ۇلىس كۇنىنىڭ ۇلىلىعىن كورسەتتى
«اسسالاۋماعالەيكۋم, اي! اي كوردىم, امان كوردىم, بۇرىنعىداي زامان كوردىم, ەسكى ايدا ەسىركەي گور, جاڭا ايدا جارىلقاي گور!» دەپ ءاربىر جاڭا تۋعان ايعا امانداساتىن حالقىمىز, ناۋرىز ايىنىڭ جاڭارۋىن وزگەشە قارسى الادى. ناۋرىزدىڭ 14-ءى كۇنى ەلىمىزدىڭ باتىس وڭىرىندەگىلەر «كورىسۋ» مەرەكەسىن باستاپ كەتەدى. ونى ماڭعىستاۋلىقتار «امال» دەپ اتايدى. دەرەك كوزدەرى بۇل مەيرامنىڭ شىعۋ توركىنىن باعزى زاماندارداعى اسپان الەمىن زەردەلەۋشى جۇلدىزشىلاردىڭ ىلىمىنە نەگىزدەيدى. امال جۇلدىزى مەن كۇننىڭ ءبىر ءتۇزۋ بويىندا ءوزارا جۇزدەسىپ, كورىسىپ تۇرعانداي بەينەدە بولۋى – شارۋا باققان, جەردەگى تىرلىگىن كوكتەگى جۇلدىزدار الەمىمەن بايلانىستىرا قاراعان اتا-بابالارىمىز ءۇشىن قىستىڭ اياقتالىپ, كوكتەمنىڭ باستالۋى بولىپ تابىلعان. امال مەن كۇن ءتارىزدى بوپ قول الىسىپ, كوكىرەك تۇيىستىرە امانداسۋدىڭ مازمۇنى وسىندا جاتسا كەرەك.
كورىسۋ داستۇرىنە ماڭعىستاۋدا كەشەگى «اسىلدارىمىزدى شاڭ باستى, بارىمىزدى جارقىراتا جاراتا المادىق» دەيتىن كەڭەستىك كەزەڭنىڭ وزىندە قىلاۋ تۇسكەن جوق. سول باياعى ماڭىزدى, مەرەكەلى كۇيىندە جىلجىپ كەلىپ, تاۋەلسىزدىككە جالعاستى. قازىرگى سيپاتى ءتىپتى ەرەكشە, ەڭبەكتەگەن بالادان, ەڭكەيگەن كارىگە دەيىن ۇمىتپاي اتاپ, وزگە ۇلت وكىلدەرى دە قازاقتىڭ ۇلتتىق كيىمدەرىن كيىپ, جادىراي كورىسەتىن جالپىحالىقتىق دەڭگەيگە كوتەرىلدى.
ماڭعىستاۋدا سوڭعى جىلدارى بۇل مەيرام «وتپان تاۋ» تاريحي-مادەني كەشەنىندە اتالىپ وتىلەتىن بولدى. بيىل دا جىلداعى داستۇرگە ساي قاراتاۋ ەتەگىنە 30-عا تارتا كيىز ۇيلەر تىگىلىپ, ماڭعىستاۋدىڭ تۇكپىر-تۇكپىرىنەن كەلگەن قوناقتاردى قابىلداپ, توي كورىگىن قىزدىردى.
سالتاناتتى شاراعا وبلىس اكىمى ا.ايدارباەۆ باستاعان باسشىلىق وكىلدەرى باردى. الدىمەن اداي اتا كەسەنەسىنە ءتاۋ ەتىپ, توبىش اتا ۇرپاقتارى سالعان «اقنيەت» قاقپاسىنىڭ اشىلۋىنا قاتىستى. وتپان تاۋدىڭ باسىندا تۇرىپ, امالدىڭ اق تاڭىن «ەلىمىز امان, زامانىمىز تىنىش, تاۋەلسىزدىگىمىز باياندى بولسىن!» دەپ تىلەك ەتكەن ماڭعىستاۋلىق تۇرعىنداردى ا.ايدارباەۆ, پارلامەنت سەناتىنىڭ دەپۋتاتى ب.شەلپەكوۆ جانە شارانى ۇيىمداستىرۋشى توبىش اتا بالالارى اتىنان د.سەيباعىتوۆ قۇتتىقتادى. باتاگوي اقساقال لەپەس قاجى يساەۆ باتا بەردى. كوكپار تارتۋ, اسىق اتۋ, وزگە دە بىرنەشە ءتۇرلى سپورتتىق ويىندار وينالىپ, جىر اقتارىلعان, ارنايى كەلگەن اۋداندار ونەرپازدارى كونتسەرتپەن كومكەرگەن مەرەكە اياسىندا تۋعان جەر توسىنە جاس شىبىقتار وتىرعىزىلدى. كەلەر جىلعى شارانى لايىقتى ۇيىمداستىرۋ ءۇشىن جاۋاپكەرشىلىكتى مۇڭال اتا ۇرپاقتارى قابىلداپ الدى.
ماڭعىستاۋدا امال مەرەكەسى اق تىلەك تىلەپ, تال ەككەن, ءان-جىر اۋەلەتىپ, جامىراي تابىسقان, سالت-ءداستۇردى تىرىلتكەن اق كوڭىلدەردىڭ مەرەكەسى بولىپ جالعاسۋدا...
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
