فۋتبول: «قايرات» ءوز الاڭىندا «اتىراۋدان» جەڭىلدى

بۇگىن, 15 ناۋرىز كۇنى فۋتبولدان قازاقستان پرەمەر-ليگاسى چەمپيوناتىنىڭ ءبىرىنشى تۋرى وينالدى. ول الماتىدا جەرگىلىكتى «قايرات» جانە «اتىراۋ» كوماندالارى اراسىنداعى ويىنمەن اياقتالدى. بۇل تۋرالى Egemen.kz حابارلادى. كەزدەسۋ 1:0 ەسەبىمەن قوناقتاردىڭ پايداسىنا شەشىلدى. ماتچتاعى جالعىز گولدى 31-مينۋتتا ۋگاندادان شىققان 24 جاسار گەرمانيالىق فۋتبولشى ساۆيو نسەرەكو سالدى. ەكىنشى تايمدا ۆلاديمير ۆايسستىڭ جىگىتتەرى ويىن تىزگىنىن قولدارىنا الدى. بىراق مۇمكىندىكتەرىن جۇزەگە اسىرا العان جوق. بۇعان كەرىسىنشە قاقپاشى اندرەي شابانوۆتىڭ سەنىمدى ويىنىنا ارقا سۇيەگەن اتىراۋلىقتار الاڭ يەلەرىنىڭ ەكپىندەرىن ۇدايى باسىپ وتىردى. وسىلايشا «قايرات» قاتارىنان ەكىنشى جىل ءوز الاڭىنداعى ستارتتىق ويىندا جەڭىسكە جەتە المادى. بۇدان بۇرىن قوستانايدىڭ «توبىلى» ءوز الاڭىندا سەمەيدىڭ «سپارتاگىن» 2:1 ەتىپ ۇتسا, پاۆلوداردا «ەرتىس» قاراعاندىنىڭ «شاحتەرىن» 1:0  ەسەبىمەن جەڭدى. ال تارازدا جەرگىلىكتى كوماندانى «اقتوبە» 2:0 ەتىپ تىزە بۇكتىرسە, قىزىلوردادا «قايسار» شىمكەنتتىڭ «ورداباسى» ۇجىمىنان 1:0 ەسەبىمەن باسىم ءتۇستى. ال استانادا ەلوردا اتتاس كوماندا مەن تالدىقورعاننىڭ «جەتىسۋ» ۇجىمدارى اراسىنداعى ويىندا ەسەپ اشىلمادى. تاعى ءبىر دەرەك, چەمپيونات باستالار الدىندا عانا «ەرتىستىڭ» تىزگىنىن تارمو ريۋيۋتلي ەسىمدى ەستون مامانى ۇستاعان ەدى. ول 1954 جىلى تۋعان. جاتتىقتىرۋشىلىق تاجىريبەسى جەتكىلىكتى. بۇعان دەيىن ەستونيانىڭ «تۋلەۆيك» (ۆيلياندي), «فلورا» (تاللين), «لەۆاديا» (تاللين), «كالەۆ» (تاللين) سەكىلدى كوماندالارىن جاتتىقتىرعان. تاعى 6 جىل ەلدىڭ ۇلتتىق قۇراماسىنىڭ باس باپكەرى بولعان. دامير قوجامقۇل. دەرەككوز: Egemen.kz. فوتو: Vesti.kz.