• 08 ناۋرىز, 2014

8 ناۋرىزعا – 80 پاتەر

231 رەت

كورسەتىلدى

1 مين

وقۋ ءۇشىن

Egemen Qazaqstan

سارسەنبى وڭتۇستىك استانانىڭ تالاي تۇرعىنى ءۇشىن ساتىمەن باستالعان تاماشا كۇن بولدى. وسى كۇنگە دەيىن كەزەكتە تۇرعان 100 تۇرعىن جاڭا پاتەر كىلتتەرىن الىپ, قونىس تويىنا دا جەتتى. قالالىقتاردىڭ قۋانىشىنا الماتى قالاسىنىڭ اكىمى احمەتجان ەسىموۆ ورتاقتاسىپ, حالىقارالىق ايەلدەر كۇنى قارساڭىندا ءۇي كەزەگىندە تۇرعان جاندارعا ءتيىستى قۇجاتتار مەن پاتەر كىلتتەرىن ءوزى تاپسىردى. وسىلايشا, سامالاداي ءوز وشاقتارىنىڭ تابالدىرىعىن اتتاعان جاڭا قونىس يەلەرىنىڭ 80-ءى ايەلدەر بولدى. ولاردىڭ ىشىندە كوپبالالى انالار, مۇگەدەكتەر, جەتىم بالالار, الەۋمەتتىك سالا قىزمەتكەرلەرى, مادەنيەت, ءبىلىم, دەنساۋلىق سالاسىنىڭ قىزمەتكەرلەرى بار. تۇرعىندارى كۇن سايىن كوبەيەتىن مەگاپوليس قالانىڭ اكىمى احمەتجان ەسىموۆ مۇنان بىلايعى ۋاقىتتا دا مەملەكەت تاراپىنان الماتىلىقتاردى تۇرعىن ۇيمەن قامتاماسىز ەتۋگە كوڭىل بولەتىندىگىن جەتكىزدى. ەگەر وتكەن جىلى 420 وتباسى كوممۋنالدىق ءۇي السا, بيىل ولاردىڭ سانى 650-ءدى قۇرايدى ەكەن. قالالىق يپوتەكالىق باعدارلاما بويىنشا 440 وتباسى پاتەر السا, بيىل ولاردىڭ سانى 550-گە ارتپاق. قولجەتىمدى باسپانا بويىنشا بيىل 378 وتباسى پاتەر الادى, ءوتكەن جىلى العاندارى – 216 وتباسى. كەزدەسۋ سوڭىندا قالا اكىمى ايەلدەردى الداعى 8 ناۋرىز مەرەكەسىمەن قۇتتىقتادى, ءار وتباسىعا باياندى باقىت تىلەدى. «ەگەمەن-اقپارات». الماتى.