ەندى مىنە, ءبىلىم جانە عىلىم ءمينيسترى اسحات ايماعامبەتوۆ پەن قاراعاندى وبلىسىنىڭ اكىمى جەڭىس قاسىمبەكتىڭ قولداۋىمەن اتالعان اۋىلدا قىسقا مەرزىم ىشىندە ەكى قاباتتى زاماناۋي مەكتەپ ءۇيى بوي كوتەردى, دەپ جازادى Egemen.kz.
جاڭا جىل الدىنداعى جاڭا مەكتەپتىڭ اشىلۋىنا وبلىس اكىمىنىڭ ورىنباسارى ابزال نۇكەنوۆ, وبلىستىق ءبىلىم باسقارماسىنىڭ باسشىسى گۇلسىم قوجاحمەتوۆا, شەت اۋدانىنىڭ اكىمى مۇحيت مۇحتاروۆ, اۋداندىق ءماسليحاتتىڭ حاتشىسى باكەن تولەۋقۇلوۆ جانە اۋداندىق ءبىلىم ءبولىمىنىڭ باسشىسى ەلدوس سماعۇلوۆ ارنايى كەلدى.
ساۋلەتى سۇلۋ جانە ساپالى سالىنعان جاڭا مەكتەپ ەكى بلوكتان تۇرادى. ءىشى تولىقتاي زاماناۋي ماتەريالدىق-تەحنيكالىق بازامەن جابدىقتالعان. اتاپ ايتقاندا, ءبىلىم ۇياسىندا 17 وقۋ كابينەتى, لينگافوندىق-مۋلتيمەديالىق كابينەت, شەبەرحانالار, سپورت زالى, كىتاپحانا, اسحانا, مەديتسينالىق بولمە قاراستىرىلعان. سونىمەن قاتار, مەكتەپالدى دايارلىق سىنىبى ءۇشىن 15 بالاعا ارنالعان جەكە كىرەبەرىس جابدىقتالعان. ولاردىڭ جەكە ويىن جانە وقۋ بولمەلەرى بار.
جاڭا مەكتەپتىڭ اشىلۋ سالتاناتىندا قۇتتىقتاۋ ءسوز سويلەگەن ابزال نۇكەنوۆ قاراعاندى وبلىسىنىڭ اكىمى جەڭىس قاسىمبەكتىڭ اتىنان ءبىلىم مەكەمەسىنە 10 ميلليون تەڭگەنىڭ سەرتيفيكاتىن تابىس ەتتى.
– جاڭا مەكتەپتىڭ سالىنىپ, پايدالانۋعا بەرىلگەنىنە وتە قۋانىشتىمىز. مۇنى ءبىز ەل تاۋەلسىزدىگىنىڭ 30 جىلدىق مەرەيتويى اياسىندا اۋىلىمىزعا جاسالعان تولايىم تارتۋ دەپ قابىلدادىق. كيىكتى اۋىلىنىڭ مەكتەبى بۇرىن دا ءوزىنىڭ يگى داستۇرىمەن, جوعارى جەتىستىكتەرىمەن داڭقى شىققان ءبىلىم ۇياسى ەدى. ەندى بۇل ساباقتاستىق جالعاسىن ساتىمەن تاۋىپ, جاڭا مەكتەپ قابىرعاسىنان ەلىمىزگە ادال قىزمەت ەتەتىن ءبىلىمدى جانە ونەگەلى تۇلەكتەر سامعاپ ۇشا بەرسىن دەگەن تىلەك ايتامىز, – دەدى تۇساۋكەسەر راسىمىندە ءسوز سويلەگەن ارداگەر ۇستاز جىبەك ەسجانوۆا.
كيىكتى اۋىلىنىڭ تۇرعىندارى مەكتەپ ءۇيىن 670 ملن تەڭگە قاراجاتقا ساپالى دارەجەدە سالعان قىزىلوردا قالاسىنىڭ «امان قۇرىلىس» كومپانياسىنا, ونىڭ باسشىسى ءادىلحان ماشتاەۆ مىرزاعا ءدان ريزا. قۇرىش قولدى قۇرىلىسشىلاردىڭ ەرەن ەڭبەگىن, مەردىگەردىڭ اياقاستى تۋىنداعان كەيبىر قيىنشىلىقتارعا قاراماستان قۇرىلىستى جوسپارلانعان ۋاقىتتا بىتىرگەن جاۋاپكەرشىلىگى مەن ىسكەرلىگىن وبلىس باسشىلىعى دا اتاپ ءوتتى.
وسى ورايدا, شەت اۋدانى بويىنشا 2021 جىلى جالپى سوماسى 320 ميلليون تەڭگە بولاتىن قاراجاتقا 21 مەكتەپءتىڭ تەرەزە, شاتىر, جىلۋ جۇيەلەرىجاڭارتىلىپ جانە سىرتىن تىستاۋ جۇمىستارى جۇرگىزىلگەنىن ايتا كەتكەن ءجون. سونىمەن قاتار,اقادىر كەنتىندەگى وتكەن عاسىردىڭ 40-شى جىلدارى سالىنعان, سپورت زالى مۇلدەم بولماعان ءالىمحان ەرمەكوۆ اتتىنداعى مەكتەپ-رەسۋرس ورتالىعىندا 390 ميلليون تەڭگەگە جاڭادان سپورت زال مەن اسحانا قۇرىلىسى باستالعان.
بولات جولدىڭ بويىنداعى كيىكتى اۋىلىندا بۇگىندە مىڭنان استام ادام تۇرادى. اۋىل تۇرعىندارىنىڭ باسىم بولىگى تەمىر جول سالاسىندا ەڭبەك ەتەدى. ال مەكتەپ جاسىنداعى بالالاردىڭ سانى 179 وقۋشىنى قۇرايدى. ولارعا ءبىلىم جانە ءتالىم-تاربيە بەرۋمەن 35 پەداگوگ-ماماننان تۇراتىن ۇجىم اينالىسادى.
بۇل اۋىلدا قازاقتىڭ كلاسسيك كومپوزيتورى, كسرو مەملەكەتتىك سىيلىعىنىڭ لاۋرەاتى سىدىق مۇحامەدجانوۆ دۇنيەگە كەلگەن. قازىرگى تاڭدا مەكتەپ ايگىلى سازگەردىڭ ەسىمىمەن اتالادى. سونىمەن بىرگە كيىكتىنىڭ كيەلى توپىراعىنا قازاقتىڭ كورنەكتى جازۋشى, «ەلىم-اي» تريلوگياسىنىڭ اۆتورى سوفى سماتاەۆتىڭ دا كىندىك قانى تامعان.
ءساتىن سالسا, كيىكتى اۋىلىنىڭ وقۋشىلارى ءۇشىنشى توقساندا بارلىق سانيتارلىق نورمالار مەن تالاپتاردى ساقتاي وتىرىپ, شتاتتىق رەجءىمدە ءىشى-سىرتى سىڭعىرلاعان سۋ جاڭا مەكتەپتە وقيتىن بولادى.
