سالاماتتى ءومىر سالتى – سپورتتىڭ سەرىگى

كەشە سپورت جانە دەنەشىنىقتىرۋ ىستەرى اگەنت­تىگىنىڭ توراعاسى تاستانبەك ەسەنتاەۆ اتالعان ۆە­دومستۆو­نىڭ وتكەن  جىلى اتقارعان ءىس-شارالارى مەن العا قويعان جوسپارلارى تۋرالى بايانداپ بەردى.   كەزدەسۋدە ول ەسەپتىك كەزەڭدە اگەنتتىكتىڭ قىزمەتى ستراتەگيالىق جانە باعدارلامالىق قۇجاتتاردا, مەملەكەت باسشىسىنىڭ «الەۋمەتتىك-ەكونوميكالىق جاڭعىرۋ – قازاقستان دامۋىنىڭ باستى باعىتى», «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى», «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋ­لارىندا, سونىمەن قاتار, «قازاقستاننىڭ الەۋمەتتىك جاڭعىر­تىلۋ: جالپىعا ورتاق ەڭبەك قوعامىنا قاراي 20 قادام» اتتى ماقالاسىندا بەرىلگەن سپورت جانە دەنەشىنىقتىرۋ سالاسىنداعى مىندەتتەر مەن تاپسىرمالاردى ىسكە اسىرۋعا باعىتتالعانىن ايتىپ, وسى تاپسىرمالاردىڭ بارلىعى اگەنتتىكتىڭ 2012-2016 جىلدارعا ارنالعان ستراتەگيالىق جوسپارىندا كورىنىس تاۋىپ, ستراتەگيالىق باعىتتاردا جۇزەگە اسىرىلعانىن اتاپ ءوتتى. – بىرىنشىدەن, بۇل – دەنەشىنىقتىرۋ جانە سپورت ارقىلى بارشا قازاقستاندىقتاردىڭ سالاماتتى ءومىر سالتىن قالىپتاستىرۋ. 2020 جىلعا دەيىن دەنەشىنىقتىرۋ جانە سپورتپەن جۇيەلى تۇردە اينالىساتىن حالىقتىڭ ۇلەسىن 30 پايىزعا دەيىن جەتكىزۋ جانە حالىقتىڭ سپورتپەن جاپپاي اينالىسۋى ءۇشىن سپورت ينفراقۇرىلىمىنىڭ قولجەتىمدىلىگىن كەڭەيتۋ ماسەلەسىن شەشۋ, – دەدى ول. – ەكىنشى باعىت – الەمدىك سپورت ارەناسىندا قازاقستاندىق سپورتتىڭ باسەكەگە قابىلەتتىلىگىن ارتتىرۋ. ءۇشىنشى باعىت – لوتەرەيا قىزمەتىن رەتتەۋ جانە ويىن بيزنەسى سالاسىنداعى باقىلاۋ. وسىدان كەيىن ول دەنەشىنىقتىرۋمەن جانە سپورتپەن اينالىساتىن حالىقتىڭ ۇلەسى جوسپارلانعان 23 پايىزدان 23,2 پايىزعا,  بالالار مەن جاسوسپىرىمدەردىڭ ۇلەسى جوسپارلانعان 11,5 پايىزدان  12,5 پايىزعا جەتكەنىن ايتتى. سونداي-اق, اگەنتتىك باسشىسى بريفينگتە جۋرناليستەردىڭ رەسەيدىڭ سوچي قالاسىندا وتكەن قىسقى وليمپيادا ناتيجەلەرى تۋرالى سۇراقتارىنا جاۋاپ بەردى. داستان كەنجالين, «ەگەمەن قازاقستان».