باحارەۆ ناستيانى ولتىرگەنىن تاعى دا مويىنداماي جاتىر

بۇعان دەيىن پاۆلودار وبلىسى اقسۋ اۋدانىندا 14 جاسار وقۋشى قىز ناستيا شاريپوۆانى ولتىرگەنىن راستاپ قويعان ۆيكتور باحارەۆ تاعى دا بۇل مويىنداۋدان باس تارتتى. بۇل تۋرالى Remarka.kz تىلشىسىنە سوتتالۋشىنىڭ اپكەسى انتونينا زۆەرەۆا مالىمدەدى. پاۆلودار قالالىق سوتىندا ەۆگەنەۆكا سەلوسىنىڭ تۇرعىنى اناستاسيا شاريپوۆانى زورلاپ, ءولتىردى دەگەن ايىپ تاعىلعان وسى سەلونىڭ تاعى ءبىر تۇرعىنى ۆيكتور باحارەۆتىڭ ءىسىن جابىق رەجيمدە قاراعان سوت ءماجىلىسى ودان ءارى جالعاسىپ جاتىر. سوتتالۋشىنىڭ اپكەسى ا.زۆەرەۆانىڭ ايتۋىنشا, ۆيكتور سوتتا تاعى دا ءوزىنىڭ بۇرىن بەرگەن كورسەتۋلەرىنەن باس تارتقان. بۇعان ول تەرگەۋ كەزىندە وزىنە قۇقىق قورعاۋ ورگاندارى قىزمەتكەرلەرىنىڭ قىسىم كورسەتكەنىمەن ءتۇسىندىردى. بۇدان باسقا, سوتتالۋشىنىڭ ادۆوكاتى باۋىرجان ازانوۆتىڭ مالىمەتىنشە, قورعاۋشى جاعى تاعى دا سۋديادان باس تارتاتىنىن سوتقا جازباشا تۇردە تاپسىرعان. ول مۇنى القابيلەردى تاڭداۋدا ايتارلىقتاي ءتارتىپ بۇزۋشىلىقتاردىڭ ورىن العانىمەن بايلانىستىردى. ەسكە سالا كەتەيىك, ناستيا شاريپوۆا 2013 جىلعى 21 قازان كۇنى مەكتەپتەن شىعىپ, 500 مەتر جەردەگى ۇيىنە بارا جاتقان جولدا ءۇشتى-كۇيلى جوعالىپ كەتكەن. ونىڭ ءمايىتى تەك ارادا ەكى اپتا وتكەننەن كەيىن كەزدەيسوق تابىلدى. وسى ۋاقىتقا دەيىن بۇل ماڭايدى تۇگەل شارلاپ شىققان پوليتسەيلەر مەن اۋىلداستار ونى كورمەگەن ەدى. سوڭىندا بۇل ءىستىڭ بىردەن-ءبىر كۇدىكتىسى رەتىندە قىزدىڭ 20 جاسار كورشىسى ۆيكتور باحارەۆ ۇستالدى. ول قاماۋعا الىنعان بويدا بۇل قىلمىستى ءوزىنىڭ جاساعىنان مويىنداپ شىقتى. كەيىن مۇنى سوت-مەديتسينالىق ساراپتاماسى راستاپ بەرگەننەن كەيىن دە قازا تاپقان قىزدىڭ اتا-اناسى قىلمىستى ۆيكتوردىڭ جاساعانىنا سەنبەي قويدى. سوعان قاراماستان, ولار وزدەرىنە قايعى جامىلدىرعان سەلودان سول كەزدە شۇعىل كوشىپ كەتتى. قورعاۋشىلار جاعى بولسا, ۆيكتوردىڭ بۇرىن بەرگەن كورسەتۋلەرىنەن باس تارتاتىنى تۋرالى تاپسىرىس بەرىپ, سوتتىڭ قۇرامىن وزگەرتۋدى تالاپ ەتتى. الايدا, بۇل كەپىلدەمەنى دە, سوت پروتسەسىن ەلىمىزدىڭ باسقا ايماعىندا وتكىزۋ جونىندەگى ءوتىنىشتى دە جوعارى ينستانتسيا قابىل المادى. قۇرىش نۇرىمبەت. مانبە: Remarka.kz.