استانا تۇبىندە جۇك كولىگى مەن اۆتوبۋس سوقتىعىستى

بۇگىن, 17 ناۋرىز كۇنى استاناعا ىرگەلەس ورنالاسقان قوسشى ەلدى مەكەنى جولىندا اۋىر جۇك كولىگى مەن جولاۋشىلار اۆتوبۋسى سوقتىعىسىپ, بىرنەشە ادام زارداپ شەكتى. بۇل تۋرالى Egemen.kz ءتىلشىسى حابارلادى. تاڭەرتەڭگى ساعات 7:20-دا قوسشى ەلدى مەكەنىنەن استانا قالاسىنا باعىت العان جولاۋشىلار اۆتوبۋسى مەن قارسى باعىتتا كەلە جاتقان اۋىر جۇك كولىگى سوقتىعىسىپ, 1 ساعاتتاي ۋاقىت بويى كولىك كەپتەلىسى ورىن الدى. بەيرەسمي دەرەك كوزىنە جۇگىنسەك, وسى جول اپاتىنان 11 ادام ءارتۇرلى دەنە جاراقاتىن العان. ال 2 ادامنىڭ جاعدايى  ناشار كورىنەدى. كۇن سايىن قوسشى ەلدى مەكەنىنە استانا قالاسى باعىتىنان اۋىر جۇك كولىكتەرى بىرىنەن سوڭ ءبىرى ءوتىپ جاتادى. ءارى وسى جول جيەگىندەگى باعدارشام  بىردە ىستەپ بىردە مۇلدە ءسونىپ تۇرادى. قوسشىدان بەرى لەسنايا پوليانا دەپ اتالاتىن ايماق بار. وندا كوپقاباتتى 20-دان اسا تۇرعىن ءۇي ورنالاسقان. وسى ەكى ارالىققا قاتىنايتىن جولاۋشىلار اۆتوبۋسى قاتارى دا جىل ساناپ ارتىپ كەلەدى. ونىڭ ۇستىنە مۇنداعى تۇرعىنداردىڭ باسىم بولىگى كولىگىمەن قالاعا قاتىناپ جۇمىس ىستەيدى. ويتكەنى, بۇل جەردە مەكتەپ پەن بالاباقشا جانە دارىگەرلىك-امبۋلاتوريالىق پۋنكت عانا بار. ءامىرحان الماعانبەتوۆ. دەرەككوز: Egemen.kz. فوتو: Egemen.kz.