الماتى كوپسالالىق كلينيكالىق اۋرۋحاناسى ءبىرىڭعاي ۇلتتىق دەنساۋلىق ساقتاۋ جۇيەسى بويىنشا ازاماتتارعا شۇعىل جانە جوسپارلى مەديتسينالىق كومەك كورسەتەدى. بىزدە جالپى حيرۋرگيا, تامىرلى حيرۋرگيا, بەت-جاق حيرۋرگياسى, نەيروحيرۋرگيا, تراۆماتولوگيا, گينەكولوگيا, ۋرولوگيا, نەۆرولوگيا جانە كارديولوگيا بولىمشەلەرى جۇمىس ىستەيدى.
سوڭعى جىلدارى قابىلدانعان «سالاماتتى قازاقستان» باعدارلاماسى وتانداستارىمىزدىڭ جەكە دەنساۋلىق كورسەتكىشتەرى مەن جالپى قوعامدىق دەنساۋلىقتى ساپالى تۇردە وڭ ىلگەرىلەتۋدى ماقسات ەتەدى. مەملەكەتتىك باعدارلامانى ىسكە اسىرۋ دەنساۋلىق ساقتاۋ ماسەلەلەرىندە بۇكىل قوعامدىق كەلىسىمگە قول جەتكىزۋ جولىمەن حالىقتىڭ ءومىر ءسۇرۋ ۇزاقتىعىن ارتتىرا وتىرىپ, جالپى جانە انا مەن بالا ءولىم-ءجىتىمىن, سونداي-اق, الەۋمەتتىك ءمانى بار اۋرۋلاردى تومەندەتە وتىرىپ, دەنساۋلىق ساقتاۋ سالاسىنىڭ باسەكەگە قابىلەتتى جۇيەسىن قالىپتاستىرۋعا ىقپال ەتەتىن بولادى. بۇل باعدارلاما وتاندىق مەديتسينانى دامىتۋداعى جاڭا قادام, ول بىزگە وتانداستارىمىزدىڭ دەنساۋلىعىن جاقسارتۋ ماسەلەلەرىن كەشەندى تۇردە شەشۋگە ىقپال ەتەدى.
قازىرگى كەزدە قان اينالىمى جۇيەسىنىڭ اۋرۋلارى قوعام ءۇشىن وزەكتى بولىپ وتىر. ال ونى ەمدەۋگە باسىمدىق ءمان بەرىلگەنى دە بەلگىلى. رەسپۋبليكا حالقىنا كارديولوگيالىق, كارديوحيرۋرگيالىق كومەك كورسەتۋ باعدارلاماسىنا سايكەس ءبىزدىڭ كوپسالالى كلينيكامىزدا دا 2012 جىلى انگيوحيرۋرگيالىق ادىسپەن دياگنوستيكالاۋ جانە ەمدەۋ بولىمشەسى اشىلعان بولاتىن. وندا جۇرەكتىڭ يشەميالىق سىرقاتىمەن, جەدەل كورونارلىق سيندروممەن, ءجىتى ميوكارد ينفاركتىمەن اۋىراتىن سىرقاتتارعا ەمدەۋ مەن دياگنوستيكالاۋدىڭ ينتەرۆەنتسيالىق ءادىسى قولدانىلادى. ەمدەۋدىڭ بۇل ءتۇرى 2013 جىلى تەك قانا الماتى وبلىسىندا ەمەس, بۇكىل ەلىمىز بويىنشا قان اينالىمى جۇيەسى اۋرۋلارىنان بولاتىن ءولىم-ءجىتىم مەن مۇگەدەكتىككە ۇشىراتۋدى بىرنەشە ەسە تومەندەتتى.
جۇرەكتىڭ يشەميالىق اۋرۋى قاۋىپتى اۋرۋلاردىڭ قاتارىنا جاتقىزىلادى. ول اسقىنعان جاعدايدا ميوكارد ينفاركتىنە جول اشىپ, ونىڭ سوڭى مۇگەدەكتىك پەن ءولىم-جىتىمگە اكەلەدى. اۋرۋ جۇرەككە قان ايدايتىن ءتاج (كورونارلىق) تامىرىنىڭ زاقىمدانۋىنان, قان قۇرامىندا حولەستەريننىڭ جوعارىلاۋىنان پايدا بولادى. بۇل ءوز كەزەگىندە اعزالاردىڭ وتتەگىمەن جانە قانمەن قامتاماسىز ەتىلۋىنىڭ بۇزىلۋىنا, ياعني جۇرەكتىڭ تۇنشىعۋىنا اكەلەدى, ارى قاراي ميوكارد ينفاركتىنىڭ دامۋىنا الىپ كەلەدى. بىراق, ءدال وسى اۋرۋدىڭ سالدارىنان كەنەتتەن بولاتىن ءولىم-ءجىتىمنىڭ الدىن الۋ مۇمكىن ەكەنىن ايتقىمىز كەلەدى.
ەلىمىزدىڭ كەز كەلگەن ازاماتى جۇرەك ارتەرياسىندا زاقىمدانۋدىڭ العاشقى بەلگىلەرى بايقالعاندا كارديولوگ دارىگەرگە بارۋى قاجەت. ەلەكتروكارديوگرامما جاساتىپ, قانداعى حولەستەرين دەڭگەيىن ءبىلۋى كەرەك. بۇل اۋرۋدىڭ العاشقى بەلگىسى جۇرەكتىڭ ۇستامالى تۇردە قىسىلۋى. مەديتسينا تىلىندە ونى «گرۋدنايا جابا» دەپ اتايدى. كەيبىر ۇستامالى ستەنوكارديا اۋرۋى (گرۋدنايا جابا) كوبىنەسە كەۋدەنىڭ سول جاعىنا, جۇرەكتىڭ تۇسىنا بەرىلەدى, كەيدە اۋرۋ جۇتقىنشاقتا, اسقازان تۇسىندا پايدا بولادى. مىنە, وسىنداي بەلگىلەر پايدا بولعان كەزدە كوروناروانگيوگرافيا جاساتۋ ۇسىنىلادى. بۇل جۇرەك ارتەرياسىنىڭ ەرەكشەلىگىن, ولاردىڭ ورنالاسۋى مەن تارىلۋىن ءدال انىقتاپ بەرەتىن دياگنوستيكالىق ءادىس. ەگەر ارتەريانىڭ 55 پايىزى تارىلعان بولسا, وتتەگى جەتىسپەۋشىلىگى تۋىنداپ, ونىڭ سوڭى ۇستامالى ستەنوكارديا اۋرۋىنا سوقتىرادى. مىنە, وسىنىڭ الدىن الۋ ءۇشىن دياگنوستيكالاۋدان كەيىن دارىگەر حيرۋرگ ارتەريانىڭ تارىلعان جەرىنە ارنايى ستەنت ورناتادى. بۇدان كەيىن ارتەرياداعى قان اينالىمى رەتتەلىپ, ناۋقاستىڭ ءومىر ساپاسى جاقسارادى, ەڭ باستىسى, بۇل ءادىس ميوكارد ينفاركتىنىڭ الدىن الادى.
ارينە, كەز كەلگەن ادام دەنى ساۋ, ساپالى ءومىر سۇرگىسى كەلەدى. سوندىقتان مامان رەتىندە شىلىم شەگۋ, الكوگولدى ىشىمدىك ءىشۋ, دەنەنىڭ ارتىق سالماعى, كۇندەلىكتى ومىردە از قيمىلداۋ فاكتورلارى قان اينالىمىنىڭ اۋرۋلارىن تۋىنداتاتىنىن ايتقىم كەلەدى. سونداي-اق, كەز كەلگەن ادام اۋرۋدىڭ الدىن الۋ ءۇشىن دۇركىن-دۇركىن قان قۇرامىنداعى حولەستەرين مەن قانتتى تەكسەرتىپ, قان قىسىمىن ولشەتىپ تۇرۋدى دا ادەتكە اينالدىرسا ارتىقتىق ەتپەيدى.
قۋاتجان تۇرىسبەكوۆ,
الماتى كوپسالالىق كلينيكالىق
اۋرۋحاناسىنىڭ باس دارىگەرى.
