مۇراتبەكوۆ مۇراتى وقىرمانىمەن تابىسۋ ارقىلى ورىندالماق

كىتاپ تۋرالى عۇلامالاردان قالعان ۇشقىر ءسوز از ەمەس. زاڭعار جازۋشى مۇحتار اۋەزوۆ: «ءاربىر ادامنىڭ ەڭ جاقسى دوسى كىتاپ بولۋى ءتيىس» دەسە, عۇلاما قالامگەر ءابىش كەكىلباەۆ: «كىتاپ – كىتاپحانا – ماڭگىلىك پاراساتتىڭ ەڭ كيەلى عيماراتى», دەيدى. ەلورداداعى ۇلتتىق اكادەميالىق كىتاپحانا وسى ءبىر قاناتتى تىركەستەردى تۇمارداي تاعىنىپ, ەلى­­مىز كولەمىندە «ءبىر ەل – ءبىر كىتاپ» اكتسياسىن وسىمەن سەگىزىنشى رەت ۇيىمداستىرىپ وتىر. بيىلعى شەشىم بويىنشا جالپىحالىقتىق وقۋعا كورنەكتى قازاق جازۋشىسى, مەملەكەتتىك سىيلىقتىڭ لاۋرەاتى سايىن مۇراتبەكوۆتىڭ «جۋسان ءيىسى» مەن «باسىندا ۇشقارانىڭ...» اتتى پوۆەستەرى ۇسىنىلىپتى. ادەبيەتكە وتكەن عاسىردىڭ الپىسىنشى جىلدارى ارالاسقان قارىمدى قالامگەر سايىن مۇراتبەكوۆ «مەنىڭ قارىنداسىم», «اۋىل وتى», «كوكوراي», «وتاۋ ءۇي», «جابايى الما», «دوس ىزدەپ ءجۇرمىن», «قالىڭ قار», «ءولىارا» شىعارمالارىمەن قالىڭ كوپشىلىككە تانىلىپ, پروزا سالاسىندا وزىندىك قولتاڭباسىن قال­دىر­دى. شەتەل جازۋشىلارىنىڭ شىعارمالارىن اۋدا­رۋعا دا ءوز ۇلەسىن قوسقان. قاراپايىم ادامداردىڭ بولمىسىن ادەمى سۋرەتتەگەن تۋىندىلارى – ورىس, وزبەك, تاتار, ۋكراين, بەلورۋس, گرۋزين, ازەربايجان, ليتۆان, اراب تىلدەرىندە ءتارجىمالاندى. ونىڭ شىعارما­­شىلىعى تۋرالى ءبىلىمدار سىنشى ساعات اشىمباەۆ: «باسىندا ۇشقارانىڭ...» – سايىن شىعارماشى­لى­عىن­داعى ادام جانىنىڭ ديالەكتيكاسىن ءىش­كى سەزىم درا­ماتيزمى ارقىلى اشۋداعى ەرەكشە دۇنيەسى. بۇل اڭگى­مە ارادا ۇزاق جىلداردان سوڭ كەشەگى ءوزى وسكەن, بالا­لىق شاعى وتكەن تۋعان اۋىلىنا ساعىنىشپەن ورال­عانداردىڭ باسىنداعى قايتالانباس كوڭىل-كۇيى تۋرالى ەلەگيا دەر ەدىك», دەپ تولىققاندى باعاسىن بەرگەن بولاتىن. قازاق ادەبيەتىن ناسيحاتتاۋ, وقىرمانداردى كىتاپ وقۋعا تارتۋدى ماقسات ەتكەن ۇلتتىق اكادەميالىق كىتاپحانادا وتكەن «ءبىر ەل – ءبىر كىتاپ» اتتى ءباسپاسوز كونفەرەنتسياسىندا اكتسيانىڭ ۇيىمداستىرۋ كومي­تەتىنىڭ توراعاسى عاريفوللا ەسىم, بەلگىلى جازۋشىلار اكىم تارازي, ادام مەكەباەۆ پەن الىبەك اسقار بيىلعى قالىڭ وقىرمانعا قوس تۋىندىسى ۇسى­نىلىپ وتىرعان كورنەكتى جازۋشى سايىن مۇرات­بەكوۆ جونىندە ەستەلىكتەر ايتىپ, جازۋشىنىڭ شىعار­ما­شى­لىعى جونىندە وي-پىكىرلەرىن ورتاعا سالدى. بەرىك سادىر, «ەگەمەن قازاقستان».