ناۋرىزداعى كوشە كۇندەرى

وسكەمەندە حالىق قاھارمانى قاسىم قايسەنوۆتىڭ اتىندا كوشە بار. پارتيزان-جازۋشىنىڭ قۇرمەتىنە بەرىلگەن كوشەدە ءتول مەرەكەنى تويلاۋ جورالعىسى باستالىپ تا كەتتى. ناۋرىز قارساڭىنداعى «ءونىس» كۇنىنىڭ اياسىندا ۇيىمداستىرىلعان بۇل شاراعا كەلگەن قالا تۇرعىندارىنىڭ قاراسى قالىڭ. بيىل شىعىس وڭىرىندە ۇلىستى جەتى كۇن بويى جەتەلى جوبالارمەن جۇرت جادىنا جەتكىزۋ جوسپارلانىپ وتىرعانىن بۇعان دەيىن جازعانبىز. اتى اڭىزعا اينالعان, سوعىس جىلدارى­ن­داعى ەرلىگى ءۇشىن ۋكراينا حالقى ەرەكشە قادىر تۇتاتىن قاسىم قايسەنوۆ اتىنداعى كوشەنىڭ ءتول مەرەكەسى وسىلايشا بوساعادان ەنىپ كەلە جاتقان ناۋرىز مەرەكەسىن باستاپ بەردى. «بۇل كوشە قاسىم قايسەنوۆتىڭ قۇرمە­تىنە اتالعان!» اتتى سالتاناتتى شاراعا ءوڭىر باسشىسى بەردىبەك ساپارباەۆ تا قاتىستى. وبلىس اكىمى قاريالارمەن جۇزدەسىپ, ولاردى ناۋرىز مەرەكەسىمەن قۇتتىقتادى. باتىر بيۋستىنە گۇل شوقتارىن قويىپ, تاعزىم ەتۋدەن باستالعان مەرەكە 23 ساۋىردە ۇلان اۋدانىنىڭ ورتالىعى – قاسىم قايسەنوۆ كەنتىندە اياقتالماق. 23 ءساۋىر – اتاقتى پارتيزان-قالامگەردىڭ دۇنيەگە كەلگەن كۇنى. ءبىر اي بويى جالعاساتىن قاسىم قايسەنوۆ ايلىعىندا جاستارعا ەلىمىزدىڭ تاريحى مەن باتىر بابالارىمىزدىڭ ەرلىكتەرىن ناسيحاتتايمىز, دەدى وسكەمەن قالاسىنىڭ اكىمى تەمىربەك قاسىمجانوۆ. سونىمەن بىرگە, قاسىم اتانىڭ تۋىسقانى باعلان رايىمحانوۆ, وبلىستىق اقساقالدار القاسى توراعاسىنىڭ ورىنباسارى جاڭاباي ءاشىموۆ, قالالىق جەرگىلىكتى ءوزىن-ءوزى باسقارۋ كوميتەتى ارداگەرلەر كەڭەسىنىڭ توراعاسى يگور ليۋبيموۆ ىزگى تىلەكتەرىن ءبىلدى­رىپ, العىستارىن جەتكىزدى. جامبىل اتىنداعى وبلىستىق دراما تەاترى مەن ۇلان اۋداندىق حالىق تەاترىنىڭ شىعارماشىلىق ۇجىمدارى قاھارمان پارتيزاننىڭ ومىرىنەن سىر شەرتەتىن قويىلىمدار ۇسىندى. جيىلعان جۇرتشىلىق جاۋىنگەرلىك اسحانادان ءدام تاتىپ, كىتاپحانا قىزمەتكەرلەرى ۇيىمداستىرعان قاسىم قايسەنوۆ تۋرالى كورمەنى تاماشالادى جانە زياتكەرلىك ويىندار بايقاۋىنا قاتىستى. – جاستارىمىز قاسىم قايسەنوۆتىڭ شىعارمالارىمەن تانىس, قالامگەردىڭ ءومىر جولى تۋرالى بىلەتىنىنە دە بۇگىنگى كورمەمىز بەن ويىندارىمىز ارقىلى كوز جەتكىزدىك, – دەدى كىتاپحاناشى ءلازيپا شايماردانوۆا. دۋمان اناش, «ەگەمەن قازاقستان». وسكەمەن.