قىزىلوردا: ءاز ناۋرىز مەرەكەسىنە دايىندىق باستالىپ كەتتى

قىزىلوردا وبلىسىنىڭ قازالى اۋدانىندا ۇلىستىڭ ۇلى كۇنىنە ارنالعان مەرەكەلىك شارالار باستالىپ كەتتى. بۇل تۋرالى قازالى اۋدانى اكىمدىگىنىڭ ءباسپاسوز قىزمەتى حابارلادى. اتالعان ءوڭىر تۋرالى «قازىنالى قازالى-ورتايماعان قازانى» دەگەن قاناتتى ءسوز بار. تاريحىن زەردەلەگەن ازامات بۇل ايتىلعاننىڭ بەكەر ەمەستىگىن بىردەن اڭعارادى. وسىنداي ايتۋلى جەردىڭ ازاماتتارى اعا-اپالارىنىڭ ەلەۋلى ەڭبەگىن  ەسكەرۋسىز قالدىرعان ەمەس. ماسەلەن, بەلگىلى تەاتر سىنشىسى اشىربەك سىعاي «قازاق ونەرىنىڭ اق جەلكەنىنە» تەڭەگەن ءسابيرا مايقانوۆانىڭ 100 جىلدىق مەرەيتويىن اتاپ ءوتتى. شارا اياسىندا جاستاردىڭ شىعارماشىلىعىنا باعا بەرىلىپ, ۇزدىكتەرىنە باعالى سىيلىقتار تابىس ەتىلدى. وسى رۋحاني كەشتىڭ ءىزىن الا قازالى اۋدانى ناۋرىز مەرەكەسىن لايىقتى وتكىزۋ قامىنا كىرىستى. اۋدان اكىمى باحىت جاحانوۆتىڭ تاپسىرماسىمەن, ورتالىق الاڭعا ەتنو اۋىل ورنالاستىرىلاتىن بولدى. بۇل جەردەن ۇلتتىق زەرگەرلىك بۇيىمدار ورىن الادى. قازىر اۋدانداعى بارلىق مەكەمەلەر تازالىق ايلىعىنا ۇيىمشىلدىقپەن اتسالىسۋدا. ويتكەنى, ءاز ناۋرىز  كىرشىكسىز كوڭىل مەن قورشاعان ورتانىڭ تازا بولۋىنان ءنار الادى. ونىڭ قۇرمەتىنە ەرتەدە اعاش پەن گۇل ەگىلگەن. ءبىر-بىرىنە ادامدار جىلى لەبىزىن ءبىلدىرىپ, قايرىمدىلىق ىستەر جاساعان. وسى سوڭعى ايتىلعاندى جەرگىلىكتى بيلىك وسى ناۋرىز مەرەكەسى كۇنى تاعى قولعا العالى وتىر. «تاريحى تەرەڭ قازالى اۋدانىندا ناۋرىز مەرەكەسىنە دايىندىق جۇمىستارى باستالىپ كەتتى. ونى ويداعىداي وتكىزۋ ءۇشىن ءاربىر مەكەمە ءوز اينالاسىنىڭ تازالىعىن رەتكە كەلتىرۋ ۇستىندە. مەرەكە كۇنى قايىرىمدىلىق شاراسى وتكىزىلىپ, جۇرتشىلىققا تەاترلاندىرىلعان قويىلىم تارتۋ ەتىلەدى», - دەلىنگەن حابارلامادا. ءامىرحان الماعانبەتوۆ. دەرەككوز: قازالى اۋدانى اكىمدىگىنىڭ ءباسپاسوز قىزمەتى. فوتو: i-news.kz.