكۋلتەتىنىڭ باسشىسى اباي تاسبولاتوۆ, «زاستاۆا تارلاندارى» قوعامدىق بىرلەستىگىنىڭ توراعاسى, زاپاستاعى گەنەرال-مايور تۇرسىن ۋاجانوۆ, «قر قورعانىس مينيسترلىگى اسكەري-تەحنيكالىق مەكتەپ» رمكم باس ديرەكتورى, زاپاستاعى گەنەرال-لەيتەنانت بولات داربەكوۆ, قورعانىس مينيسترلىگى اسكەري ءبىلىم جانە عىلىم دەپارتامەنتىنىڭ باسشىسى, پولكوۆنيك تالعات قاليشەۆ باستاعان ءبىر توپ اسكەريلەر جانە وقىتۋشى قۇرام مەن ستۋدەنتتەر قاتىستى. سونداي-اق كونفەرەنتسيادا رەسەي جانە بەلارۋس ەلدەرىنەن ونلاين رەجىمدە قوسىلعان اسكەري ساراپشىلار ءسوز الىپ, اسكەري كافەدرالاردىڭ زاپاستاعى وفيتسەرلەر تاپشىلىعىن تولتىرۋداعى ءرولىن اتاپ ءوتتى. عىلىمي-تاجىريبەلىك كونفەرەنتسيانىڭ باستى ماقساتى – اسكەري دايىندىقتى دامىتۋعا بايلانىستى پەداگوگيكالىق ماسەلەلەردى اشىق تالقىعا سالۋ, اسكەري كافەدرالاردا قاتارداعى جاۋىنگەرلەردى دايىنداۋ باعدارلاماسىن ءتۇزۋ, وقۋ-ادىستەمەلىك جۇمىسىن ۇيىمداستىرۋ, ستۋدەنت جاستاردى اسكەري عىلىمعا تارتۋ, اسكەري ماماندىقتاردى سالالاندىرۋ, پايدالى ىقپالداستىق, ناقتى ۇسىنىستار دايىنداۋ. باسقوسۋ بارىسىندا وسى سالاداعى كاسىبي ماماندار جوو-داعى اسكەري دايىندىقتى جەتىلدىرۋ ماسەلەلەرىنە قاتىستى پىكىرلەرىن ورتاعا سالدى.
اسكەري كافەدرانىڭ 20 جىلدىعىنا ارنالعان عىلىمي كونفەرەنتسيانىڭ ماڭىزدىلىعىن اتاپ وتكەن ە.سىدىقوۆ بۇل باسقوسۋدىڭ جاڭا قازاقستاننىڭ دامۋىنا وزىندىك اسەرى بولارىن دا العا تارتتى. «بۇل رەتتە كەشەگى قاڭتار قاسىرەتىن دە ەستەن شىعارماۋىمىز قاجەت. وتانشىلدىق پەن جاۋاپكەرشىلىكتىڭ بىرلىگى ەل تۇتاستىعىنا باستايدى. سوڭعى كەزدە قوعامدا «جوو-دا اسكەري كافەدرا قاجەت پە دەگەن؟» سۇراق ءجيى قويىلىپ ءجۇر. مۇنداي سۇراقتارعا تۇشىمدى جاۋاپ بەرۋ ءۇشىن عىلىمي تۇرعىدان تالداۋ جاساپ, تاجىريبەدەن تەكسەرىلگەن ۇسىنىستاردى دايىنداۋىمىز قاجەت», دەگەن ۋنيۆەرسيتەت باسشىسى ەلىمىزدىڭ قاۋىپسىزدىگى, ونىڭ اسكەري الەۋەتىنە قاتىستى اسىعىس شەشىم قابىلداۋعا بولمايتىنىن دا ەسكە سالىپ ءوتتى.
ەۇۋ اسكەري كافەدراسىنىڭ باسشىسى, زاپاستاعى گەنەرال-مايور ەدىل ورازوۆ تاۋەلسىز قازاقستاننىڭ قارۋلى كۇشتەرىن قۇرۋدىڭ ەڭ قيىن كەزەڭىندە اسكەري كافەدرالاردىڭ قاجەتتىلىگى تۋرالى ءتۇرلى پىكىرلەرگە قاراماستان ازاماتتىق جوعارى وقۋ ورىندارى جانىنداعى اسكەري كافەدرالاردى ساقتاپ قالا العانىن اتاپ ءوتتى. «بۇگىندە اسكەري كافەدرالار جانىنداعى زاپاستاعى وفيتسەرلەر مەن سەرجانتتار اسكەري دايارلىعىن ءىس جۇزىندە دالەلدەپ بەردى. بۇل قۇرام مەملەكەتتىڭ جۇمىلدىرۋ الەۋەتىن قالىپتاستىرۋدىڭ ماڭىزدى كوزى بولىپ سانالادى. ەكونوميكالىق تۇرعىدان العاندا دا بۇل ەڭ قولايلى جول», دەدى گەنەرال-مايور.
كونفەرەنتسياعا قاتىسۋشىلار ءىس-شارا بارىسىندا ازاماتتىق جوعارى وقۋ ورىندارىنىڭ ستۋدەنتتەرىنە اسكەري دايىندىق پاندەرىن وقىتۋ ادىستەمەسى جانە ازاماتتىق جوعارى وقۋ ورىندارىندا اسكەري دايارلىقتى ۇيىمداستىرۋدىڭ زاماناۋي ۇردىستەرى مەن ەرەكشەلىكتەرى تۋرالى پىكىر الماستى.
