كوشەنەي جىراۋدىڭ اكەسى رۇستەمبەك, اتاسى جيەنباي, ارعى اتاسى دۇزبەنبەتتەر باعزى ونەردىڭ بايراعىن ۇرپاعىنا اماناتتاعان جاندار. جالعاننىڭ جارىعىندا جيىرما جەتى-اق جىل عۇمىر كەشكەن كوشەنەي وسى بابالار مۇراسىن عىلىمي اينالىمعا ەنگىزىپ, جىراۋلىق ءداستۇردىڭ قازىرگى ساحنالىق كەلبەتىن قالىپتاستىرىپ كەتتى. سوناۋ تۇقياننان تامىر تارتقان ونەردىڭ شوقتىعى بيىك وكىلى سانالعان كوشەنەيدى تۇركى تەكتەس حالىقتار عالىمدارى دا جوعارى باعالاعان.
جىراۋدىڭ بالا كەزىنەن باستاپ, ات جالىن تارتىپ مىنەر شاعىنا دەيىنگى ءومىرىنىڭ ۇزىگىن بەينەلەيتىن قويىلىمنان كەيىن وبلىستىق ءماسليحات حاتشىسى ناۋرىزباي بايقاداموۆ جيىلعان كورەرمەنگە لەبىزىن جەتكىزدى.
– جىراۋلىق ونەرگە وزگەشە ورنەك قوسقان كوشەنەي رۇستەمبەكوۆ ەسىمى قازاقپەن بىرگە جاساي بەرەتىنى, ۇرپاق الماسقان سايىن جاڭعىرا تۇسەتىنى انىق. اتا مۇراسىن جاڭا بەلەسكە كوتەرگەن جىراۋ ءومىرى كەيىنگى تولقىنعا ولمەس ونەگەگە, ءوزى تاريحي تۇلعاعا اينالعانىن بىلەمىز. وسىدان از ۋاقىت بۇرىن «قازاقتىڭ كۇمىس كومەي كوشەنەيى» اتتى وبلىستىق جىر فەستيۆالى ءوتتى. ال قارماقشى اۋدانىنداعى كوشەنەي رۇستەمبەكوۆ اتىنداعى جىراۋلار ءۇيى 15 جىلدىڭ ىشىندە ءداستۇرلى جىردىڭ وتىن جاققان تالاي دارىندى جاستى تاربيەلەپ شىعارىپ, ونەر كوشىنە قوستى, – دەدى ءماسليحات حاتشىسى.
قازاقستان رەسپۋبليكاسىنىڭ مادەنيەت قايراتكەرى, بەلگىلى جىرشى بەرىك سايماعانبەتوۆ جۇرگىزگەن كەشتە كوشەنەيدىڭ ءىنىسى بيداس رۇستەمبەكوۆ, بالاسى ارنۇر كوشەنەي جانە ەلىمىزگە بەلگىلى جىرشى-جىراۋلار ۇلجان بايبوسىنوۆا, شولپان بيىمبەتوۆا, مايرا سارسەنباەۆا, سەرىك جاقسىعۇلوۆ, رۋسلان احمەتوۆ, اقمارال نوعايباەۆا, ايدوس راحمەتوۆتەر كوپشىلىككە جىردىڭ ءىنجۋ-مارجانىن تارتۋ ەتتى. كونەدەن بۇگىنگە جەتكەن ونەر كەرۋەنىنە جاڭادان قوسىلعان جاس تالاپ ونەرپازدار دا كوپ الدىنا شىقتى.
جىرسۇيەر قاۋىم رۋحاني ءنار العان كەش سىرداعى سۇلەيلەر سارىنىنىڭ جوعالمايتىنىن, ءتالىمى توزبايتىنىن كورسەتتى.
