شاراينا
مالايزيا اۆياكومپانياسىنىڭ «بوينگ-777» جولاۋشىلار ۇشاعىنىڭ بايلانىس جۇيەسىن قولمەن ءوشىرىپ تاستاعان. بۇل جونىندە كەشە «رەيتەر» اقپارات اگەنتتىگى حابارلادى. مالايزيا قورعانىس ءمينيسترى جانە كولىك ءمينيسترىنىڭ مىندەتىن اتقارۋشى ح.حۋسسەيننىڭ مالىمدەۋىنشە, ۇشاقتىڭ بايلانىس جۇيەسى ۇشىپ شىققاننان كەيىن 40 مينۋت وتكەندە بورتتاعى بىرەۋلەر ارقىلى وشىرىلگەن سياقتى. حۋسسەين, سونداي-اق ۇشاقتار مەن ديسپەتچەرلەر اراسىنداعى سوڭعى سوزدەر بايلانىس جۇيەسى وشىرىلگەننەن كەيىن بولعانىن ايتادى. بورتىندا 239 ادام بار ۇشاق راداردان 8 ناۋرىزدا جوعالىپ كەتكەن ەدى. قازىرگى كەزدە ۇشاقتىڭ قايدا كەتكەنى نەمەسە قايدا قونعانى جونىندە ناقتى دەرەك جوق. وپەراتسيا ءساتتى جۇزەگە اسىرىلدى
اقش تەڭىز كۇشتەرىنىڭ ارنايى ماقساتتاعى اسكەريلەرى ليۆيانىڭ ەس-سيدر پورتىنان «قاشىپ شىققان» تيەلگەن مۇناي بار «مورنينگ گلوري» تانكەرىن باسىپ الدى.
اقش قورعانىس مينيسترلىگىنىڭ ءمالىمدەۋىنشە, وپەراتسيا كەشە ەرتەڭگىسىن كيپردىڭ وڭتۇستىك-شىعىسىنداعى حالىقارالىق سۋدا جۇزەگە اسىرىلعان. وپەراتسيا كەزىندە ەشكىم زارداپ شەكپەگەن. ال وپەراتسيا ليۆيا مەن كيپر ۇكىمەتتەرىنىڭ ءوتىنىشى بويىنشا جۇزەگە اسىرىلىپتى.
«ساقتانساڭ – ساقتايدى» دەگەن وسى
چيليدە تسۋنامي قاۋىپ-قاتەرىنە بايلانىستى 100 مىڭنان استام ادام قاۋىپسىز جەرگە كوشىرىلدى. ەلدىڭ توتەنشە جاعدايلار جونىندەگى ۇلتتىق باسقارماسى وكىلىنىڭ حابارلاۋىنا قاراعاندا, مۇنداي شۇعىل شارا جەر سىلكىنىسى قاۋپىنە بايلانىستى تۋىنداپ وتىر.
وسىنىڭ الدىندا چيلي جاعالاۋىندا 7 بالدىق ءزىلزالا تىركەلگەن بولاتىن. ءزىلزالانىڭ ەپيتسەنترى يكيك قالاسىنان 60 شاقىرىمداي قاشىقتىقتا بولعان. ءبىر جاقسىسى, تسۋنامي قاتەرى تونبەدى. ايتا كەتەيىك, 2010 جىلى وسى ەلدە قۋاتى 8,8 بالدىق ءزىلزالا سالدارىنان 550-دەن استام ادام وپات بولىپ, 220 مىڭداي عيمارات قيراعان ەدى.
ميتينگكە شىققان 30 ادام ۇستالدى
بىشكەكتە قىرعىزستاننىڭ جوعارعى سوتى عيماراتىنىڭ ماڭىندا تۇتقىندالعان ەل پارلامەنتىنىڭ بۇرىنعى سپيكەرى احماتبەك كەلدىبەكوۆتى قولداۋ ميتينگىسى ءوتتى.
اكتسياعا قاتىسۋشىلار بۇلتارتپاۋ شارالارىن وزگەرتۋدى تالاپ ەتىپ, ساياساتكەردى ساياسي قۋدالاعانى ءۇشىن بيلىكتى ايىپتادى. ءبىرىنشى ماي اۋداندىق ءىىب قىزمەتكەرلەرى سانكتسيالانباعان ميتينگكە قاتىسقان 30-عا جۋىق ادامدى ۇستادى. ولارعا شەشىمدى سوت شىعاراتىن بولادى.
ەسكە سالا كەتەيىك, «اتا جۇرت» وپپوزيتسيالىق فراكتسياسىنىڭ دەپۋتاتى احماتبەك كەلدىبەكوۆ 2013 جىلعى قاراشادان باستاپ مەملەكەتتىك ۇقك تەرگەۋ وقشاۋلاعىشىندا قاماۋدا جاتىر. ول سىبايلاس جەمقورلىق پەن باسقا دا قۇقىق بۇزۋشىلىقتارى ءۇشىن ايىپتالعان. پروكۋراتۋرا دەرەكتەرى بويىنشا, ا.كەلدىبەكوۆ مەملەكەتكە سوماسى 40 ملن. سوم كولەمىندە زيان كەلتىرگەن.
ەل كونستيتۋتسياسىنا تۇزەتۋلەر ەنگىزىلەدى
وزبەكستان ەل كونستيتۋتسياسىنا تۇزەتۋلەر ەنگىزۋ ارقىلى پرەزيدەنت وكىلەتتىگىنىڭ ءبىر بولىگىن ۇكىمەت باسشىسىنا بەرۋگە جانە پارلامەنتتىڭ وكىلەتتىگىن كەڭەيتۋگە ازىرلەنۋدە.
بۇل تۇزەتۋلەر الدىمەن زاڭ شىعارۋشى ورگاننىڭ تومەنگى پالاتاسىندا قارالادى. پارلامەنت سايتىنىڭ حابارلاۋىنشا, تۇزەتۋلەر ەل پرەزيدەنتى يسلام كاريموۆتىڭ باستاماسى بويىنشا ەنگىزىلگەلى وتىر. قۇجات جوباسىندا تۇزەتۋلەر نەگىزىنەن كونستيتۋتسيانىڭ 78, 93, 98, 103 جانە 117-باپتارىنا قاتىستى بولماق.
108 ميلليون فۋنت ۇتىپ الدى
جاقىندا ۇلىبريتانيا حالقى «ەۋروميلليون» لوتەرەياسىنىڭ دجەكپوت ويىنىنا كۋا بولدى. ونىڭ كولەمى 107,9 ميلليون فۋنتتى قۇرايدى. بۇل اقشا تەك ءبىر بيلەتتى ساتىپ الۋشىعا عانا تيەسىلى بولادى.
ميلليونەر اتانۋشى 6, 24, 25, 27, 5 جانە 9 ساندارىن ءدال تاپقان ەكەن. بىراق ول ءالى ۇتىسقا يە بولعان لوتەرەياسىن ءتيىستى مەكەمەگە كورسەتپەپتى. ونىڭ قاي قالانىڭ تۇرعىنى ەكەنى دە بەلگىسىز بولىپ وتىر.
163 ميلليارد دوللار باعىتتاماق
قىتاي 2014 جىلى ەل ەكونوميكاسىن دامىتۋعا 1 تريلليون يۋانعا جۋىق (163 ميلليارد دوللار) ينۆەستيتسيا باعىتتاۋى ىقتيمال. بۇل ينۆەستيتسيا كوپتەگەن سالالاردى قامتىماق.
ۋربانيزاتسيا ەلدىڭ ەكونوميكالىق ءوسىمىن قولداۋ ءادىسىنىڭ ءبىرى بولىپ تابىلادى. جوسپار بويىنشا ول 7,5 پايىزعا جەتۋى ءتيىس. اتالعان شارالاردىڭ بارلىعى قارجى-نەسيە ساياساتىن قاتاڭداتىپ, ەكولوگيالىق قاۋىپسىزدىكتى قامتاماسىز ەتۋ ءۇشىن قولدانىلادى. بۇگىندە قىتايدا ونداعان ميلليون ادام كوشىپ-قونىپ ءجۇر. ولاردىڭ باسىم كوپشىلىگى اۋىلدىق جەرلەردەن قالالارعا جۇمىس ىزدەپ كەلگەندەر. پەكين 2020 جىلدارعا قاراي قالادا تۇراتىن ادامدار سانى 60 پايىزعا جەتەدى دەپ ەسەپتەۋدە.
ينتەرنەت ماتەريالدارى نەگىزىندە ازىرلەندى.
