وتباسى بانك قازاقستاندىقتاردىڭ تۇرعىن ءۇيدى جالداۋ اقىسىن سۋبسيديالاۋعا قاتىستى ونلاين وتىنىمدەرىن قابىلداۋ ءۇشىن پلاتفورمانىڭ فۋنكتسيونالدىعىن پىسىقتاۋدا. جۇمىس بارىسىن اۆتوماتتاندىرۋ ءۇشىن بانك 6 مەملەكەتتىك ورگاننىڭ 16 دەرەكقورىمەن ينتەگراتسيا جاساۋى قاجەت. سوندىقتان باسپانانى جالعا الۋ اقىسىن سۋبسيديالاۋ باعدارلاماسى 2022 جىلدىڭ مامىر ايىنان باستاپ ىسكە قوسىلادى.
كوپبالالى وتباسىلار, 1 جانە 2 توپتاعى مۇگەدەكتەر, جەتىم بالالار, مۇمكىندىگى شەكتەۋلى بالالاردى تاربيەلەپ وتىرعان وتباسىلار جالداۋ اقىسىن سۋبسيديالاۋعا ءوتىنىش تاپسىرا الادى. الايدا ۇمىتكەرلەر تۇرعىن ءۇي الۋ كەزەگىندە تۇرۋلارى قاجەت. ولاردىڭ ءاربىر وتباسى مۇشەسىنە شاققاندا سوڭعى 6 ايداعى جيىنتىق تابىسى ەڭ تومەنگى كۇنكورىس دەڭگەيىنىڭ ءبىر مولشەرىنەن اسپاۋى ءتيىس (2022 ج. 1 كم – 36 018 تەڭگە). مۇنداي وتباسىلارعا كومەك رەتىندە بيۋدجەتتەن 50 ميلليارد تەڭگە بولىنەدى. بۇل قاراجاتقا مەملەكەت 70 مىڭ قازاقستاندىقتىڭ باسپانانى جالعا الۋ قۇنىنىڭ جارتىسىن سۋبسيديالايدى.
«بۇل تىزىمدەگىلەردىڭ دەنى, 51 مىڭعا جۋىعى, كوپبالالى وتباسىلار. تاعى 10 مىڭى - 1 جانە 2 توپتاعى مۇگەدەك جاندار, 7 مىڭى - مۇمكىندىگى شەكتەۋلى بالالار تاربيەلەپ وتىرعان از قامتىلعان وتباسىلار, 2 مىڭى - جەتىم بالالار. ەندى بۇل ازاماتتار ءۇشىن باسپانا ماسەلەسى اسا وتكىر بولمايدى. ولار اتالمىش باعدارلاما ارقىلى وتباسىلىق بيۋدجەتكە تۇسەتىن سالماقتى ازايتۋعا مۇمكىندىك الادى. ۇنەمدەلگەن قاراجاتتى تۇرمىستى جاقسارتۋعا باعىتتاۋعا بولادى نەمەسە جەڭىلدەتىلگەن نەسيە بەرۋ باعدارلامالارىنا قاتىسۋ ءۇشىن قاراجات جيناقتاۋعا دا مۇمكىندىك بار», دەپ ءتۇسىندىردى «وتباسى بانك» اق باسقارما ءتورايىمى ءلاززات يبراگيموۆا.
باعدارلاماعا قاتىساتىن ازاماتتاردىڭ ءتىزىمىن يندۋستريا جانە ينفراقۇرىلىمدىق دامۋ مينيسترلىگى قالىپتاستىرادى. ونى العاننان كەيىن وتباسى بانك اتالمىش باعىتتىڭ وپەراتورى رەتىندە جالداۋ اقىسىن سۋبسيديالاۋ مۇمكىندىگى تۋرالى تىزىمدەگى ازاماتتاردى حابارلاندىرادى. ىزىنشە ۇمىتكەر بانك فيليالىنا كەلمەي-اق, Baspana market پلاتفورماسى ارقىلى ونلاين ءوتىنىش بەرە الادى. ول ءۇشىن قازاقستاندىقتاردىڭ ەتسق كىلتى بولۋى قاجەت.
ءوتىنىش بەرۋشىنىڭ كىرىسى پلاتفورمادا تەكسەرىلگەننەن كەيىن ول وزىنە قولايلى باسپانا تاۋىپ, ونى جالعا الۋ شارتىنا ونلاين قول قويىپ, تىركەيدى. سودان كەيىن اعىمداعى شوت اشىپ, جالعا الۋ قۇنىنىڭ 50 پايىزىن سول جەرگە اۋدارادى.
بانك ءوز تاراپىنان قالعان 50 پايىزىن اۋدارىپ, جالعا الۋشىنىڭ تولەم ءتارتىبىن ودان ءارى قاداعالايدى. ۇمىتكەردىڭ جالداۋ اقىسىن سۋبسيديالاۋعا ونلاين ءوتىنىش بەرۋ مۇمكىندىگى بولماسا, ول بۇل جۇمىستى وتباسى بانكىنىڭ بولىمشەسىندە ءوز-وزىنە قىزمەت كورسەتۋ ايماعىندا ىسكە اسىرا الادى.
