«ايشا ءبيبى» پوليگونىندا «وڭتۇستىك» وڭىرلىك اسكەرلەرى ۆزۆودتارىنىڭ جاۋىنگەرلىك جاتتىعۋ اتىستارى باستالدى. ونىڭ ماقساتى – شىنايى ۇرىسقا مەيلىنشە ۇقساس جاعدايدا ارەكەت ەتىپ, جاتتىعۋ مىندەتتەرىن ءىس جۇزىندە پىسىقتاۋ. بۇل شارالار ەلباسى – قارۋلى كۇشتەرىمىزدىڭ جوعارعى باس قولباسشىسى نۇرسۇلتان نازارباەۆتىڭ وقۋ پروتسەسىن جاڭا مازمۇنمەن تولىقتىرۋ, جاۋىنگەرلىك دايىندىقتىڭ قارقىنىن كۇشەيتۋ تۋرالى نۇسقاۋىمەن ۇندەسىپ جاتىر. جاقىندا قورعانىس مينيسترلىگىندە وتكەن جەدەل-ستراتەگيالىق جيىندا ەلباسى جاتتىعۋلار قازىرگى زامانعى قاۋىپ-قاتەرلەرگە ساي بولۋى قاجەت دەگەن بولاتىن.
قازىر «ايشا ءبيبى» پوليگونىندا 5-ءشى تاۋلى اتقىشتار بريگاداسىنىڭ بولىمشەلەرى وزدەرىنىڭ دايىندىق جۇمىستارىن جۇرگىزۋدە. بۇل ەل قارۋلى كۇشتەرى ساپىنداعى بىردەن-ءبىر ەرەكشە قۇراما بولىپ تابىلادى. بيىل بۇل بريگادادا العاش رەت جاۋىنگەرلىك دايىندىقتىڭ جاڭا تاسىلدەرى تاجىريبە جۇزىندە سىناقتان وتكىزىلۋدە.
جالپى, ۆزۆودتىق جاۋىنگەرلىك جاتتىعۋ اتىسى بارىسىندا ءبولىمشە كومانديرلەرىنىڭ, مەحانيك-جۇرگىزۋشىلەردىڭ, كوزدەۋشى-وپەراتورلاردىڭ جانە اتقىشتاردىڭ ءوزارا ۇيلەسىمدى جۇمىسىنا باسا نازار اۋدارىلادى. سونىمەن قاتار, تاۋلى اتقىشتاردىڭ جەكە دايىندىعىنا دا ايرىقشا ءمان بەرىلەدى. قازىر ولار الەمگە ايگىلى «كالاشنيكوۆ» اۆتوماتىنان, تانكىگە قارسى گراناتومەت پەن مينومەتتەردەن, بمپ-2 جاۋىنگەرلىك ماشيناسىنان اتىپ جاتتىعۋ ۇستىندە.
جاتتىعۋ بارىسىندا قارۋلى كۇشتەر تەكتەرىنىڭ ءوزارا ءۇيلەسىمدى ءىس-قيمىلدارى دا پىسىقتالۋ ۇستىندە. مىسالى, قۇرلىق اسكەرلەرىنە اۋە قورعانىسى كۇشتەرىنىڭ مايداندىق اۆياتسياسى اۋەدەن قولداۋ كورسەتۋدە. اۆياتسيانىڭ ءىس-ارەكەتى مەن نىسانالارىن قۇرلىق اسكەرلەرىنىڭ وكىلدەرى ءوز كەزەگىندە قازىرگى زامانعى بايلانىس قۇرالدارى ارقىلى جەردەن باعىتتاپ وتىردى.
بۇگىندە «تەرىس-اششىبۇلاق» پوليگونىندا تاۋلى قورىقشى بولىمشەلەرىنىڭ اسكەري قىزمەتشىلەرى دە وزدەرىنىڭ ارنايى دايىندىقتارىنا كىرىستى. ولاردىڭ باستى ەرەكشەلىگى – تاۋلى ايماقتاردا جانە تىكەلەي ۇرىس قيمىلدارى كەزىندە جىلقىلاردى ءتيىمدى قولدانىپ, ارەكەت ەتۋ. ۇزدىكسىز جاتتىعۋ جۇمىستارى ءناتيجەسىندە اتتار اتىس-شابىستان ۇرىكپەي, بۇيرىقتى تەز قابىلداپ, جاۋىنگەردىڭ سەنىمدى سەرىگىنە اينالعانىن كورسەتتى. بۇل بولىمشەلەردىڭ ساربازدارىنا قويىلار تالاپ تا جوعارى. ولار شىڭ-قۇزدارعا ورمەلەۋ ادىستەرىن جاقسى مەڭگەرىپ, ارنايى قۇرالدارمەن تاۋ جارتاستارىنا شىعىپ, ءتۇرلى كەدەرگىلەردى جەڭە بىلۋگە ءتيىس. بۇل ءۇشىن جالپى اسكەري ۇرىس تاكتيكاسىنان بولەك, ادام دەنەسىنىڭ فيزيكالىق تۇرعىسىنان وتە جاقسى دايىندىعى دا قاجەت.
كوسەمالى ساتتىباي ۇلى,
«ەگەمەن قازاقستان».
جامبىل وبلىسى.
