پارلامەنت • 19 قاڭتار، 2022

ءماجىلىس ەلەكتر ەنەرگياسىنا قاتىستى زاڭ جوباسىن ماقۇلدادى

112 رەت كورسەتىلدى

پارلامەنت ءماجىلىسىنىڭ جالپى وتىرىسىندا «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا (ەۋرازيالىق ەكونوميكالىق وداقتىڭ ورتاق ەلەكتر ەنەرگەتيكالىق نارىعىن قالىپتاستىرۋ بولىگىندە) وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى ماقۇلداندى، دەپ حابارلايدى Egemen.kz.

حاتتاماعا 2019 جىلعى 29 مامىردا نۇر-سۇلتاندا قول قويىلدى. «ەۋرازيالىق ەكونوميكالىق وداقتىڭ ورتاق ەلەكتر ەنەرگەتيكالىق نارىعىن ارمەنيا، بەلارۋس، قازاقستان، قىرعىزستان جانە رەسەيدىڭ ۇلتتىق ەلەكتر ەنەرگياسى نارىقتارىن ينتەگراتسيالاۋ جولىمەن قالىپتاستىرۋ جوسپارلانۋدا»، دەدى قر ەنەرگەتيكا ءمينيسترى بولات اقشولاقوۆ.

اتالعان مىندەتتى جوعارى ەكونوميكالىق كەڭەستىڭ شەشىمدەرىمەن ىسكە اسىرۋ ءۇشىن: - 2015 جىلعى 8 مامىردا ەاەو-نىڭ ورتاق ەلەكتر ەنەرگەتيكالىق نارىعىن قالىپتاستىرۋ تۇجىرىمداماسى بەكىتىلدى.

تۇجىرىمداما ەاەو ورتاق ەلەكتر ەنەرگەتيكالىق نارىعىنىڭ ماقساتتارى مەن مىندەتتەرىن، ونىڭ نىسانالى مودەلىن، باسقارۋ قۇرىلىمدارىن، نارىق سۋبەكتىلەرىنىڭ ءوزارا ءىس-قيمىل تەتىكتەرىن، رەتتەۋدىڭ نىساندارى مەن ادىستەرىن ايقىندايدى، سونداي-اق نارىقتى قالىپتاستىرۋ كەزەڭدەرىن قامتيدى.

- 2016 جىلعى 26 جەلتوقساندا ەاەو-نىڭ ورتاق ەلەكتر ەنەرگەتيكالىق نارىعىن قالىپتاستىرۋ باعدارلاماسى بەكىتىلدى. باعدارلاما ۇيىمداستىرۋشىلىق، زاڭنامالىق جانە تەحنولوگيالىق ءىس-شارالار كەشەنىن، ونىڭ ىشىندە جەدەل كەلىسىمشارتتار بويىنشا جانە ءبىر تاۋلىككە العا ورتاق نارىقتا ساۋدانىڭ ەلەكتروندىق جۇيەسىن، اقپارات الماسۋ جۇيەسىن ازىرلەۋ جونىندەگى ءىس-شارالاردى قامتيدى، سونداي-اق ورتاق ەلەكتر ەنەرگەتيكالىق نارىقتى رەتتەيتىن اكتىلەر جۇيەسىن دايىنداۋدى كوزدەيدى.

- 2019 جىلعى 29 مامىردا جوعارى كەڭەس 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا وزگەرىستەر ەنگىزۋ تۋرالى حاتتاما نىسانىندا ەاەو-نىڭ ورتاق ەلەكتر ەنەرگەتيكالىق نارىعىن قالىپتاستىرۋ تۋرالى حالىقارالىق شارتقا قول قويدى;

- 2019 جىلعى 20 جەلتوقساندا ەاەو-نىڭ ورتاق ەلەكتر ەنەرگەتيكالىق نارىعىن قالىپتاستىرۋ جونىندەگى ءىس-شارالار جوسپارى بەكىتىلدى. «جوسپاردا حاتتامادا كوزدەلگەن ەاەو-نىڭ ورتاق ەلەكتر ەنەرگەتيكالىق نارىعىن قالىپتاستىرۋعا باعىتتالعان قاعيدالاردى بەكىتۋ جانە كۇشىنە ەنگىزۋ مەرزىمدەرى بەلگىلەنگەن. حاتتامامەن ەاەو-نىڭ ورتاق ەلەكتر ەنەرگەتيكالىق نارىعىن قالىپتاستىرۋ، ونىڭ جۇمىس ىستەۋ جانە دامۋ نەگىزدەرى بويىنشا ناقتىلاۋلار ەنگىزىلدى. ەاەو-نىڭ ورتاق ەلەكتر ەنەرگەتيكالىق نارىعىنىڭ جۇمىس ىستەۋ قاعيدالارىمەن رەتتەلەتىن سالالار بەلگىلەنەدى. ۇلتتىق نارىقتاردىڭ ەرەكشەلىكتەرىن ەسكەرە وتىرىپ،

تاراپتار ەاەو-نىڭ ورتاق نارىعىن قالىپتاستىرۋ كەزىندە قولدانىستاعى ۇلتتىق ەلەكتر ەنەرگەتيكالىق نارىقتاردى، ونىڭ ىشىندە قۋات نارىقتارىن ساقتاۋ جونىندە كەلىسىمگە قول جەتكىزدى»، دەدى مينيستر.

حاتتامانىڭ II ءبولىمىنىڭ 4-تارماعىندا ەاەو-نىڭ ورتاق ەلەكتر ەنەرگەتيكالىق نارىعىن قالىپتاستىرۋ، ونىڭ جۇمىس ىستەۋى جانە دامۋى قاعيداتتارى كوزدەلگەن:

1) تەڭ قۇقىلىق، ءوزارا تيىمدىلىك جانە مۇشە مەملەكەتتەردىڭ كەز كەلگەنىنە ەكونوميكالىق زالال كەلتىرمەۋ نەگىزىندەگى ىنتىماقتاستىق;

2) ەلەكتر ەنەرگياسىن وندىرۋشىلەر مەن تۇتىنۋشىلاردىڭ ەكونوميكالىق مۇددەلەرىنىڭ تەڭگەرىمىن ساقتاۋ;

3) نارىقتىق قاتىناستارعا جانە ادال باسەكەلەستىككە نەگىزدەلگەن تەتىكتەردى باسىم پايدالانۋ;

4) ەلەكتر ەنەرگەتيكاسى سالاسىنداعى تابيعي مونوپوليالار سۋبەكتىلەرىنىڭ كورسەتىلەتىن قىزمەتتەرىنە كەدەرگىسىز قول جەتكىزۋدى قامتاماسىز ەتۋ;

5) مۇشە مەملەكەتتەردىڭ ەنەرگەتيكالىق قاۋىپسىزدىگىن ەسكەرە وتىرىپ، مۇشە مەملەكەتتەر سۋبەكتىلەرى اراسىندا ەلەكتر ەنەرگياسىنىڭ ساۋداسىن جۇزەگە اسىرۋ.

«ەاەو-نىڭ ورتاق نارىعىن قالىپتاستىرۋ مۇشە مەملەكەتتەردىڭ شارۋاشىلىق جۇرگىزۋشى سۋبەكتىلەرىنە جاسالعان شارتتار اياسىندا ءوزارا ەلەكتر ەنەرگياسى ساۋداسىن جۇزەگە اسىرۋعا مۇمكىندىك بەرەدى. سونداي-اق ەلەكتر ەنەرگياسىن ناقتى جەتكىزۋدىڭ جوسپارلى ماندەردەن ساعاتتىق اۋىتقۋلارىن رەتتەۋ ءۇشىن تەتىك قۇرۋ كوزدەلەدى، بۇل كەلىسىلگەن كەستەلەردى ساقتاۋ ءۇشىن جاۋاپكەرشىلىكتى ارتتىرادى. ەلەكتر ەنەرگياسى نارىعىن قۇرۋدىڭ اسەرى ءوندىرۋشى جانە بەرۋشى قۋاتتاردى پايدالانۋ تيىمدىلىگىن ارتتىرۋدان، ەلەكتر ەنەرگياسىنىڭ ءوزارا جانە سىرتقى ساۋداسى كولەمىنىڭ وسۋىنەن كورىنەدى. سونداي-اق، ەنەرگيا ءوندىرۋشى ۇيىمدار اراسىندا باسەكەلەستىك ارتادى دەپ بولجانۋدا»، دەدى ب. اقشولاقوۆ.



 

سوڭعى جاڭالىقتار

اۋەزوۆ جانە تۇركى الەمى

رۋحانيات • كەشە

يدەولوگيا

رۋحانيات • كەشە

مەيىرىم مەن قاتىگەزدىك

رۋحانيات • كەشە

ەسكى مەن جاڭا اراسى

رۋحانيات • كەشە

بي پاديشاسى

رۋحانيات • كەشە

ساپا قايتسە جاقسارادى؟

قازاقستان • كەشە

قايىرىمدىلىقتىڭ ۇلگىسى

قازاقستان • كەشە

ساق ءداۋىرىنىڭ تاسى

تانىم • كەشە

ۇقساس جاڭالىقتار