سوڭعى ءبىر ايدا بۇكىل قوعام رۋحاني كۇيزەلىستى باستان كەشىردى. باستىسى, ەل تاۋەلسىزدىگى مەن تۇراقتىلىعى ساقتالدى. ونىڭ قۇنى قانداي بولعانىن ءبارىمىز بىلەمىز. مەملەكەت باسشىسى دا ادام, سوندىقتان ونىڭ قاڭتار زارىن جانىمەن, جۇرەگىمەن سەزگەنى انىق. بىراق بىلايعى جۇرت ەموتسياعا بەرىلە السا, ەل باسقارۋشىسىندا مۇنداي مۇمكىندىك جوق. سوندىقتان الاڭعا اقكوڭىلمەن شىققان اڭقاۋ ەلدى پايدالانىپ, ارام پيعىلىن ىسكە اسىرماق بولعانداردى تاۋىپ, جازاسىن بەرۋ – پارىز. «شاش پەن باستى» شاتاستىراتىندار دا جازالانادى.
قازاقستان پرەزيدەنتىنە قوعامىمىزدا قالدىرىلعان «مۇرا» وتە اۋىر. قازىرگى ۋاقىت – بيلىككە سەنىم كرەديتى تاۋسىلعان كەزەڭ. باي مەن كەدەي اراسىنداعى بايلانىس قاسقىر مەن قوي «دوستىعىنداي» بولعان ۋاقىت. جەمقورلىق, جاعىمپازدىق, وسەك, وتىرىك – قوعامنىڭ ءىرىڭى شىققان دەرتىنە اينالعان زامان. ءبىزدىڭ عانا ەمەس, بۇكىل الەم جۇرتشىلىعىنىڭ ساياسي, ەكونوميكالىق, پاندەميالىق قىسىمنان جۇيكەسى ماسانىڭ دا ىزىڭىن كوتەرە الماي تۇرعاندا, بورىك استىنان بولتىرىك شاۋىپ, ەلدىڭ ەسىن شىعارعاندا ەل باسقارۋ – ۇلكەن جاۋاپكەرشىلىك. بۇل جۇكتى تەك ءبىر ادام الىپ جۇرە الاتىنىنا كەشەگى سۇحبات تاعى ءبىر دالەل بولدى.
مەملەكەتتىك ءتىل قازاقستاندا ۇلتارالىق ءتىل بولادى. تەك قازاق قازاقپەن ەمەس, بارشا قازاقستاندىقتار اراسىنداعى قاتىناس تىلىنە اينالادى. كۇنى كەشە ءوزىم كورىپ, كۋا بولعان بەس ميلليون عانا حالقى بار نورۆەگيادا قانشاما ۇلت وكىلى تۇرعانىمەن جەرگىلىكتى ءتىلدى بىلمەگەن جانعا نان تابۋ قيىن. تالاپ پەن قاجەتتىلىك جوعالۋدىڭ شاق الدىندا تۇرعان ءتىلدى وسىلايشا قايتا دامىتتى. مۇنداي جەتىستىكتىڭ بىزدە دە بولاتىنىنا سۇحباتتا ايتىلعان اڭگىمە سەنىم ۇيالاتتى.
روبيندرانات تاگوردىڭ «جاراتۋشى الدىندا جاماندىق جاساعان جانە ودان جاپا شەككەن ادام بىردەي جاۋاپتى» دەگەن ءسوزى بار. ياعني قازاقستاننىڭ جاڭا تاريحىندا بولعان جانە بولاتىن دۇنيەلەرگە ءبارىمىز بىردەي جاۋاپتىمىز.
مەملەكەت باسشىسى, ءوزىمىز قىزىعا قارايتىن, كەيبىرەۋلەر چەمودانىن الىپ تۇرا قاشقان وركەنيەتتى, دامىعان مەملەكەتتەر قاتارىنا ەلىمىزدىڭ دە قوسىلۋىنا ءار قازاقستاندىق بەلسەنە ارالاسۋى قاجەتتىگىنە ەكپىن ءتۇسىردى. ول زاڭ بارىمىزگە بىردەي جانە بۇكىل حالىق تەك زاڭعا باعىنۋى كەرەك. ول – ءبىلىم مەن ەڭبەك. ول – ۇرلانعان قاراجاتتىڭ قازاقستانعا قايتىپ, ۇلان-عايىر ەلىمىزدىڭ وركەندەۋىنە جۇمسالۋى. قازاقستاننىڭ دا وركەنيەتتى, باقۋاتتى, باقىتتى ەلگە اينالۋى ءۇشىن ارقايسىمىزدىڭ بويىمىزدى بيلەگەن ۇرەي مەن بويكۇيەزدىكتەن تازارتىپ, ادامي قاسيەتتەرىمىزدى – باتىلدىق, ىزگىلىك, ادالدىق, ادامگەرشىلىك, ۇلتجاندىلىق, ەڭبەكقورلىعىمىزدى كۇشەيتۋىمىز كەرەك. حالىق ساناسى وزگەرسە, بيلىك تە باسقا بولارى انىق.
حالىقتىڭ ساناسىن وزگەرتەتىن نەگىزگى كۇش – بۇقارالىق اقپارات قۇرالدارى. باق حالىقتىڭ باعىن اشۋ, «جاڭا ياكي ادىلەتتى قازاقستان» جاساۋ جولىندا قىزمەت ەتۋ كەرەك. جاينا سلامبەكتىڭ جاسقانباي جۇرت كوكەيىندەگى وتكىر سۇراقتاردى قويعانى, مەملەكەت باسشىسىنىڭ ءار سۇراققا مايموڭكەلەمەي ناقتى جاۋاپ بەرۋى سول ءوزىمىز كۇتكەن وزگەرىستەردىڭ باستالعانىنىڭ ايعاعى. ال ءسىز دايىنسىز با؟ وسى سۇراقتى ارقايسىمىز وزىمىزگە قويۋىمىز كەرەك.
بيبىگۇل جەكسەنباي,
باس رەداكتورلار كلۋبىنىڭ پرەزيدەنتى
