ۇلى كوبزارعا ارنالدى

استاناداعى وقۋشىلار سارايىندا ۋكرايننىڭ «وبەرەگ» ەتنو-مادەني ورتالىعىنىڭ ۇيىمداستىرۋىمەن ۋكراين حالقىنىڭ ۇلى اقىنى, سۋرەتشىسى جانە ەتنوگرافى تاراس شەۆچەنكونىڭ شىعارماشىلىعىنا ارنالعان كەش بولدى. ۇلى كوبزاردىڭ تۋعانىنا 200 جىل تولۋى قۇرمەتىنە وتكىزىلگەن بۇل شارا ادەبي-مۋزىكالىق كومپوزيتسيا تۇرىندە قانات جايدى. تاراس شەۆچەنكو تاعدىردىڭ ايداۋىمەن ءوز ءومىرىنىڭ ەلەۋلى ءبىر كەزەڭىن قازاق جەرىندە وتكىزدى. ارال ايماعىنان ماڭعىستاۋ تۇبەگىنە دەيىنگى مەكەندە بىرنەشە جىل ءومىر سۇرگەن ونىڭ جۇزدەگەن تۋىندىسى وسى كەزەڭدە تۋىندادى. ولاردىڭ اراسىندا كوپتەگەن ونەگەلى ولەڭدەرى مەن سىرشىل سۋرەتتەرى بار. شىنايىلىعى مەن تازالىعى سول قالپىندا ساقتالعان بۇل شىعارمالار ءالى كۇنگە دەيىن ءوز وقىرماندارى مەن كورەرمەندەرىنىڭ جۇرەكتەرىن ءدۇر سىلكىندىرىپ كەلەدى. كەشتە وسى جايىندا «وبەرەگ» قوعامدىق بىرلەستىگىنىڭ جەتەكشىسى تامارا شيرمەر كەڭىنەن ءاڭ­گىمەلەپ بەردى. ول سونىمەن بىرگە, ەكى حالىقتىڭ اراسىنا سول كەزدەردەن باستاپ سالىنعان التىن كوپىردىڭ ۋاقىت ۇزاعان سايىن الەۋەتتەنىپ كەلە جاتقانىن تىلگە تيەك ەتتى. – تاراس شەۆچەنكو قوناقجاي دا باۋىرمال قازاق حالقىن وتە جاق­سى كورىپ, وسى ولكەنىڭ وسكەلەڭ ۇر­پاعىنا كوپتەگەن ولەڭدەرى مەن اندەرىن ارنادى, – دەدى ول. – ءوز كەزە­گىندە قازىر ۋكراين حالقى دا تاراس گريگورەۆيچكە كەزىندە زور قامقورلىق جاساعانى ءۇشىن قازاق جۇرتىنا ۇلكەن العىس سەزىمدەرىن ءبىلدىرىپ كەلەدى. كەشتى ۇيىمداستىرۋشىلار بيىل ۇلى كوبزارعا ارنالعان ءبىر عانا كەش ۇيىمداستىرىلعانىن, ال الداعى جىلى ولاردىڭ قاتارى ەسەلەپ ارتاتىنىن اتاپ ءوتتى. مۇرات ايتقوجا. سۋرەتتى تۇسىرگەن ەرلان وماروۆ.