بۇدان بىرنەشە كۇن بۇرىن وڭتۇستىك قىتاي تەڭىزى ۇستىندە ءۇشتى-كۇيلى جوعالىپ كەتكەن مالايزيا اۋە كومپانياسىنىڭ اۆيالاينەرى ەندى ءۇندى مۇحيتى اكۆاتورياسىنان ىزدەستىرىلەتىن بولىپ وتىر. بۇل تۋرالى «ينتەرفاكس» حابارلادى.
كەشە, 14 ناۋرىز كۇنى تاڭەرتەڭ سپۋتنيكتەرگە جوعالىپ كەتكەن Boeing-777-200 ۇشاعىنىڭ بورتىنداعى دىبىس ءيمپۋلسىن الۋدىڭ ورايى كەلدى. اۋە اسكەري كۇشتەرىنىڭ مالىمەتتەرىنشە, سيگنال لاينەر ديسپەتچەرلەر رادارىنان جوعالىپ كەتكەسىن بەس ساعاتتان كەيىن تىركەلگەن. ول كەزدە ۇشاق «قالىپتى» بيىكتىكتە بارا جاتقانىن, ال اۋە كەمەسىنىڭ كورسەتكىشتەرى بارلىق تالاپتارعا ساي بولعانىن ايتادى ساراپشىلار.
بۇعان دەيىن باق بەتتەرىندە ۇشاقتىڭ جوعالىپ كەتكەننەن كەيىن 4 ساعاتقا جۋىق ۋاقىت اۋەدە جۇرگەنى جايىندا اقپار تاراتىلعان ەدى. راس, مالايزياداعىلار بۇل اقپاردىڭ «ءدال» ەمەس ەكەنىن دە العا تارتۋدا. سونداي-اق ديسپەتچەرلەردىڭ ۇشاقتى باقىلاپ وتىرعان جۇيەلەرى بىرىنەن كەيىن ءبىرى ىستەن شىعا باستاعانى دا باياندالعان. مۇنىڭ تەحنيكالىق اقاۋلىق بولعان-بولماعانى ازىرگە بەلگىسىز. ساراپشىلار وسىعان وراي جۇيەدە ولقىلىقتار ورىن العان كەزدە ونىڭ دومينو پرينتسيپىمەن ىستەن شىعاتىنىن ايتادى.
ەسكە سالا كەتەيىك, بورتىندا 239 جولاۋشى بار مالايزيا اۆيالاينەرى ناۋرىزدىڭ 7-سىنەن 8-ىنە قاراعان ءتۇنى جوعالىپ كەتكەن بولاتىن. ۇشاق اۋەجايدان ۇشىپ شىققاننان كەيىن شامامەن ەكى ساعاتتان سوڭ راداردىڭ باقىلاۋىنان شىعىپ كەتىپ, ءبىرجولا جوق بولىپ كەتتى. بولجام بويىنشا بۇل كەزدە لاينەر وڭتۇستىك قىتاي تەڭىزى ۇستىندە ۇشىپ بارا جاتۋى ءتيىس ەدى. سول كەزدە ونىڭ كەلگەن جاعىنا, ياعني كۋالا-لۋمپۋرعا قاراي كىلت بۇرىلعانى دا بەلگىلى. بىراق سودان كەيىن ونى كورگەن دە, حابارىن ەستىگەن دە ەشكىم جوق. كەيىن تەك بۇل ۇشاققا وزگە بىرەۋلەردىڭ پاسپورتتارىن ۇرلاپ العان ەكى ادامنىڭ وتىرعانى بەلگىلى بولدى. ولار ۇشاققا وتىرار كەزدەگى تىركەۋدەن دە قاتار ءوتىپتى.
سودان بەرى ونداعان ەلدىڭ 40-تان اسا ۇشاعى مەن 40-قا جۋىق كەمەسى اپات ورىن الۋى مۇمكىن دەگەن بولدامدى اۋداندى ەرسىلى-قارسىلى شارلاپ جاتىر. الايدا, ۇشاقتان ەش حابار شىقپادى. ەندى ونىڭ ءۇندىستان اۋماعىنان اسىپ, پاكستان جەرىنەن ءوتىپ, ءۇندى مۇحيتىنىڭ ۇستىنە دەيىن جەتكەنى ايتىلۋدا. ولاي بولسا, ۇشاق قۋعىنمەن الىپ كەتىلگەن بە؟ مۇنىڭ ءبارى قازىر جۇمباق قالپىندا قالىپ تۇر.
وسى جۇمباقتى شەشۋ ءۇشىن ىزدەۋشىلەر نازارلارىن ءۇندى مۇحيتىنىڭ اكۆاتورياسىنا قاراي اۋدارا باستادى.
مۇرات ايتقوجا.
دەرەككوز: ينتەرفاكس.
فوتو: Associated Press.
