«قىمباتتى وتانداستار! ەلىمىزدەگى احۋال وتە كۇردەلى.
مەنىڭ وسىعان دەيىن جاساعان بىرنەشە ۇندەۋىمە قاراماستان وزدەرىن «ەرەۋىلشىلەر» دەپ اتايتىن ادامدار توبى قاساقانا تۇردە جاعدايدى ۋشىقتىرىپ وتىر. ەلىمىزدىڭ تەڭ جارتىسىنا جۋىعىندا قاقتىعىستار ورىن الۋدا. اسىرەسە, الماتىداعى احۋال وتە كۇردەلى.
ءبىزدىڭ سۇيىكتى قالامىزدا قۇقىق قورعاۋ قىزمەتكەرلەرىنە جاپپاي شابۋىل جاسالىپ جاتىر. ولاردىڭ اراسىندا قازا تاپقاندار مەن جارالانعاندار بار.
بۇزاقى توپتار اسكەري قىزمەتشىلەردى ۇرىپ-سوعىپ, كوشەگە جالاڭاش شىعارىپ, مازاققا اينالدىرۋدا. ايەلدەردى زورلاپ, دۇكەندەردى توناپ جاتىر.
بۇل جاعداي الماتىنىڭ بارلىق تۇرعىنىنا قاۋىپ ءتوندىرىپ وتىر. بۇعان توزۋگە بولمايدى. الماتىدان باسقا كەيبىر وبلىس ورتالىقتارىندا دا جاعداي ۋشىعىپ تۇر. وسىعان بايلانىستى بىرقاتار وڭىردە توتەنشە جاعداي ەنگىزدىم. بۇل – قاجەتتى شارا.
پرەزيدەنت رەتىندە, مەن, ازاماتتارىمىزدىڭ قاۋىپسىزدىگى مەن تىنىشتىعىن قورعاۋعا, قازاقستاننىڭ تۇتاستىعىنا الاڭداۋعا مىندەتتىمىن. مەنىڭ قابىلداعان شارالارىم كوپ ۇلتتى قازاقستاننىڭ يگىلىگىنە باعىتتالعان. الايدا بۇل شارالار جەتكىلىكسىز بولىپ تۇر.
بۇزاقى توپتاردىڭ ارەكەتتەرى جوعارى دەڭگەيدە ۇيىمداستىرىلعانىن كورىپ وتىرمىز. بۇل قارجىلاندىرىلعان ب ۇلىكشىلەردىڭ جان-جاقتى ويلاستىرىلعان جوسپارى ەكەنىن دالەلدەيدى. بۇل – قاسكويلەردىڭ قيتۇرقى ارەكەتى.
سوندىقتان مەملەكەت باسشىسى جانە بۇگىننەن باستاپ قاۋىپسىزدىك كەڭەسىنىڭ توراعاسى رەتىندە بارىنشا قاتاڭ ارەكەت ەتەمىن. بۇل – ءومىرىن قورعاپ قالۋعا ءوتىنىش بىلدىرگەن كوپتەگەن ازاماتىمىزدىڭ قاۋىپسىزدىگىنە قاتىستى ماسەلە.
بۇل – مەملەكەتىمىزدىڭ قاۋىپسىزدىگىنە تىكەلەي قاتىستى. حالىق مەنى قولدايتىنىنا سەنىمدىمىن. قانداي جاعداي بولسا دا مەن ەلوردادا بولامىن. حالىقپەن بىرگە بولۋ – مەنىڭ كونستيتۋتسيالىق مىندەتىم.
ءبىز جۇمىلا وتىرىپ, قازاقستان تاريحىنداعى وسى سىن ساعاتتى بىرگە ەڭسەرەمىز. بۇدان شىڭدالىپ شىعامىز. جۋىردا قازاقستاندى ساياسي ترانسفورماتسيالاۋ جونىندەگى جاڭا ۇسىنىستارىمدى جاريالايمىن. مەن دايەكتى رەفورمالاردى بۇرىنعىداي جالعاستىرا بەرەمىن.
قۇقىق قورعاۋ ورگاندارى مەن اسكەري قىزمەتشىلەرگە ەرەكشە العىس بىلدىرەمىن. ولار قارۋلى توپتاردىڭ سوققىسىنا كەۋدەسىن توستى. وكىنىشكە قاراي قازا تاپقاندار دا بار. مەرت بولعان ازاماتتاردىڭ وتباسىلارىنىڭ قايعىسىنا ورتاقتاسىپ, كوڭىل ايتامىن.
قۇرمەتتى دوستار! بارشاڭىزعا شىن جۇرەكتەن امانشىلىق تىلەيمىن.
حالقىمىز قۇبىلمالى كەزەڭگە تاپ بولدى. دانا حالقىمىز قيىنشىلىقتاردىڭ ءبارىن مىندەتتى تۇردە ەڭسەرەدى. مەن بۇعان كامىل سەنەمىن. بىرگە بولايىق!», دەلىنگەن ۇندەۋدە.
