جەكسەنبى, 16 ناۋرىز كۇنى استاناداعى «قازاقستان» كونتسەرت زالىندا «قازاق ارۋى-2014» رەسپۋبليكالىق بايقاۋى ءوتتى.
وسىمەن ءتورتىنشى رەت وتكىزىلىپ وتىرعان ايتۋلى بايقاۋدا ەلىمىزدىڭ ءتۇرلى وڭىرىنەن كەلگەن 21 ۇمىتكەر سىنعا ءتۇستى. قاتىسۋشىلار سۇلۋلىعىمەن قاتار, بويلارىنداعى تالانتتارىن پاش ەتىپ, حالقىمىزدىڭ داستۇرلەرىن, تاريحى مەن مادەنيەتىن جاقسى ءبىلىپ, ولاردى ارداق تۇتاتىنىن كورسەتە ءبىلدى.
بايقاۋ بىرنەشە كەزەڭنەن تۇردى. باسىندا ارۋلار وتاندىق ديزاينەرلەردىڭ قولىنان شىققان كيىمدەردى حالىق نازارىنا ۇسىنسا, ارتىنان شىعارماشىلىق جانە زياتكەرلىك قابىلەتتەرىن ورتاعا سالدى.
پرەمەر-ءمينيستردىڭ ورىنباسارى گۇلشارا ءابدىقالىقوۆا جەتەكشىلىك ەتكەن قازىلار القاسى قاتارىندا بەلگىلى تەلەجۇرگىزۋشى ايگۇل مۇكەي, وتاندىق وپەرا پريماسى نۇرجامال ۇسەنباەۆا, ديزاينەر ايدا قاۋمەنوۆا, تەاتر جانە كينو اكتەرى عاني قۇلجانوۆ, ايتىس اقىنى اينۇر تۇرسىنباەۆا, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ, «حابار» تەلەارناسىنىڭ باعدارلامالار ءوندىرىسى ديرەكتسياسىنىڭ باس پروديۋسەرى رينات كەرتاەۆ, استانا قالاسى مادەنيەت دەپارتامەنتىنىڭ باستىعى بولات ماجاعۇلوۆ پەن «قازاق ارۋى-2014» بايقاۋىنىڭ پروديۋسەرى بايان ەسەنتاەۆا بولدى.
قازىلار القاسى جارتى ساعاتتاي كەڭەس وتكىزىپ, ءوز شەشىمدەرىن جاريالادى. ءۇشىنشى ورىن ەلوردالىق گۇلمارال قاجيحانعا بەرىلدى. ال ەكىنشى ورىندى ماڭعىستاۋلىق ۇلپان نۇرمانوۆا يەلەنسە, ءبىرىنشى ورىندى شىعىس قازاقستان وبلىسىنىڭ وكىلى اياۋلىم ەرعازى جەڭىپ الدى.
قازىلار القاسىنىڭ شەشىمىمەن «قازاق ارۋى-2014» اتاعى ماڭعىستاۋ وبلىسىنان كەلگەن گۇلناز جولانوۆاعا بۇيىردى.
ايدار ورىسباەۆ,
«ەگەمەن قازاقستان».
سۋرەتتەردى تۇسىرگەن
ەرلان وماروۆ,
«ەگەمەن قازاقستان».
