جاسىل قۇرلىقتا جارقىرادى

26 قاڭتاردان 5 اقپانعا دەيىن جالعاسقان بي ونەرىنىڭ جارمەڭكەسىنە قازاقستاننان بولەك، كوۆەنت-گاردەن كورولدىك بالە­تى، امەريكالىق بالەت تەاترى جانە كۆينس­لەندسك بالەتىنىڭ جەتەكشى سوليستەرى قا­تى­سىپ، ۇزدىك تاجىريبەلەرىمەن ءبولىستى. پلا­نەتانىڭ تۇكپىر-تۇكپىرىنەن بارعان ۇزدىك بيشىلەر اۋستراليانى بەكزات ونەردىڭ ناعىز دۋمانىنا اينالدىردى.

Ballet International Gala الەمدىك شوۋى  – بۇل بايقاۋ نەمەسە جارىس بولماعانىمەن، وندا وليمپيا ويىندارىنىڭ ءبىر جۇرنا­عى بار: كۇللى الەمنىڭ ۇزدىك بالەت ارتىستەرى وزدەرىنىڭ ءمىنسىز تەحنيكاسىن كورسەتىپ، وسىلايشا ەرەكشە مەرەكەلىك اتموسفەرا تۋدىرادى. ايتۋلى شارادا قازاقستاندى تالانتتى ءبيشى باقتيار ادامجان تانىستىردى. بيدەگى ساحنالىق جۇبى «استانا وپەرانىڭ» تالانتتى ءارتىسى شۇعىلا ادەپ­حانمەن بىرگە ا.حاچاتۋريان­نىڭ «سپار­­تاك» بالەتىنەن ءۇزىندى ورىندادى.

– اۋستراليا ەلىندە وتكەن ونەر ساپارىمىز شىعارماشىلىق جولىمىزداعى ۇلكەن مەكتەپ بولدى. تاماشا تاجىريبە جيناپ قايتتىق. جەرگىلىكتى كورەرمەننىڭ دە بالەت ونەرىن ءتۇسىنىپ، قابىلداۋى ەرەك­شە. بۇل ولار ءۇشىن ايتۋلى وقيعا بول­عانى ءسوزسىز، زالدا ينە شانشار ورىن بولمادى. جاسىل قۇرلىق حالقىنىڭ بالەت ارتىستەرىنە كورسەتكەن قوشەمەتى مەن قۇرمەتى كوڭىلىمىزگە ايرىقشا اسەر ەتتى. ەلگە زور شابىت الىپ ورالدىق، – دەپ قازاق­ستاننىڭ ەڭبەك سىڭىرگەن قايراتكەرى باقتيار ادامجان ءوز اسەرىمەن ءبولىستى.

ءارتىستىڭ ايتۋىنشا، ول ارىپتەستەرىمەن جىلى دوستىق قارىم-قاتىناس ورناتقان. 

– بالەت الەمى وتە تار، سوندىقتان ءبىز بۇعان دەيىن ءبىر-بىرىمىزبەن تانىس بولماساق تا، الەۋمەتتىك جەلىلەر ارقىلى سىرتتاي بىلەتىنبىز. Ballet International Gala الەمدىك شوۋى سونداي ۇزدىك ارىپتەستەرىمىزبەن جاقىنىراق تانىسۋعا، شىعارماشىلىق تۇرعىدان تاجىريبە الماسۋعا تاماشا مۇم­كىن­دىك بەردى، – دەيدى ول.

باقتياردىڭ بالەتتەگى جۇبى شۇعىلا ادەپحان دا سەرىكتەسىنىڭ پىكىرىن قۋاتتادى: – ونەر ساپارىنان تەك جاقسى اسەر الدىم. ءبىزدىڭ ءنومىر بارىنە ۇنادى، تامسانباعان جان قالمادى. ءار بالەت مەكتەبىنىڭ جانە ءار شەتەلدىك ءارتىستىڭ وزىندىك كاسىبي ەرەكشەلىگى بار. ءبىزدىڭ ءبىر-بىرىمىزدەن ەرەكشەلەنۋىمىز زاڭدىلىق. بۇل قاي-قايسىمىزعا دا  قۋات، موتيۆاتسيا الۋعا، شابىتتانۋعا مۇمكىندىك بەرەدى.

Ballet International Gala جوباسى بالەت­تىڭ جەتەكشى ارتىستەرىن جيناي وتىرىپ، كوپشىلىكتىڭ نازارىن اۋداردى جانە بۇقارالىق اقپارات قۇرالدارىندا كەڭ رە­زونانس تۋعىزدى. ەڭ قىزۋ تالقىلانعان ورىنداۋلاردىڭ ءبىرى «استانا وپەرا» ارتىستەرىنىڭ ءنومىرى بولدى، ول تۋرالى بىرقا­تار اۋستراليالىق جانە الەمدىك بۇ­قارا­لىق اقپارات قۇرالدارى جارىسا جاز­دى. ايتۋلى باسىلىمدار ىشىندە The Australian، The Courier Mail، The Mercury، The Cairns Post جانە باسقالارى بار. شوۋ قاتىسۋشىلارى دا الەۋمەتتىك جەلىلەردە قازاقستاننىڭ استاناسىنان بارعان ءوز ارىپتەستەرى جايلى تاڭدانىستارىن ءبىلدىرىپ جاتتى.

ەڭ ءىرى اۋستراليالىق سىنشىلاردىڭ ءبىرى – ونەر شولۋشى فيل براۋن The Courier Mail گازەتىندە باقتيار مەن شۇعىلانىڭ ونەرىنە جوعارى باعا بەردى:

– «سپارتاك» بالەتىنەن ءۇزىندى ورىنداعان قازاقستاندىق قوس ءبيشى – باقتيار مەن شۇعىلانى كورگەنىمە سەنە الار ەمەسپىن. ولارعا مۇندا جەتۋ وڭاي بولمادى، الايدا قاجەتتى قۇجاتتاردىڭ بولۋى جانە BIG-ءتىڭ باسقا دا قاتىسۋشىلارىمەن بىرگە كاران­تيندى ساقتاۋدىڭ ناتيجەسىندە ولار كوۆيدتى بولدىرماي، ماقساتتارىنا جەتتى. قازاقستاندىق جۇپ كەزىندە جازىلعان ەڭ ادە­مى اۋەندەردىڭ ءبىرى – ارام حاچاتۋرياننىڭ مۋزىكاسىنا كەرەمەت بيلەدى. جانە دە ادام­­جاننىڭ بەينەسى شىنايى سپارتاكتان اي­نى­ماي قالدى. بۇل جۇپتىڭ ونەر كورسەتۋى تاڭعال­دىرارلىق قۋاتتى جانە ادەمى بولدى،  دەدى براۋن.

Ballet International Gala الەمدىك شوۋىندا ونەر كورسەتۋ مارتەبەسى بيىل  ورتا­لىق ازيا مەملەكەتتەرىنىڭ ىشىنەن تەك قازاقستان عانا بۇيىرىپتى. ەلىمىزدىڭ ابى­­رويىن جات ەلدە اسقاقتاتقان ونەرلى جۇپ بالەت ونە­رىندەگى كەزەكتى بيىگىن باعىن­دى­رىپ قايتتى. ال «استانا وپەرا» تەاترى با­لەت ترۋپپاسىنىڭ جاسامپاز جۇمىستارى الەمدىك دەڭگەيدەگى ايگىلى ورتالىقتارمەن افيشادا قاتار تۇرۋى – ءوز الدىنا زور مارتەبە.