جاۋاپسىزدىق تانىتقاندار جاۋاپكەرشىلىككە تارتىلدى
نۇر-سۇلتان قالاسىنىڭ كومەندانتى ەرجان سادەنوۆ قالا تۇرعىندارىن توتەنشە جاعداي رەجىمى اياسىندا قابىلدانعان شارالاردى بۇزباۋعا شاقىردى. كومەندانتتىڭ ايتۋىنشا, ەلوردادا جاعداي تۇراقتى. ءبىر تاۋلىك ىشىندە قالادا 8 قىلمىس جاسالدى, 83 جول-كولىك وقيعاسى تىركەلدى, سالدارىنان ەكى ادام زارداپ شەكتى.
سونداي-اق 464 اكىمشىلىك قۇقىق بۇزۋشىلىق انىقتالدى, ونىڭ ىشىندە 183-ءى – ءتيىستى ەرەجەلەردى بۇزۋ, 36-سى – قوعامدىق ورىنداردا سپيرتتىك ىشىمدىكتەر ءىشۋ جانە 18-ءى – حالىقتىڭ كوشى-قونى سالاسىنداعى بۇزۋشىلىق فاكتىلەرى. ەستەرىڭىزگە سالا كەتەيىك, قالا پەريمەترى بويىنشا تاۋلىك بويى 6 بلوك-بەكەت جۇمىس ىستەيدى. توتەنشە جاعداي رەجىمى ەنگىزىلگەننەن بەرى 200-دەن اسا ادام ۇستالدى. ونىڭ ىشىندە 28 ادام اكىمشىلىك قاماۋعا الىندى. توتەنشە جاعداي كەزىندە جالعان حابارلامالار پايدا بولدى, ولار توقتاتىلدى. تۇرعىنداردان تەك رەسمي اقپارات كوزدەرىنە سەنۋ سۇرالادى. جالعان اقپارات تاراتۋدىڭ 3 فاكتىسى انىقتالدى. بارلىق فاكتى بويىنشا قىلمىستىق ىستەر قوزعالدى.
«جالعان اقپارات تاراتۋعا جول بەرىلمەيتىنى تۋرالى ەسكەرتەمىن. تج جاعدايىندا قر قك 274-بابىنا سايكەس 7 جىلعا دەيىن باس بوستاندىعىنان ايىرۋ كوزدەلگەن. تاعى دا ەسكە سالامىن, توتەنشە جاعداي كەزىندە قۇقىققا قارسى ءىس-ارەكەت جاساۋ جاعدايدى اۋىرلاتاتىن ءمان-جاي بولىپ سانالادى جانە نەعۇرلىم قاتاڭ جاۋاپكەرشىلىككە اكەپ سوعادى. قۇرمەتتى تۇرعىندار, كومەندانتتىق ساعاتتى بۇزباڭىز, زاڭعا باعىنىڭىز جانە تىنىشتىقتى ساقتاڭىز», دەلىنگەن ەلوردا كومەندانتىنىڭ ۇندەۋىندە.
51 ادام اكىمشىلىك قاماۋعا الىندى
قاراعاندى وبلىسىنداعى قوعامدىق-ساياسي جاعداي تۇراقتى. ايماق كومەندانتى ەرلان ءفايزۋلليننىڭ اقپاراتى بويىنشا وتكەن تاۋلىكتە ءتارتىپ ساقشىلارى 13 قىلمىستىق قۇقىق بۇزۋشىلىقتى اشتى.
تج رەجىمىن بۇزعانى ءۇشىن بارلىعى 586 اكىمشىلىك حاتتاما تولتىرىلدى. 51 ادام اكىمشىلىك قاماۋعا الىندى. 14 بۇزۋشىعا ايىپپۇل سالىندى, تاعى 460 ادام ەسكەرتۋ الدى. پوليتسيا قىزمەتكەرلەرى تىيىم سالىنعان 36 زاتتى تاركىلەدى. بالقاش بلوك-بەكەتىنەن 53 جاستاعى قالا تۇرعىنى باسقارعان Land Cruiser اۆتوكولىگىنەن تەگىس ۇڭعىلى قارۋعا 6 پاترون تابىلدى. يەسىنە قاتىستى ازاماتتىق قارۋعا پاترونداردى تاسىمالداۋ ءتارتىبىن بۇزعانى ءۇشىن حاتتاما تولتىرىلدى. سونداي-اق تج كەزىندە پوليتسيا قىزمەتكەرلەرى 16 بىرلىك تەگىس ۇڭعىلى قارۋ, 6 پىشاق تاركىلەپ, ەسىرتكى زاتتارىن ساقتاۋدىڭ 8 فاكتىسىن انىقتادى. قاراعاندى وبلىسىنىڭ پوليتسيا دەپارتامەنتى تۇرعىنداردى توتەنشە جاعداي رەجىمىن بۇزباۋعا شاقىرادى جانە پوليتسەيلەردىڭ جۇمىسىنا تۇسىنىستىكپەن قارايتىن جانە ولارعا جاردەم كورسەتەتىن ازاماتتارعا العىس بىلدىرەدى.
شەتەل ازاماتتارى دا شەكتەن شىعۋدا
پاۆلودار وبلىسىندا ب ۇلىك شىعارعان 900-گە جۋىق ادام جازالاندى. وبلىس كومەنداتۋراسى وكىلدەرىنىڭ حابارلاۋىنشا, ءتارتىپ بۇزعانداردىڭ ارقايسىسىنا قاتىستى اكىمشىلىك ءىس قوزعالعان. جاۋاپقا تارتىلعانداردىڭ قاتارىندا 4 شەتەل ازاماتى بولعان. ماتەريالداردىڭ بارلىعى سوتقا جىبەرىلىپ, شەشىمدەر قابىلداندى. ناقتىراق ايتقاندا, 220 ازامات 15 تاۋلىككە قاماۋعا الىندى. تاعى 300-گە جۋىق بۇزاقىعا 30 اەك كولەمىندە ايىپپۇل سالىندى. ال وزگە ەل ازاماتتارى كەرى قايتارىلدى. قازىرگى ۋاقىتتا وبلىستىڭ كۇشتىك قۇرىلىمدارى كۇشەيتىلگەن جۇمىس كەستەسىنە كوشكەن. ستراتەگيالىق ماڭىزى بار نىساندار ەرەكشە باقىلاۋعا الىندى. بلوك-بەكەتتەردەگى قىزمەت كۇشەيتىلدى. تاۋلىك ىشىندە بلوك-بەكەتتەر ارقىلى 6 مىڭنان اسا اۆتوكولىك وتكەن. ءجۇرىپ-تۇرۋعا رۇقسات بولماعاندىقتان, 39 اۆتوكولىك مەن 88 ازاماتقا كىرۋ مەن شىعۋعا رۇقسات ەتىلمەدى.
«كومەندانتتىق ساعات ەنگىزىلسە دە, زاڭبۇزۋشىلىقتار بارشىلىق. ماسەلەن, ۋاقىت رەجىمىن ساقتاماعان 700-گە جۋىق ادام ۇستالدى. ءار ادامعا قاتىستى اكىمشىلىك ءىس قوزعالدى. ماتەريالدار سوتقا جولداندى. سونىمەن قاتار 290 كولىك توقتاتىلىپ, ايىپ تۇراعىنا قويىلدى», دەدى وبلىستىق پوليتسيا دەپارتامەنتىنىڭ رەسمي وكىلى جاننا بەليالوۆا.
جالعان اقپارات تاراتقاندار دا انىقتالادى
اتىراۋ وبلىسىندا كومەندانتتىق ساعات تالابى 121 مارتە بۇزىلعان. بۇل تۋرالى اتىراۋ وبلىسىنىڭ كومەندانتى – وبلىستىق پوليتسيا دەپارتامەنتىنىڭ باستىعى قامزا ۇمبەتقاليەۆ ءمالىم ەتتى.
«اتىراۋ وبلىسىندا توتەنشە جاعداي جاريالانعاننان بەرى كومەندانتتىق ساعات تالاپتارىن بۇزعان 121 دەرەك تىركەلىپ, اكىمشىلىك ءىس قوزعالدى. توتەنشە جاعداي كەزىندە اتقارىلاتىن قىزمەتتىڭ باستى ماقساتى – قوعام تىرشىلىگىنىڭ قالىپتى جاعدايىن ورناتۋ. سوندىقتان وسى باعىتتا قىزمەت اتقارىپ جۇرگەن ءتارتىپ ساقشىلارى مەن وزگە دە جاۋاپتى مامانداردىڭ جۇمىسىنا تۇسىنىستىكپەن قاراۋعا, تەرروريزمگە قارسى وپەراتسيالار كەزىندەگى شەكتەۋلەرگە سابىرلىق تانىتىپ, ساقتىق شارالارىن ساقتاۋعا شاقىرامىن. ارانداتۋشىلىققا جول بەرمەي, كۇدىكتى فاكتىلەر تۋرالى مىندەتتى تۇردە پوليتسياعا حابار بەرۋدى سۇرايمىن. سونداي-اق جالعان اقپاراتتار تاراتپاعان ءجون. مۇنداي ارەكەت ءۇشىن قىلمىستىق كودەكستىڭ 274-بابىنا سايكەس 3 جىلدان 7 جىلعا دەيىن قىلمىستىق جاۋاپكەرشىلىك قاراستىرىلعان», دەدى اتىراۋ وبلىسىنىڭ كومەندانتى ق.ۇمبەتقاليەۆ.
ەرەجە بۇزعانداردىڭ ەشقايسىنا اياۋشىلىق جوق
الدىڭعى ءتۇنى اقتوبە وبلىسىندا كومەندانتتىق ساعات ءتارتىبىن بۇزعان 169 ادام پوليتسيا بولىمدەرىنە جەتكىزىلدى. ونىڭ 149-ى اكىمشىلىك جاۋاپقا تارتىلدى. اقتوبە وبلىسى اۋماعىندا قۇقىق قورعاۋ ورگاندارىنىڭ قىزمەتكەرلەرى قوعامدىق ءتارتىپتى جانە ازاماتتاردىڭ قاۋىپسىزدىگىن قامتاماسىز ەتىپ وتىر. وبلىستاعى جاعداي پوليتسيانىڭ تولىق باقىلاۋىنا الىندى.
«وتكەن ءتۇنى كومەندانتتىق ساعاتتى بۇزعانى ءۇشىن پوليتسيا بولىمدەرىنە 169 ازامات جەتكىزىلدى, ونىڭ 149-ى اكىمشىلىك جاۋاپقا تارتىلدى. سونىمەن قاتار قازىرگى ۋاقىتتا 3 ادام قاماۋعا الىنىپ, 4 ادامعا قاتىستى بۇلتارتپاۋ شاراسى قاراستىرىلىپ جاتىر. سوتقا دەيىن تەرگەۋ جالعاسادى», دەپ حابارلادى وبلىستىق پد ءباسپاسوز قىزمەتىنىڭ جەتەكشىسى ەربولات سارقۇلوۆ.
اقتوبە وبلىسىندا 10 بلوك-بەكەت بار. ونىڭ ۇشەۋى اقتوبە قالاسىندا ورنالاسقان. بلوك-بەكەتتەردە پوليتسيا قىزمەتكەرلەرى مەن اسكەريلەر قىزمەت اتقارىپ تۇر. ولار وبلىس جانە اۋدان ورتالىقتارىنان كىرۋ-شىعۋ كەزىندە اۆتوكولىكتەردىڭ سالونىن, جۇرگىزۋشىلەر مەن جولاۋشىلاردىڭ تولقۇجاتىن تەكسەرىپ جاتىر. اقتوبە وبلىسىنىڭ كومەنداتۋراسى كومەندانتتىق ساعاتتىڭ ۋاقىتىن كەشە ساعات 23.00-دەن 07.00-گە دەيىن وزگەرتتى.
15 ادام جاۋاپقا تارتىلدى
شىعىس قازاقستان وبلىستىق پوليتسيا دەپارتامەنتىنىڭ ءباسپاسوز قىزمەتى ۇسىنعان سوڭعى مالىمەتتەرگە سۇيەنسەك, وبلىس بويىنشا جاعداي تۇراقتى.
«قازىرگى ۋاقىتتا وڭىردەگى جاعداي قۇقىق قورعاۋ ورگاندارىنىڭ باقىلاۋىندا. پوليتسەيلەر كۇشەيتىلگەن رەجىمدە ءوز قىزمەتىن جالعاستىرىپ جاتىر. توتەنشە جاعداي مەن لاڭكەستىككە قارسى وپەراتسيانى وتكىزۋگە بايلانىستى ەنگىزىلگەن شەكتەۋلەر ساقتالادى», دەلىنگەن اقپاراتتا.
بۇگىندە ايماق بويىنشا ۇستالعاندار سانى 1 100-دەن اسادى. ونىڭ ىشىندە 79-ى قاماۋعا الىنعان. كومەندانتتىق ساعات تالابىن بۇزعانى ءۇشىن 15 ادام اكىمشىلىك جاۋاپقا تارتىلدى.
توتەنشە جاعداي رەجىمىن 333 رەت بۇزعان
اقمولا وبلىسىنىڭ سوتتارى 2022 جىلعى 6-11 قاڭتار ارالىعىندا 333 اكىمشىلىك قۇقىق بۇزۋشىلىق تۋرالى ءىستى قارادى. وبلىستىق پوليتسيا دەپارتامەنتى باسقارماسى ءباسپاسوز قىزمەتىنىڭ مالىمەتىنشە, الدىڭعى تاۋلىكتە وبلىستىڭ 8 تۇرعىنى اكىمشىلىك قۇقىقبۇزۋشىلىق كودەكسىنىڭ 476-بابى بويىنشا اكىمشىلىك جاۋاپقا تارتىلدى.
«وبلىس بويىنشا 13 بلوك-بەكەت جۇمىس ىستەيدى, ونىڭ 8-ءى – كوكشەتاۋ قالاسىندا, 3-ەۋى – ستەپنوگوردا جانە 2-ەۋى – بۋراباي اۋدانىندا. قاڭتاردىڭ 8-ىندە بۋراباي اۋداندىق پوليتسيا بولىمىنە تۇركىستان وبلىسىنىڭ 8 تۇرعىنى جەتكىزىلدى. ولار ءبىر كۇن بۇرىن استانادان بۋراباي كەنتىنە كەلىپ, كۋرورتتىق ايماق اۋماعىندا مەملەكەتتىك تىركەۋ ءنومىرى جوق كولىكپەن جۇرگەن. جول قوزعالىسى ەرەجەلەرىن بۇزعانى ءۇشىن كولىك قۇرالدارىنىڭ جۇرگىزۋشىلەرى اكىمشىلىك قۇقىق بۇزۋشىلىق كودەكسىنىڭ 591-بابىنىڭ 1-بولىگى جانە 230-بابىنىڭ 2-بولىگى بويىنشا اكىمشىلىك جاۋاپقا تارتىلدى», دەدى ۆەدومستۆو وكىلدەرى.
سونىمەن قاتار نۇر-سۇلتان قالاسىنا كىرەبەرىستەگى بلوك-بەكەتتە ارشالى اۋدانى جىبەك جولىنىڭ تۇرعىنىنان 75 وق-ءدارىسى بار «سايگاك-410» تىركەلمەگەن مىلتىق تاركىلەندى. ءدال وسى كۇنى كوكشەتاۋدان ەلوردا باعىتىنا شىعابەرىستەگى بلوك-بەكەتتە ششۋچە قالاسى تۇرعىنىنىڭ اۆتوكولىگىنەن «توز 87-01» ماركالى تەگىس ۇڭعىلى مىلتىق تابىلدى.
«وبلىس اۋماعىندا ساعات 23.00-دەن 07.00-گە دەيىن كومەندانتتىق ساعات ەنگىزىلدى. ءوڭىردىڭ 180-نەن اسا بەلسەندى تۇرعىنى قوعامدىق ءتارتىپتى قامتاماسىز ەتۋ بويىنشا ەرىكتى جاساقتارعا قوسىلدى, ولاردىڭ 84-ءى – تانىمال سپورتشى. وبلىس تۇرعىندارىن قۇلاعدار ەتۋ ءۇشىن «جەدەل جەلى» اشىلدى. وبلىس تۇرعىندارى 1303 نومىرىنە حابارلاسىپ, قاجەتتى اقپاراتتى الۋىنا بولادى. بۇگىنگى تاڭدا سall-ورتالىققا كومەندانتتىق پاترۋلدەۋگە قاتىسۋ, الكوگول ونىمدەرىن ساتۋعا تىيىم سالۋ, كوڭىل كوتەرۋ ورىندارىنىڭ جۇمىس ىستەۋى ماسەلەلەرى بويىنشا بلوك-بەكەتتەردىڭ جۇمىسىنا قاتىستى 320 قوڭىراۋ كەلىپ ءتۇستى. قازىرگى تاڭدا وبلىس اۋماعىنداعى جاعداي تۇراقتى», دەپ تولىقتىردى ۆەدومستۆونىڭ ءباسپاسوز قىزمەتى.
