ومىرگە قۇشتار ەتكەن «جان جىلۋى»

ۇلىستىڭ ۇلى كۇنى سامارقاننىڭ كوك تاسى دا ەريدى دەسەدى. «جان جىلۋى» دا ناۋرىزدىڭ كۇنى سەكىلدى قاتقان جۇرەكتەردى ءجىبىتتى. ۇلىستىڭ ۇلى كۇنى قار استىنان بايشەشەك گۇل قىلتيادى. «جان جىلۋى» دا سول گۇل سەكىلدى جانعا جىلىلىق, قۇشتارلىق سىيلايدى. ەندەشە, «جان جىلۋىنىڭ» قايىرىمدىلىق كونتسەرتى ناۋرىزدىڭ قارساڭىندا اتالىپ ءوتۋىنىڭ ءمانى زور. سەبەبى, ۇلىستىڭ ۇلى كۇنى – ادامداردى تاتۋلاستىراتىن, قايىرىمدىلىق جاسايتىن, كومەككە مۇقتاج جاندارعا قول ۇشىن بەرەتىن ۇلىق مەرەكە. «قازاقستان» ۇلتتىق ارناسىنداعى تالاي جاننىڭ ومىرگە قۇشتارلىعىن وياتىپ, جۇرەكتەرگە جىلۋ سىيلاعان «جان جىلۋى» باعدارلاماسىنىڭ ەفيرگە شىققانىنا بيىل بەس جىل. وسىعان وراي استاناداعى «قازاقستان» ورتالىق كونتسەرت زالىندا «قازاقستان» ۇلتتىق ارناسى قايىرىمدىلىق كەشىن ۇيىمداستىردى. كونتسەرتكە باعدارلامانىڭ ارقاسىندا ءومىرى ۇلكەن وزگەرىستەرگە ۇشىراپ, كورەرمەننىڭ كوپ كومەگىن كورگەن كەيىپكەرلەر دە شاقىرىلىپتى. كەش بارىسىندا ولاردىڭ كۇردەلى تاعدىرىنان سىر شەرتەتىن بەينەكورىنىستەر كورسەتىلدى. «بەس جىلدىڭ ىشىندە «جان جىلۋى» ەفيرگە شىعارعان كەيىپكەرلەردىڭ باسىم بولىگى بۇگىندە مۇلدەم وزگەر­گەن. ايتالىق, ديدار قايىپوۆ قايى­رىمدى, جۇرەگىندە ىزگىلىك شۋاعى مول جانداردىڭ كومەگىمەن ەمدەلۋگە 7 مىڭ اقش دوللارىن جيناپ قانا قويماي, الماتى وبلىسى اكىمدىگى تاراپىنان باسپاناعا قول جەتكىزىپ, مەملەكەتتىك تەگىن پروتەزگە يە بولدى. بۇگىندە ديدار اياققا تۇرىپ, ءتىپتى ۇيلەنۋگە دە تالپىنىس جاساپ جاتقانعا ۇقسايدى. سونداي-اق, مورت سىنۋ بەر جاعى, سۇيەكتەرى بورداي ۇگىتىلىپ بارا جاتقان ءۇش جاسار ارۋجان مەن 10 جاس­تان ەندى عانا اسقان رامازان سىندى قوس مۇڭلىق تا جارىق دۇنيەدە قالۋعا دەگەن ءۇمىتتىڭ سوڭعى ساۋلەسىن وسى «جان جىلۋىنان» ىزدەپ كەلگەن ەدى. اتا-انالارى, ءتىپتى قولىنا ۇستاپ, باۋىرىنا باسۋعا قورقاتىن حالگە جەتكەن ارۋجان مەن «تىم قۇرىسا ءوزى وتىرسا عوي» دەپ ارماندايتىن راما­زاندى باعدارلامادان كورگەن جۇرت ەرىكسىز ەگىلىپ قانا قويماي, قول­دارىنان كەلگەنشە قاراجات جيناپ بەرگەن. ناتيجەسىندە, تاعدىرى ەگىز ەكەۋ دە ماسكەۋگە بارىپ ەمدەلىپ, وزدىگىنەن وتىرىپ, ءتىپتى ارۋجان جۇرە الاتىن دا حالگە جەتىپ وتىر. ايتا كەتۋ كەرەك, ارۋجانعا كومەك قولىن سوزعان «جاس وتان» جاستار قاناتى. ولار قايىرىمدىلىق كونتسەرتىن ۇيىم­داستىرىپ, التى ميلليون تەڭگە قارا­جات جيناپ بەرگەن. ال استانا قالاسى اكىمدىگى رامازانعا ەكى بولمەلى پاتەر سىيلاعان. قازىر ول ۇيدەن بولسا دا ساباق وقىپ ءجۇر. بۇدان بولەك, كەزىندە اناسى بالالار ۇيىنە ءوز قولىمەن تاپسىرعان اسقار يمانقۇلوۆ 9 جاسقا تولعاندا «جان جىلۋى» ارقىلى سارى­اعاش­تان وزىنە مەيىرىمدى اتا-انا تاپتى. راسىن­دا, وسى بەس جىلدا قانشاما ادامداردىڭ كەۋدەسىنە ءۇمىت ءدانىن سەۋىپ, ومىرگە قۇشتارلىعىن ارتتىرسا, جەكە وزىمە دەنساۋلىق پەن ءومىردىڭ قادىرىن ءتۇسىنۋدى ۇيرەتتى», دەيدى «جان جىلۋى» باعدارلاماسىنىڭ پروديۋسەرى, جۇرگىزۋشىسى اقبايان ساپارباەۆا. شىنىمەن, بۇل كونتسەرت وزگەلەردەن وزگەشەرەك بولعانى داۋسىز. ونىڭ جۇرگىزۋشىلەرى دە ەرەكشە, ولار – قولارباعا تانىلسا دا مەملەكەتتىك قىزمەتپەن بىرگە تەلەارنا جۇرگىزۋ­شىلىگىن قاتار الىپ جۇرگەن جىگەرلى جىگىت ارداق وتارباەۆ پەن الماتى وبلىستىق №1 بالالار ءۇيىنىڭ ءتار­بيە­لەنۋشىسى سامات اندرەەۆ. ال ولار­دىڭ قاسىندا «قازاقستان» ۇلت­تىق تەلەارناسىنىڭ پروديۋسەرى, تەلەجۋرناليست ەرتاي ءنۇسىپجانوۆ پەن «جان جىلۋى» باعدارلاماسىنىڭ جۇرگىزۋشىسى اقبايان ساپارباەۆا بولدى. كەشكە سونداي-اق, دوسىمجان تاڭاتاروۆ, گۇلنۇر ورازىمبەتوۆا, باقىت شاداەۆا, ارداق بالاجانوۆا, جاڭاباي وتەگەن ۇلى, مايرا ءىلياسوۆا سىندى قازاق ەسترادا جۇلدىزدارىمەن قاتار مۇمكىندىگى شەكتەۋلى جانداردان قۇرالعان «قولار­باداعى بيشىلەر» توبى مەن «شاشۋ» وتباسىلىق ءانسامبلى دە ونەر كورسەتتى. ال كونتسەرتتەن تۇسكەن قارجىمەن اباي­سىزدا مارگانتسوۆكا ۇنتاعىن جۇتىپ قويىپ, وڭەشى كۇيىپ قالعان ءتورت جاسار الماتىلىق اسەت جيەنبەكوۆكە كومەك كورسەتىلمەك. دينارا بىتىكوۆا, «ەگەمەن قازاقستان». سۋرەتتى تۇسىرگەن  ەرلان وماروۆ, «ەگەمەن قازاقستان».