تىڭ تاعىلىمى

ەلورداداعى ۇلتتىق اكادەميالىق كىتاپحانادا قازاقستان رەسپۋبليكاسى پرەزيدەنتىنىڭ مۇراعاتى, مادەنيەت مينيسترلىگى مەن ۇلتتىق اكادەميالىق كىتاپحانا بىرلەسە دايىنداعان «تىڭعا – 60 جىل» اتتى دەرەكتى-كىتاپتىق كورمەنىڭ تۇساۋكەسەرى ءوتتى. «تىڭ» دەگەن ءسوز اعا بۋىن وكىلدەرىنىڭ جادىندا ەڭبەك باتىرلىعى, جىگەرلىلىك, پاتريوتتىق جانە جوعارى ازاماتتىق دەگەن ۇعىمدارمەن سيپاتتالادى. قازاق­ جەرىنە كەڭەس وداعىنىڭ ءار بۇرىشىنان كەلگەن جۇزدەگەن تىڭ يگەرۋشىلەر ادام توزبەيتىن جۇمىستار جاساپ, قازاقستاندا قىسقا ۋاقىت ارالىعىندا ۇلكەن نان ءونىمى ءوندىرىلدى, جۇزدەگەن جاڭا سوۆحوزدار سالىنىپ, ولار بۇل ەڭبەك سىناعىنان ابىرويمەن وتە الدى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ استانا قالاسىندا 2004 جىلدىڭ اقپانىندا تىڭ جانە تىڭايعان جەردى يگەرۋدىڭ 50 جىلدىعىنا ارنالعان سالتاناتتى جيىندا سويلەگەن سوزىندە «سول جىلدار, قازاقستاندى ۇلكەن اگرارلىق ولكە, استىق قويماسىنا اينالدىردى. بەرەكەلىك پەن مولشىلىقتىڭ سارقىلماس كوزىنە اينالعان ال­تىن ماساق – ءبىزدىڭ ابىرويلى ءومىر­بايا­نى­مىز بولىپ تابىلادى», دەپ اتاپ ءوتتى. بۇگىنگى تاڭدا سول ەرلىك ۋاقىتتار تاريحقا ۇلاسۋدا. بۇل جايلى ەندى تەك قانا مۇراعاتتاردان جانە قاتارى ازايىپ بارا جاتقان العاشقى تىڭ يگەرۋشىلەردىڭ ەستەلىك­تەرىنەن عانا بىلە الامىز. تىڭ تۋرالى قۇجاتتار تەك قانا «باتىرلىقتى», جوعارى ءونىم تۋ­را­لى پارتيا كوميتەتتەرىنىڭ قۋانار­لىقتاي ەسەپتەرى ەمەس. بۇل تىڭ ايماقتارىنداعى ەكولوگيالىق اپات­تىلىقتىڭ شەگىنە جەتۋى, لاند­شافتى دالانىڭ جويىلۋى, ەگىنجايدىڭ لاستانۋى, توپىراقتىڭ جەل ەروزياسىنا شالدىعۋى, اگرو­تەحنيكانىڭ ساقتالماۋى, تىڭ ءداۋىرناماسىن ۇيىمداستىرۋداعى سالماقتى قاتەلىكتەر مەن جاڭىلىس ەسەپتەۋلەردىڭ جىبەرىلگەنىنىڭ كۋاسى. تىڭ جانە تىڭايعان جەرلەردى يگەرۋ بىرنەشە ۇرپاقتىڭ ءومىر تىرشىلىگىندە اسا زور ءرول اتقاردى جانە قازاقستان تاريحىندا ايرىق­شا اسەرلى بولدى. التى بولىمنەن تۇراتىن كورمەدە قازاقستان پرەزيدەنتى مۇراعاتىندا ساقتالعان قازاقستانداعى تىڭ ءجا­نە تىڭايعان جەرلەردى يگەرۋدىڭ نە­گ­ىزگى كەزەڭدەرىن بەينەلەيتىن انا­عۇرلىم قىزىقتى مۇراعات ما­­تە­ريالدارى مەن قۇجاتتارى ۇسى­نىلدى. وقىرماندار بۇل ما­تە­ريالداردىڭ كوبىن العاش رەت كورم­ەكشى. كورمەدە قۇجاتتارمەن بىرگە ۇلتتىق اكادەميالىق كىتاپ­حانا قورىنان الىنعان وسى تاقى­رىپت­ى قامتيتىن كىتاپتار, گازەت-جۋرنالدارمەن دە تانىسۋعا بولا­دى. تۇساۋكەسەردە پرەزيدەنت مۇ­ر­­ا­­عا­تىنىڭ ديرەكتورى, تەحني­كا عى­لىمدارىنىڭ دوكتورى, پرو­فەس­­سور بوريس جاپاروۆ پەن قر ۇاك باس ديرەكتورىنىڭ ورىن­با­سارى ج.شايمۇحانبەتوۆا ءسوز ءسوي­لەدى. اۋديتوريا تىڭنىڭ باس قاھارماندارى – العاشقى تىڭ يگەرۋشىلەر ۆ.مالوجاۆىي, ۆ.كازاك, م.گولبەرح, ا.كارەلينا, ۆ.مول­چانوۆا, ف.شكۋركو, ۆ.چەرنەنوك جانە تىڭعا كىتاپحاناشى رەتىندە كەل­گەن ي.داراگاندى قۇتتىقتاپ قار­سى الدى. العاشقى تىڭ يگەرۋ­شىلەر وزدەرىنىڭ داعدىلى جۇمىس كۇندەرىن, جاستىق شاقتارىن ەسكە الىپ, ءوز ومىرلەرىندەگى كىتاپتىڭ ۇلكەن ءرولىن اتاپ ايتتى. «ءبىز تىڭعا جول تارتقان شاعىن شاماداندا كىتاپ ارقاشاندا بولدى. ءبىز كىتاپ وقۋدى سۇيەتىن ەدىك. ادەبيەت تىڭعا تاسقىن بوپ قۇيىلدى. بىزگە بەلگىلى جازۋشىلار ءسابيت مۇقانوۆ, مۇحتار اۋەزوۆ ارنايى كەلگەن ەدى», دەپ اڭگىمەلەدى م.گولبەرح. قورىتىندىسىندا 1955 جىلى تۇسىرىلگەن تىڭ تۋرالى دەرەكتى فيلم كورسەتىلدى. سونداي-اق, تۇساۋكەسەرگە پرە­زي­دەنت اكىمشىلىگىنىڭ قىزمەتكەرلەرى, پارلامەنت دەپۋتاتتارى, مينيستر­لىكتەر مەن ۆەدومستۆولار وكىل­دەرى, بەلگىلى قوعام ءجا­نە مەملە­كەت قايراتكەرلەرى, ەڭ­بەك جانە سو­عىس ارداگەرلەرى, ال­عاشقى تىڭ يگە­رۋشىلەر, عالىم­دار, تاريح­شى­لار, مۇراعات, مۇراجاي جانە كىتاپحانا قىزمەتىنىڭ باسشى­لارى قاتىستى. بەرىك سادىر, «ەگەمەن قازاقستان». سۋرەتتى تۇسىرگەن ەرلان وماروۆ, «ەگەمەن قازاقستان».