قازاقستاندىقتار ناۋرىز مەرەكەسىندە بەس كۇن دەمالادى

قازاقستاندا ناۋرىز مەرەكەسىنىڭ دەمالىس كۇندەرى بەس كۇنگە ۇلاسادى. مەرەكە كۇندەرى 2010 جىلى بەلگىلەنگەن تارتىپكە سايكەس ناۋرىزدىڭ 21-نەن 23-ىنە دەيىن سوزىلسا, تاعى ەكى كۇن سەنبى جانە جەكسەنبىنىڭ ەسەبىنەن تولىعادى. بۇل تۋرالى Headline.kz  حابارلادى. سونىمەن, قازاقستاندىقتار 2014 جىلى 21- 25 ناۋرىز (جۇما, سەنبى, جەكسەنبى, دۇيسەنبى, سەيسەنبى)  ارالىعىنداعى 5 كۇندى دەمالىسپەن وتكىزەدى. بۇۇ-نىڭ 2010 جىلى قابىلداعان قارارى بويىنشا 21 ناۋرىز كۇنى حالىقارالىق ناۋرىز مەيرامى بولىپ تانىلعان. سوندىقتان بۇۇ وسى ۇيىمعا مۇشە مەملەكەتتەردى ەجەلدەن كەلە جاتقان وسى مەيرامدى كەڭىنەن تاراتۋعا اتسالىسۋعا شاقىرادى. ناۋرىز مەيرامى – قازاقستاندا كوكتەمگى جاڭعىرۋ مەرەكەسى. ول شىعىس حالىقتارىندا مۇسىلماندىق قابىلدانعانعا دەيىن كوپ بۇرىن پايدا بولعان. سوندىقتان وندا ءدىني سالت-داستۇرلەر مەن ۇردىستەر جوق. شىعىس كۇنتىزبەسى بويىنشا ناۋرىز – كوكتەمگى كۇن مەن ءتۇننىڭ تەڭەسۋىمەن بىرگە كەلەتىن جاڭا جىلدىڭ باسى. ەرتەدە جۇرت ناۋرىزدىڭ كەلەر الدىندا ءوز ۇيلەرى مەن شارۋالارىن تۇگەل تارتىپكە كەلتىرىپ, مەيرام قۇرمەتىنە اعاش پەن گۇل ەككەن. سەبەبى, ءاز ناۋرىز تازا ۇيدە تۇراتىن جاقسى ادامدارعا كەلەدى, سوندىقتان بۇل ادامدار اۋرۋ-سىرقاۋدان, ساتسىزدىكتەر مەن كەلەڭسىزدىكتەردەن امان بولادى دەپ سانالعان. ۇلىستىڭ ۇلى كۇنى مەرەكەسى جىلداعى ءداستۇر بويىنشا قازاقستاننىڭ بارلىق ايماقتارىندا كەڭ كولەمدە, جوعارى كوڭىل كۇيمەن اتاپ وتىلەدى. ول, ماسەلەن, وڭتۇستىك قازاقستان وبلىسىندا اتاۋلى 9 كۇنگە سوزىلسا, شىعىس قازاقستان ءوڭىرىنىڭ جۇرتشىلىعى 7 كۇندى وسىلاي وتكىزۋگە شەشىم قابىلداپ وتىر. ناۋرىز كۇندەرى ءان مەن كۇيگە كوپتەپ ورىن بەرىلەدى, ءتۇرلى ۇلتتىق ويىندار وينالىپ, سپورت جارىستارى سورەدەن شىعادى, سان قيلى كونكۋرستار وتكىزىلىپ, جارمەڭكەلەر قاناتىن جايادى. بۇل كۇنى, البەتتە, جۇرت ۇيلەرىنىڭ ماڭى مەن قوعامدىق ورىندارعا, ساياباقتار مەن كوشەلەرگە اعاش ەگەدى. مۇرات ايتقوجا. دەرەككوز: Headline.kz . فوتو: Headline.kz .