سۋرەتتى تۇسىرگەن ەرلان ومار, «ەQ»
«قاسىرەتتى قاڭتار» قازاقستان تاريحىن جاڭا بەتبۇرىسقا الىپ كەلدى. ءبىز تاۋەلسىز ەلىمىزدىڭ تاعدىرىن ءسوز ەتكەندە قاڭتار وقيعالارىنا دەيىن جانە كەيىن دەپ ساراپتايتىن بولدىق. باسىمىزدان وتكەرگەن قايعىلى قاڭتار وقيعالارى بىزگە ۇلكەن ساباق بولعانى دا انىق. «امانات» – وسى وقيعالارعا بايلانىستى نەگىزسىز قۋدالانعان ازاماتتاردىڭ قۇقىقتارى مەن بوستاندىقتارىن قورعاۋ ءۇشىن قۇرىلعان كوميسسيا. «اماناتتىڭ» قۇرامىندا سەگىز ادام بار. ونىڭ ەكەۋى كاسىبي زاڭگەر, كوميسسيا توراعاسى ابزال قۇسپان مەن ءمادي مىرزاعاراەۆ, سونداي-اق ۇلتتىق كەڭەس مۇشەسى ۋايس ەرسايىن ۇلى بار.
قاڭتار وقيعالارىن تەرگەۋ كەزىندە جازىقسىز جاپا شەگىپ, قۇقىقتىق كومەككە ءزارۋ بولعاندارعا قولدارىنان كەلگەنىن ايانىپ قالماعان اماناتتىقتارعا قاراپايىم ازاماتتاردىڭ ايتار العىسى كوپ. سولاردىڭ ءبىرى – الماتى قالاسىنىڭ تۇرعىنى جاسۇلان امانگەلدينوۆ. قاندى قاڭتار كەزىندە ءبىر كوزىنەن ايىرىلىپ, ءبىر قۇلاعى ەستىمەي قالعان, كەيىننەن تەرگەۋ يزولياتورىندا ازاپ كورگەن ازامات: «امانات» ۇيىمىنا, سونىڭ ىشىندە ابزال قۇسپان باستاعان اعالارىمىزعا ايتار العىسىم شەكسىز. ۇيىمە, وتباسىما امان-ەسەن ورالۋىما سەبەپ بولعان اعالارىمنىڭ جاساپ جاتقان بار جاقسىلىعى اللادان قايتسىن. باسىما وسىنداي قيىن ءىس تۇسكەندە جانىما مەدەۋ بولىپ, ەڭسەمدى كوتەردى. سىنىپ كەتپەۋىمە دە بىردەن-ءبىر سەبەپشى بولعان – سولار», دەيدى. وتىز جاستاعى جاسۇلاننىڭ تەرگەۋ يزولياتورىندا كورگەن قورلىعى مەن ازابى بۇكىل قوعامدى ءدۇر سىلكىندىرگەن بولاتىن. اۋرۋحانا توسەگىندە جاتقان جەرىنەن سۇيرەپ اكەتىپ, ويلارىنا كەلگەنىن ىستەگەن جاندايشاپتاردىڭ قورلىعىنان الىپ شىققان ادۆوكات ابزال قۇسپانعا رياسىز راحمەتىن ايتقان جىگىتتىڭ تاعدىرى ەشكىمدى بەيجاي قالدىرماسى انىق. ال باۋىرى جاندوستىڭ تاعدىرى ءۇشىن شىر-پىر بولعان ەلدوس قارسىباەۆ: «باۋىرىمنىڭ تەرگەۋ اباقتىسىنان بوساپ شىعۋىنا «امانات» تاۋەلسىز كوميسسياسى مۇشەلەرىنىڭ كوپ كومەگى ءتيدى. العىس ايتۋ كۇنى قاڭتار وقيعاسى كەزىندە نەگىزسىز قاماۋعا الىنعان ءار قازاقتىڭ تاعدىرىنا اراشا تۇسكەن ابزال قۇسپان, ەركىن راقىشەۆ سەكىلدى ازاماتتارعا شىن جۇرەكتەن العىس ايتامىز. ول كىسىلەردىڭ ارقالاعان اماناتى اۋىر. سوندىقتان دا قيىن دا جاۋاپتى ىستەرىنە تەك ابىروي تىلەيمىن. ەلىمىزدىڭ وسىنداي ازاماتتارى امان بولسىن!», دەگەن جۇرەكجاردى تىلەگىن ءبىلدىردى.
العىس – ادامنىڭ جۇرەگىنەن شىعاتىن شىنايى, تازا ءىلتيپات. ونى وتىرىكپەن, جاعىمپازدىقپەن جىلتىراتىپ تاپسىرىسپەن جاساپ شىعارا المايسىڭ. ال كەشەگىدەي ەل باسىنا, ەر باسىنا كۇن تۋعان سىن ساتتە ەڭ ءبىرىنشى ادامدىعى مەن ازاماتتىعىنان اينىماعان اماناتتىقتارداي ادۆوكاتتاردىڭ العىسقا بولەنۋى ەرىكسىز قۋانتادى. ەستەرىڭىزدە بولسا, قاڭتار وقيعالارىنا بايلانىستى ەلىمىز بويىنشا 800-گە جۋىق ادام قاماۋعا الىنعان ەدى. اماناتتىقتاردىڭ ارالاسۋىمەن ولاردىڭ 200-دەن استامى بوستاندىققا شىقسا, ونىڭ ىشىندە 2 ايەل جانە 12 كامەلەتتىك جاسقا تولماعان جەتكىنشەك بار.
