جالاقى قارىزى جانعا باتادى

ازاماتتاردىڭ كونستيتۋتسيالىق قۇقىقتارى مەن بوستاندىقتارىن قورعاۋدى ۇدايى باستى نازارىندا ۇستايتىن پروكۋراتۋرا ورگاندارى سوڭعى جىلدارى ولاردىڭ جالاقىلارىنىڭ ۋاقتىلى قول­دارىنا تيۋلەرى جولىندا اي­تار­لىقتاي كۇرەس جۇرگىزىپ كەلەدى. مۇنداي بەلسەندىلىك پەن تابان­دىلىق قىزىلوردا وبلىسى جاڭاقورعان اۋداندىق پروكۋراتۋراسى قىزمەتكەرلەرىنە دە ءتان بولىپ وتىر. بۇل ءۇشىن وتكەن جىلى پروكۋ­­­­راتۋرا ازاماتتاردىڭ 903 مارتە كونستيتۋتسيالىق قۇقىقتارىن قورعاسا, ىقپال ەتۋ اكتىلەرى نەگىزىندە 49 297 371 تەڭگەنىڭ بەرىلىپ, ونىڭ 14 025 435 تەڭگەسىنىڭ مەملەكەت پايداسىنا وندىرىلۋىنە جول اشقانىن ايتۋىمىزعا بولادى. ناقتىلاعاندا, اۋدانداعى «سۋمەن جابدىقتاۋ نىساندارىن پاي­دالانۋ جانە جوندەۋ» مەم­لە­كەتتىك كوممۋنالدىق كاسىپ­­­­ور­نىندا 2013 جىلدىڭ اقپان-ما­مىر ايلارىنا 65 جۇمىسشىعا 8 530 765 تەڭگە جالاقى قارىزى قالىپ­تاستى. اۋداندىق پروكۋرا­تۋ­را تاراپىنان وسىعان بايلانىس­تى ءتيىستى ۇيعارىم ەنگىزىلدى. بىراق كاسىپورىن ونى دەر كەزىندە ورىنداي العان جوق. سون­دىقتان جاڭاقورعان اۋماقتىق سوت ورىن­داۋشىلار بولىمىنە پروكۋرور تالابىن ماجبۇرلەپ ورىنداتۋ تۋرالى قاۋلى جولدانىپ, قارالۋ ءنا­تي­جەسىمەن 65 جۇمىسشىنىڭ جالا­­قى­لارى تولىق تولەنۋى قامتا­ماسىز ەتىلدى. الايدا, تاپ وسى كاسىپورىندا جا­لاقىنى ۋاقتىلى تولەمەۋ فاك­تىسىنىڭ بيىل دا ورىن العانى بەل­گىلى بولىپ وتىر. ونى وسىندا قىز­مەت ەتەتىن ج.بالابەكوۆتىڭ 2013 جىل­دىڭ ساۋىرىنەن 2014 جىلدىڭ قاڭتا­رىنا دەيىن ەڭبەك جالاقىسىن الا الماي جۇرگەنى جونىندەگى ارى­زى ايعاقتاپ بەردى. ونىڭ بۇل ارا­لىق­تاعى الاشاعى ايتارلىقتاي بو­لىپ شىقتى. بۇدان بولەك, مەكە­مەدەگى تاعى 35 جۇمىسشىعا 2013 جىل­دىڭ قىركۇيەك, قاراشا جانە جەل­توق­سان ايلارىنا 3 262 195 تەڭگە جا­لاقى قارىزى جينالىپ قالعان. بۇدان بولەك, اققورعان اۋىلدىق وكرۋگىندەگى «تۇگىسكەن» تش» جشس-ءنىڭ جۇمىسشىلارعا 2013 جىلعى قازان ايىنداعى جالا­قى­لارىن تولەمەۋ دەرەكتەرى ورىن العان. ونىڭ 235 جۇمىسشىعا بەرە­شەگى 9 182 507 تەڭگە بولعان. اۋدان­دىق پرو­­­كۋراتۋرا وسى ورىن العان زاڭ بۇزۋ­شىلىققا بايلانىستى سەرىك­تەستىك باسشىسىنىڭ اتىنا ۇيعا­رىم ەنگىزدى. ونىڭ ناتيجەسىندە 73 جۇمىسشىعا تيەسىلى 2 093 000 تەڭگە جالاقىلارى تولەندى, ال قالعان 162 جۇمىسشىنىڭ 7 089 507 تەڭگە جالاقىسى ماجبۇرلەپ ءوندىرۋ جولىمەن بەرىلدى. وسىنىڭ ءبارى كوپتەگەن مەكەمەلەر مەن كاسىپورىندار باسشىلارىنىڭ ادامنىڭ كونستيتۋتسيالىق قۇقىق­­­­تارىن ساقتاۋعا جاۋاپتى قاراي بەرمەيتىنىن بايقاتادى. جالاقى قارىزى بارىنەن جامان. ول اركىمنىڭ, ءاربىر وتباسىنىڭ كۇنكورىس دەڭگەيىن انىقتايدى. سوندىقتان پروكۋراتۋرا ورگاندارى بۇل تاراپتاعى بەلسەندىلىكتەرىن جالعاستىرا بەرەدى. مۇرات دوسماعانبەتوۆ, جاڭاقورعان اۋدانىنىڭ پروكۋرورى. قىزىلوردا وبلىسى.