استانادا «بارىس» ءبىر جەڭىلىستىڭ ەسەسىن قايتاردى

بەيسەنبى كۇنى تۇندە استانادا جەرگىلىكتى «بارىس» ۋفانىڭ «سالاۆات يۋلاەۆ» كومانداسىن ۇتىپ, سەريانىڭ جالپى ەسەبىن 2:3-كە جەتكىزدى. بۇل تۋرالى ras.kz حابارلادى. «استانالىقتار گاگارين كۋبوگى ەكىنشى راۋندىنىڭ بەسىنشى ماتچىندا ۋفالىقتاردان باسىم ءتۇستى. كەزدەسۋ 2:1 (1:1, 1:0, 0:0) ەسەبىمەن اياقتالدى», - دەلىنگەن حابارلامادا. ويىنداعى ەسەپتى 7-مينۋتتا «بارىستىڭ» شابۋىلشىسى كونستانتين رۋدەنكو اشتى. الايدا, قوناقتار 8 مينۋتتان كەيىن تارازى باسىن تەڭەستىرە ءبىلدى. شايبانى يۆان ۆيشنەۆسكي سالدى», - دەلىنگەن حابارلامادا. «بارىس» 37-مينۋتتا جويقىن شابۋىلعا شىعىپ تاعى ءبىر شايبا سوعۋعا قول جەتكىزدى. ونى داستين بويد ءتۇسىردى. كەيىن بولعانداي, بۇل وسى ويىنداعى گول بولدى. ءسويتىپ, كەزدەسۋدە 2:1 ەسەبىمەن جەڭىسكە جەتكەن «بارىس» جالپى ەسەپتىڭ 2:3 بولۋىنا قول جەتكىزدى. سەرياداعى التىنشى ماتچ 29 ناۋرىز كۇنى ۋفادا وتەدى. وسى ويىندا الاڭ يەلەرى جەڭىسكە جەتسە, ەكى كوماندا اراسىنداعى تەكەتىرەس تە اياقتالادى. دامير قوجامقۇل. دەرەككوز: ras.kz. فوتو: vesti.kz.