ناۋرىز – تۇركى حالىقتارى ءۇشىن ەجەلگى, كۇن مەن ءتۇننىڭ تەڭەلەتىن, ۇزاق تا قاتال قىستان كەيىن تىرشىلىككە جان بىتىرەتىن مەيرام. ماعان ۇنايتىنى – بۇل مەيرامنىڭ ءبىزدىڭ ەلىمىزدە بارشا قازاقستاندىقتاردىڭ باسىن ءبىر شاڭىراقتىڭ استىنا بىرىكتىرەتىنى! بۇگىنگى تاڭدا تاۋەلسىز مەملەكەتىمىز, پرەزيدەنتىمىز ن.نازارباەۆتىڭ سوزىمەن ايتقاندا, شىن مانىندە عاجايىپ بىرەگەي «ارالعا» اينالىپ وتىر. بۇل – بارلىق قازاقستاندىقتاردىڭ ورتاق جەتىستىگى. بەيبىتشىلىك پەن بىرلىك – ەلىمىزدىڭ ودان ءارى قاراي دامۋى مەن وركەندەۋىنىڭ نەگىزى, بەلگىلەنگەن جوسپارلاردى تابىستى ىسكە اسىرۋدىڭ كەپىلى!
بۇل مەرەكەدە حالىقتار دوستىعىن جانە ۇلتتاردىڭ ءبىر-بىرىنە دەگەن قۇرمەتىن كورەمىز.
ناۋرىز – تىرشىلىك اتاۋلىنىڭ ءبارى قىسقى «ۇزاق ۇيقىدان» كەيىن وياناتىن, ءبىر-بىرىمەن جۇزدەسىپ, قۋانىشقا بولەنەتىن كەزى. ادامدار دا قۋانا امانداسىپ, ءبىر-ءبىرىن قۇتتىقتاپ, ءبىر-بىرىنە قوناققا بارىپ, جاقسى تىلەكتەرىن ايتادى.
جانە ءبىر جاقسى ءداستۇر – اۋىلدا دا, قالادا دا حالىق دالاعا نە كوشەگە شىعىپ, قىستان قالعان قوقىستاردى جيناپ, ءوزى تۇراتىن جەردىڭ توڭىرەگىن تازارتادى. جىلى جاقتان كەلگەن قۇستار دا ءبىر-بىرىمەن تابىسىپ, اعاشتارعا ۇيا سالادى. تال-شىبىقتار ەگۋ جۇمىستارى قىزۋ ءجۇرىپ جاتادى. بۇل دا ادامنىڭ تابيعاتپەن ۇيلەسىم تاباتىن ءبىر شاعى ەكەنى انىق.
ال مەن ءۇشىن بۇل مەيرام – تەمىرتاۋ قالاسىنا ارنايى بارىپ, جاقىن-جۋىقتارىممەن, تۋىستارىممەن كەزدەسەتىن قۋانىشتى ءسات. قىزىقتى اڭگىمەلەر ايتىلىپ, داستارقانعا ءتاتتى تاعامدار قويىلاتىن كۇن.
ءوزىم سوڭعى جىلدارى ناۋرىز مەيرامى وتەتىن ورتالىق الاڭعا كيىز ءۇي ورناتۋدى داستۇرگە اينالدىرىپ كەلەمىن. مەيرام كۇنى اقساقالداردى, قۇرمەتتى قوناقتاردى شاقىرامىز. قازاق داستۇرىمەن داستارقانعا باۋىرساق, ەت قويىلادى. ايتا كەتەيىن, ءسپيرتتى ىشىمدىكتەر بولمايدى. كيىز ءۇيدى جاساۋعا موڭعوليادان كەلگەن جىگىتتەر كومەكتەسەدى. ەگەر كيىز ءۇيدى ناعىز قازاقى بۇيىمدارمەن جاسايتىن بولساڭ, ونى ۋاقىتىندا باپتاپ, دۇرىس ساقتاپ, كەپتىرىپ وتىرۋ كەرەك ەكەن. سوندىقتان قازىرگى زامانعا لايىقتالىپ جاڭا يننوۆاتسيالىق تەحنولوگيا پايدالانىلادى. كەرەگە مەن ۋىقتارى جانە شاڭىراعى ساپالى مەتالدان جاسالىپ, ۇلتتىق رەڭى ساقتالا, اپپاق كيىز ءۇي بولىپ شىعا كەلەدى. ءۇيدىڭ ىشىندە توسەنىشتەر, كىلەم, كورپە-جاستىقتار – ءبارى بار. ەدەنى تاقتايدان جاسالعان. جازدا ىرگەسىن ءتۇرىپ قويعاندا سامال جەل سوعىپ, سالقىن كەزدە جىلى, ال جازدا قوڭىر سالقىن بولىپ تۇرادى. وعان ءوزىم دە كۋا بولدىم. وتكەن جىلدىڭ جاز كۇندەرى نەمەرەم ماتۆەي ەكەۋمىز ءبىر جاقتان شارشاپ كەلدىك تە كيىز ۇيگە جاتا قالىپ ەدىك, قاتتى ۇيىقتاپ قالىپپىز. ويانعاندا, كەرەمەت تىنىعىپ قالعانىمىزدى بايقادىق.
ناۋرىز مەيرامى قارساڭىندا تەمىرتاۋ قالاسىنداعى ارنايى الاڭدا ءبارى دە كيىز ءۇي ورناتادى. ءارتۇرلى مەكەمەلەر, شاعىن جانە ورتا كاسىپكەرلىكپەن اينالىساتىن كاسىپورىندار جانە «نۇر وتان» پارتياسى ءوز كيىز ءۇيىن تىگەدى. سولاردىڭ اراسىندا ورنالاساتىن ءوزىمنىڭ كيىز ءۇيىم دە قوناقتاردى قارسى الادى. بيىل تۇرمىسى تومەندەردى جانە ءمۇمكىندىگى شەكتەۋلى جانداردى قوناق قىلسام دەپ وتىرمىن. بۇرىن اۋىر جۇمىس ورىندارىندا ەڭبەك ەتكەن جاندارمەن بۇعان دەيىن بايلانىس جاساپ تۇرعان ەدىم. ولاردىڭ الاتىن جاردەماقىسىن يندەكستەۋ ماسەلەلەرىن شەشۋگە ىقپال ەتتىم. جۋىردا ساندىق ساتىپ الدىم. كادەسىيلار دايىنداپ قويدىم. ءۇش شاپانىم بار.
ناۋرىزدا وزگە ۇلت وكىلدەرى دە ۇلتتىق كيىمدەرىن كيىپ كەلەدى. تەگىنە, تىلىنە قاتىستى ەشقانداي شەكتەۋ جوق. بۇگىنگى تاڭدا ناۋرىزدىڭ گۋمانيستىك يدەالى – ساياسي تۇراقتىلىقتى, سەنىم مەن دوستىقتى, ەلىمىزدە تۇراتىن بارلىق ادامداردىڭ تەڭ قۇقىعىن ساقتاۋدا ايرىقشا ءرول اتقارادى. مۇنداي مەيرامدار حالىقتىڭ بىرلىگىن تەك قانا نىعايتا تۇسەدى دەپ ويلايمىن.
تەمىرتاۋ قالاسىندا ەلىمىز ەگەمەندىگىن العان كەزدەن بەرى ناۋرىز مەيرامى تويلانىپ كەلەدى. ول – كوپۇلتتى قالا. جۇزدەن استام ۇلتتىڭ وكىلدەرى تۇرادى. ءبارى دە ىنتىماقتاستىقتا ءومىر ءسۇرىپ جاتىر. ءبارى دە ءبىر شاڭىراقتىڭ استىندا, ءبىر داستارقاننىڭ باسىندا بىرىگۋگە تىرىسادى. بۇل جەردە قازاقستان پرەزيدەنتىنىڭ ەڭبەگى زور دەپ ايتار ەدىم. ويتكەنى, قازاقستان حالقى اسسامبلەياسى سياقتى كونستيتۋتسيالىق مارتەبەسى بار ىرگەلى ۇيىمدى بىردە-ءبىر مەملەكەت قۇرا العان جوق.
بۇل مەيرام – ءبىزدىڭ ءبىر ماقسات, ءبىر مۇددە, ءبىر بولاشاق جولىندا بىرگە ەكەندىگىمىزدى تاعى دا ءبىر دالەلدەي تۇسەدى. سوندىقتان, بارشا قازاقستاندىقتاردى كوكتەمنىڭ جارقىن مەرەكەسى – ناۋرىز مەيرامىمەن قۇتتىقتايمىن! بارىنە كوكتەمنىڭ ارايلى شۋاعىن, زور دەنساۋلىق, باقىت پەن ىرىس-بەرەكە تىلەيمىن!
اندرەي بەگەنەەۆ,
پارلامەنت ءماجىلىسىنىڭ دەپۋتاتى,
«نۇر وتان» پارتياسى فراكتسياسىنىڭ مۇشەسى.
