باستى نازار «قاسىرەتتى قاڭتار» وقيعاسىنا اۋدارىلدى. سونداي-اق ەلىمىزدە ساياسي رەفورمالار قاشان جانە قانداي باعىتتا بولاتىنى جايلى ايتىلدى. قازاقستان قوعامىنىڭ قاجەتتىلىكتەرىنىڭ ءبىرى وسى cاياسي رەفورمالاردى ىسكە اسىرۋ ەكەنى جاسىرىن ەمەس. ويتكەنى كەز كەلگەن قوعامنىڭ كوڭىل كۇيىنىڭ قانداي بولاتىنى ساياسي ينستيتۋتتار قىزمەتىنە تىكەلەي بايلانىستى.
ەلىمىزدەگى ساياسي ورگانداردىڭ جۇمىسىنا ءبىراۋىزدان «ناشار» دەگەن باعا بەرۋگە بولماس. سەبەبى مەملەكەتتىك اپپارات جۇمىس ىستەپ جاتىر, سوڭعى جىلدارى بىرقاتار ساياسي رەفورما جۇزەگە استى. اتاپ ايتار بولساق, اۋىل اكىمدەرىنىڭ سايلاۋى, ساياسي پارتيالاردىڭ ماجىلىسكە ءوتۋ شەگىن 7-دەن 5 پايىزعا دەيىن تومەندەتۋ, ساياسي بيۋللەتەندەرگە «بارىنە قارسىمىن» دەگەن جازۋدى ەنگىزۋ, ايەلدەر مەن جاستارعا مىندەتتى تۇردە 30 پايىزدىق كۆوتانى سايلاۋ تىزىمدەرىندە بەرۋ قامتىلعان «ساياسي پارتيالار تۋرالى», «سايلاۋ تۋرالى», «پارلامەنت جانە ونىڭ دەپۋتاتتارىنىڭ مارتەبەسى تۋرالى» زاڭدارعا وزگەرىستەر ەنگىزىلدى.
الايدا مەملەكەتتىك ينستيتۋتتاردىڭ اتقارىپ جاتقان جۇمىسىن اشىق ايتىپ, حالىققا ءتۇسىندىرۋ ءىسى اقساپ تۇر, ياعني كوممۋنيكاتسيا جەتىسپەيدى. «حالىق ۇنىنە قۇلاق اساتىن مەملەكەت» تۇجىرىمداماسىنىڭ پايدا بولۋى دا وسى سەبەپتەن.
حالىقتى الاڭداتقان ماسەلەلەر قانداي ساپادا, قالاي شەشىلىپ جاتىر؟ قوعام وسى سۇراقتارعا تولىق جاۋاپ الۋى كەرەك. مەملەكەتتىك اپپاراتتىڭ اشىق بولۋى دا وسىعان كەلىپ سايادى. قوعام مەن بيلىك قاتار ءجۇرۋى كەرەك. كەيدە مەملەكەتتىك ورگاندار ءوز قىزمەتىن, قابىلداعان شەشىمدەرىن, كەيبىر ارەكەتتەرىن تۇسىندىرۋگە تىرىسپايدى. وسىدان نارازىلىق تۋىندايدى.
وسى ورايدا پرەزيدەنت سۇحبات بارىسىندا ەلىمىز ءۇشىن جاڭا رەفورمالاردى كوپ كۇتتىرمەي ناۋرىز ايىنىڭ ورتاسىنا قاراي جاريالايتىنىن جەتكىزدى. «مەن باستاپقىدا جاڭا ساياسي رەفورمالاردى كۇزدە جاريالايمىن دەپ ويلاعام, بىراق ساياسي رەفورمالاردى ناۋرىزدىڭ ورتاسىندا حالىققا جولداۋىمدا ۇسىناتىن بولدىم. قازىرگى تاڭدا جۇرت رەفورمالاردى زور ۇمىتپەن كۇتىپ وتىرعانىن بىلەمىن. سوندىقتان «جاڭا قازاقستاندى بىرگە قۇرايىق» دەپ ۇندەۋ جولدادىم. وندا ايتىلعان ماسەلەلەردى كوپشىلىك قولداپ وتىر», دەدى مەملەكەت باسشىسى.
بۇل ءسوزى ارقىلى پرەزيدەنت بۇگىندە قوعامنىڭ ۇلكەن وزگەرىستەردى اسىعا كۇتىپ وتىرعانىن جاقسى تۇسىنەتىنىن انىق اڭعارتتى. الداعى ۋاقىتتا مەملەكەت باسشىسى تاراپىنان جاسالاتىن جۇيەلى قادامدار حالىقتىڭ كوڭىلىنەن شىعادى دەپ ويلايمىن.
ينديرا رىستينا,
ساياساتتانۋشى
