ەلوردا • 27 جەلتوقسان، 2021

«ەلوردا – تاۋەلسىزدىك سيمۆولى» اتتى عىلىمي جيناق جارىق كوردى

نۇر-سۇلتان قالاسى مەملەكەتتىك ءارحيۆى «ەلوردا – تاۋەلسىزدىك سيمۆولى» اتتى عىلىمي باسىلىم شىعاردى، دەپ حابارلايدى Egemen.kz.

تابيعات مۇسىلمانقۇل

عىلىمي-كوپشىلىك باسىلىمدا ارحيۆ قۇجاتتارى مەن ماتەريالدارىنىڭ رەپرەزەنتاتيۆتى نەگىزىندە قازاقستاننىڭ قازىرگى استاناسىنىڭ تاريحى جۇيەلى تۇردە جازىلعان. ەلوردانىڭ قالىپتاسۋ تاريحىنىڭ باستاۋ-بۇلاقتارى مەن ماڭىزدى كەزەڭدەرى، جوعارعى جانە ورتالىق مەكەمەلەردى كوشىرۋ بويىنشا مەملەكەتتىك كوميسسيانىڭ جۇمىسى، استانانى كوشىرۋدىڭ ستراتەگيالىق باعىتتارى، تۇڭعىش پرەزيدەنتىمىزدىڭ ءرولى، استانالىق قالانىڭ دامۋ كونتسەپتسياسى مەن كۇندەلىكتى تاريحى، «استانا – جاڭا قالا» ارنايى ەكونوميكالىق ايماعى جانە سونىڭ اياسىندا قىزمەت ەتكەن العاشقى قالاباسىلارىنىڭ جۇمىستارى كورسەتىلەدى.

كىتاپ «تاۋەلسىزدىك»، «ەلباسى»، «ەلوردا» جانە «ارحيۆ قۇجاتتارىنداعى استانا» دەپ اتالاتىن ءتورت بولىمنەن تۇرادى، سوڭعى جاعىندا تۇسىنىكتەمەلەر، بيوگرافيالىق انىقتامالار، قوسىمشالار جانە قۇجاتتار مەن ماتەريالداردىڭ ءتىزىمى بەرىلگەن.

قازىرگى قازاقستان تاريحىنداعى ءتورتىنشى استانامىز سانالاتىن قالانىڭ اتاۋى، بۇگىنگە دەيىن ءۇش رەت وزگەرگەنى، بەلگىلى. تاۋەلسىزدىكتىڭ العاشقى جىلدارىندا-اق استانانى كوشىرۋ يدەياسى پايدا بولعان. بۇل 1992 جىل. وسى جىلى قالاعا اقمولا اتاۋى قايتارىلادى. استانانى كوشىرۋ پروتسەسى باس-اياعى ءۇش-ءتورت جىلعا سوزىلدى. كوپ كەشىكپەي، ۇلتتىق ەكونوميكامىز تۇراقتانعان 1998 جىلى اقمولا قالاسى استانا اتاۋىن الادى. اراعا ءبىراز جىلدار سالىپ، قازىرگى مەملەكەت باسشىسى قاسىم-جومارت توقاەۆتىڭ ۇسىنىسىمەن تۇڭعىش پرەزيدەنتىمىز ن.ءا.نازارباەۆتىڭ قۇرمەتىنە قالا اتاۋى «نۇر-سۇلتان» اتالدى. وسى رەتتە ايتا كەتەرلىگى، اۆتورلار 90-جىلداردىڭ اياعىنا قاراي، استانانىڭ تۇساۋكەسەرى قارساڭىندا اقمولا وڭىرىنەن شىققان ءبىر توپ زيالى قاۋىم وكىلدەرىنىڭ ۇكىمەت، سەنات پەن ءماجىلىستىڭ اتىنا قازاقستان استاناسىن «نۇر-سۇلتان» دەپ اتاۋ تۋرالى مالىمدەمە جاساعانىن جانە ونىڭ اراعان جيىرما جىلداي ۋاقىت سالىپ ىسكە اسىرىلعانىن جازىلعان.

كىتاپتىڭ سوڭعى تاراۋىندا ەلىمىزدىڭ استاناسى تۋرالى «قالالىق اكىمشىلىك قۇجاتتارى»، «استانانى كوشىرۋ تۋرالى ماتەريالدار»، «ارنايى ەكونوميكالىق ايماقتار جانە قالانىڭ دامۋ جوسپارى»، «استانا-نۇر-سۇلتان» دەپ اتالاتىن تاراۋلار بويىنشا بۇرىن-سوڭدى اينالىمعا ەنە قويماعان تىڭ ارحيۆ قۇجاتتارى بەرىلگەن.

سونىمەن قاتار قوسىمشالار ارقىلى «استانانىڭ قۇرمەتتى ازاماتتارى» مەن 1990 جىلدان 2021 جىلعا دەيىنگى نۇر-سۇلتان قالاسىندا ورناتىلعان ەسكەرتكىشتەر ءتىزىمى جانە نۇر-سۇلتان قالاسىنىڭ باۋىرلاس-قالالار مەن سەرىكتەستەرى تۋرالى قىزىقتى مالىمەتتەر كورسەتىلگەن.

قازاقستان تاۋەلسىزدىگىنىڭ 30 جىلدىعى اياسىندا شىققان باسىلىمنىڭ ماقساتى دا قازىرگى جاستاردىڭ تاريحي ساناسىن جەتىلدىرۋگە باعىتتالعان.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز