47 مۇگەدەك ءبىر كۇندە جۇمىس ورنىن تاپتى

بۇل جولعى جۇمىس جارمەڭكەسى مۇمكىن­دىگى شەكتەۋلى جاندارعا ارنالدى. «بازارعا بارىپ باعىڭدى سىنا» دەگەندەي, «نۇر وتان» پارتياسىنىڭ وبلىستىق فيليالى, ۇلتتىق كاسىپكەرلەر پالاتاسىنىڭ وڭىرلىك كەڭەسى جانە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى بىرلەسىپ ۇيىمداستىرعان جارمەڭكە تۋرالى ولارعا الدىن الا حابارلانىپ, جۇمىسقا تۇرۋ مۇمكىندىگى ۇسىنىلدى. بۇل جۇمىسقا جارامدى جەتپىستەن اسا عارىپ جانداردىڭ كۇتپەگەن قۋانىشى ەدى. شاراعا وبلىس وڭىرىندەگى مەملەكەتتىك ورگانداردىڭ بارلىعى دەرلىك قاتىستى, ونىڭ سىرتىندا جيىرمادان اسا بيزنەس قۇرىلىمدارى دا كەلدى. اۋرۋمەن الىسىپ ءجۇرىپ, ماماندىق العان جاستاردىڭ تالابىن ءار جۇمىس بەرۋشى باعالاي بىلسە كەرەك. يۆان پەرشيننىڭ ماماندىعى پروگرامميست. جاسىنان كومپيۋتەرگە ىنتىق بولعان ول مەكتەپتى بىتىرگەن سوڭ, قوستاناي پوليتەحنيكالىق كوللەدجىنە ءتۇسىپ وسى ماماندىقتى يگەرىپ الدى. الايدا, جۇمىسقا ورنالاسۋدى ويلاعاندا ويى ون سانعا كەتەتىن. اياق-قولى بالعاداي جاستار جۇمىسسىز جۇرگەندە, ونى كىم الا قويسىن دەپ تارتىنا بەرەتىن. جارمەڭكەگە كەلگەن يۆاننىڭ جولى بولدى. ول قوستاناي وبلىستىق جاستار ساياساتى ماسەلەلەرى باسقارماسىنا اقپاراتتىق تەحنولوگيالار تەحنيگى بولىپ ورنالاستى. ونى وسى ۋاقىتقا دەيىن تاجىريبەڭ, ەڭبەك ءوتىلىڭ جوق دەپ قايتارا بەرەتىن ەدى. جىگىتتىڭ قۋانىشىندا شەك جوق. جارمەڭكەدە مۇمكىندىگى شەكتەۋلى جاندارعا شاعىن جانە ورتا بيزنەس كاسىپورىندارى باسشىلارى كۇزەتشى, پروگرامميست, اۋدارماشى, ءىس جۇرگىزۋشى سياقتى كوپتەگەن جۇمىستار ۇسىندى. ءبىر كۇندە 47 مۇگەدەك جۇمىس بەرۋشىلەرمەن كەلىسىپ, جۇمىسقا تۇراتىن بولىپ, قۋانىپ قايتتى. كوپشىلىگى بىردەن كەلىسىمشارتقا وتىردى. – ءبىر كۇندە مۇمكىندىگى شەكتەۋلى 47 ادامنىڭ جارمەڭكەدەن جۇمىس تابۋى بۇرىن-سوڭدى بولعان ەمەس. ولاردىڭ قۋانىشىن كورسەڭىز. مۇگەدەك جاندارعا ءار ەسىكتى قاعىپ, جۇمىس ىزدەۋدىڭ قيىندىعىن كىم تۇسىنەدى؟ ال جارمەڭكەدە كاسىپكەرلەر مەن باسقارما باسشىلارى ولارمەن كەزدەسىپ, ءبىلىمى, بىلىكتىلىگى, الەۋمەتتىك جاعدايلارى تۋرالى حاباردار بولدى. جۇمىسقا الۋعا ۋادەسىن بەردى, ەندى ولار ەشقانداي كەدەرگىسىز جۇمىسقا ورنالاسادى, – دەيدى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى ارداگەرلەر جانە مۇگەدەكتەرمەن جۇمىس ءبولىمىنىڭ جەتەكشىسى نۇرزيا ابىشەۆا. بۇگىندە وبلىس وڭىرىندە ءى-ءىى توپتاعى جۇمىسقا جارامدى 17 مىڭ مۇگەدەك جاندار ەسەپتە تۇرادى. ونىڭ 4 مىڭىنىڭ ناپاقاسىن تاۋىپ وتىرعان جۇمىس ورنى بار. سوڭعى ايلاردا وتكىزىلگەن جارمەڭكەلەر ارقاسىندا تاعى دا ەكى جۇزدەن اسا ادام جۇمىسقا ورنالاستى. جارمەڭكەمەن قاتار وبلىستا كەدەرگىسىز قوعام ورناتۋ جۇمىستارى جۇرگىزىلۋدە. قالالار مەن اۋدانداردا, ءتىپتى اۋىلداردا بەس مىڭنان اسا كولىك, الەۋمەتتىك كوممۋنالدىق قىزمەت كورسەتەتىن نىساندار تىركەۋگە الىنعان. ولاردىڭ بارلىعىندا دەرلىك مۇگەدەك جانداردىڭ كەدەرگىسىز ءجۇرىپ-تۇرۋىنا قاجەتتى پاندۋستار, سانيتارلىق بولمەلەر جاراقتالىنۋدا. ءبىر قوعامدا ءومىر ءسۇرىپ وتىرىپ, الا-قۇلالىق بولماسا كەرەك-ءتى. ادامنىڭ ادامنان ايىرماسى مۇمكىندىگىنىڭ شەكتەۋلىلىگىندە ەمەس, مادەنيەتىنىڭ دەڭگەيىنە بايلانىستى اجىراتىلماق. ال مۇگەدەك جانداردىڭ جاعدايىنا قاراپ, ولارعا قامقور قولىمەن قاتار جۇمىس ۇسىنۋ دا مادەنيەت دەڭگەيىن بىلدىرسە كەرەك. قايىرىمدىلىق جان بايلىعىنىڭ بەلگىسى. جارمەڭكە وسىنى ۇعىندىرعانداي بولدى. ءنازيرا جارىمبەتوۆا, «ەگەمەن قازاقستان». قوستاناي.