ۇلىقتاۋ راسىمىنە قاتىستى

قازاقستان رەسپۋبليكاسىنىڭ برازيليا فەدەراتيۆتىك رەسپۋبليكاسىنداعى ەلشىسى جانە ەلشىلىك قىزمەتتى چيلي رەسپۋبليكاسىندا قوسا اتقارۋشى باقىتجان ورداباەۆ قازاقستان ۇكىمەتى اتىنان چيلي پرەزيدەنتى ۆەرونيكا ميشەل باچەلەت حەريانىڭ ۇلىقتاۋ راسىمىنە قاتىستى. بيلىكتى تاپسىرۋ جانە انت بەرۋ ءراسىمى ەل پارلامەن­تاري­لەرىنىڭ, شەتەلدىك جوعارى دارەجەلى قوناقتار مەن حالىقارالىق ۇيىمدار وكىلدەرىنىڭ قاتىسۋىمەن ءچيليدىڭ ۇلتتىق كونگرەسىندە ءوتتى. ب.ورداباەۆتىڭ ءچيليدىڭ بۇرىنعى پرەزيدەنتى س.پينەرامەن جانە جاڭا سايلانعان پرەزيدەنتى م.باچەلەتپەن حاتتامالىق كەزدەسۋلەرى ءوتتى. س.پينەرا ۇلىقتاۋ راسىمىنە قاتىسقانى ءۇشىن ەلشى ب.ورداباەۆقا العىسىن ءبىلدىردى. ول قازاقستان سىرتقى ىستەر ءمينيسترى ە.ىدىرىسوۆتىڭ چيليگە وتكەن جىلعى رەسمي ساپارى مەن ەلشىنىڭ تاعايىندالۋى ءداستۇرلى دوستىق پەن ءوزارا ءتيىمدى ىنتىماقتاستىققا قۇرىلعان ەكىجاقتى قاتىناستار تاريحىنداعى ماڭىزدى وقيعا ەكەنىن اتاپ ءوتتى. ۇلىقتاۋ شاراسى شەڭبەرىندە وتكەن قىسقا كەزدەسۋ بارىسىندا م.باچەلەت قازاقستاندىق ەلشىگە ءوزىنىڭ وسى لاۋازىمعا رەسمي كىرىسۋىنە وراي وتكەن شارالارعا قاتىسقانىنا العىسىن ءبىلدىردى. ب.ورداباەۆ قازاقستان پرەزيدەنتى ن.نازارباەۆتىڭ اتىنان پرەزيدەنتتىك سايلاۋدا جەڭىسكە جەتۋىنە بايلانىستى م.باچەلەتكە جولداعان قۇتتىقتاۋ حاتىن تاپسىرىپ, قازاقستان چيليمەن ەكىجاقتى ۇنقاتىسۋدى ودان ءارى جالعاستىراتىنىن اتاپ كورسەتتى. ال چيلي پرەزيدەنتى قازاقستان-چيلي قاتىناستارى دوستىق جانە ءوزارا مۇددەلەستىك تۇرعىسىندا داميتىنىنا سەنىمىن ءبىلدىردى. «ەگەمەن-اقپارات».