جىلىنا ەكى رەت ءونىم الادى

كۇزدىك بيداي ەگىپ, ونى جازدا ورىپ الا سالىسىمەن ورنىنا ءسابىز ەگىپ تاستاپ, كۇزدە مول ءونىم جيناپ الاتىن جانكەشتىلىكتى ءسىز كوردىڭىز بە؟ ءبىر جىلدا ەگىستىكتەن ەكى رەت ءونىم الىپ, جەردى ءتيىمدى پايدالانۋدىڭ بۇل تاجىريبەسى سايرام اۋدانىندا بۇگىندە جاڭالىق ەمەس. سودان بولار, حالقى كوپ, شەتىنەن ەڭبەكقور بۇل اۋداندا  «جۇمىس تاپپادىم, جۇمىس جوق» دەگەن اڭگىمە كوتەرىلمەيدى. بۇل جاقتا جۇمىس ەمەس, جەر سۇراپ كەلەتىندەر كوپ. ەندى مىنە, سايرامدىقتار جىلىجايدى كوبەيتىپ, ەكى رەت ءونىم الۋدى كەڭىنەن قولعا الۋدا. وتكەن اپتادا سايرام اۋدا­نىن­داعى «ف. يفتيحاري» جەكە كاسىپ­كەرلىگىنىڭ جىلىجاي كەشە­نىنىڭ قۇرىلىسىمەن تانىسىپ قايت­تىق. وسى شارۋاشىلىقتىڭ ءىس باس­قارۋشىسى كامال قالدا­روۆتىڭ ايتۋىنا قاراعاندا, جىلى­جاي قۇرىلىسى 1 جىل بۇرىن باستالعان ەكەن. جىلىجاي جابدىقتارىنىڭ ءبارى يزرايل ەلىنەن جەتكىزىلگەن.  بارلىق تەتىك تەك كومپيۋتەر ارقىلى جۇمىس ىستەيدى. ەگەر كەنەتتەن اۋا رايى بۇزىلاتىن بولسا, تەرەزەلەر اۆتوماتتى تۇردە ءوزى جابىلادى. جوبا ۇدەمەلى يندۋستريالىق-يننوۆاتسيالىق دامۋ مەملە­كەتتىك باعدارلاماسىنىڭ يندۋس­تريالاندىرۋ كارتاسى اياسىندا جۇزەگە اسۋدا. قۇنى 488,9 ملن. تەڭگەنى قۇراپ, 2 گەكتار اۋماقتى الىپ جاتقان بۇل جىلىجايدا جىلىنا 800 توننا قيار, قىزاناق وسىرىلەتىن بولادى. تاعى ءبىر ايتارى, جىلىجاي كوشەتتى سىرتتان المايدى, وزدەرىندە وسىرەدى. «جۇمىسشىلاردىڭ ءبا­رى جەرگىلىكتى تۇرعىندار. گول­­لان­ديالىق ماماندار ولار­عا شەتەلدىك تەحنولوگيانى مەڭگەرۋدىڭ قىر-سىرىن ءۇي­رەت­تى. قازىرگى تاڭدا 20 ادامدى جۇمىسپەن قامتاماسىز ەتىپ وتىر­مىز. العاشقى ءونىمدى ءساۋىر ايىنىڭ ورتاسىندا جينايمىز. جىلىجايدان جىلىنا 2 مارتە ءونىم الىنادى. جۇمىستى 1 عانا وپەراتور باقىلاپ, تەتىك­تەردى قوسىپ-ءوشىرىپ وتىرادى. بو­لاشاقتا ءونىمدى الدىمەن جەر­گىلىكتى بازارلارعا تاراتامىز. سونداي-اق, قازىردىڭ وزىندە رەسەي, الماتى, استانادان, باسقا دا وبلىستاردان تاپسىرىستار ءتۇسىپ جاتىر», دەيدى كامال قالداروۆ. ياعني بۇل كاسىپورىن قىس مەز­گىلىندە قىزاناق باعاسىن تۇراق­تى قالپىندا ۇستاپ تۇرۋعا ءمۇم­كىندىك بەرىپ, ءوڭىردىڭ ازىق-ت ۇلىك قاۋىپسىزدىگىنە سەپتىگىن تيگىزەتىنى انىق. جوبا تولىعىمەن «قازاگروقارجى» اق تاراپىنان قارجىلاندىرىلىپ, «بيز­نەس­تىڭ جول كارتاسى-2020» باع­دار­لاماسى اياسىندا ينجە­نەرلىك-كوممۋنيكاتسيالىق ين­فراقۇرىلىممەن قامتىلعان. جالپى العاندا, بۇگىندە سايرام اۋدانىندا يندۋستريالاندىرۋ كارتاسى اياسىندا 7 جوبا ىسكە اسىرىلۋدا. ال, وبلىس بويىنشا 155,0 گەكتارعا قوسىمشا جىلىجايلار سالىنىپ, جالپى كولەمى 720,0 گەكتارعا جەتتى. وسى جىلىجايلار ەسەبىنەن وتكەن جىلى 150 مىڭ توننا كوكونىس ءونىمى ءوندىرىلدى. ورالحان ءداۋىت, «ەگەمەن قازاقستان». وڭتۇستىك قازاقستان وبلىسى, سايرام اۋدانى. سۋرەتتەردى تۇسىرگەن ارمان ابدىراش ۇلى.