گونكونگ سوتى 20 جاستاعى بەلسەندى ستۋدەنت توني ءچۋندى «سەپاراتيزمگە جانە زاڭسىز تابىس تابۋعا شاقىرعانى ءۇشىن» دەگەن ايىپپەن ءۇش جىل جەتى ايعا باس بوستاندىعىنان ايىردى, ول جاڭا ۇلتتىق قاۋىپسىزدىك زاڭىن بۇزعانى ءۇشىن گونكونگتىڭ تۇرمەدە وتىرعان ەڭ جاس تۇرعىنى اتاندى.
«توني چۋن وتكەن جىلدىڭ 1 شىلدەسى مەن 27 قازانى ارالىعىندا گونكونگتى قىتايدان بولۋگە نەمەسە قالانىڭ كونستيتۋتسيالىق مارتەبەسىن زاڭسىز وزگەرتۋگە ۇمتىلدى», دەلىنگەن ايىپتاۋشى تاراپتىڭ جازباسىندا. 2016 جىلى توني چۋن گونكونگتىڭ قىتايدان تاۋەلسىز بولۋىن قالاپ, Studentlocalism قوزعالىسىن قۇردى. «2020 جىلدىڭ ماۋسىم ايىندا, ياعني, ۇلتتىق قاۋىپسىزدىك تۋرالى زاڭ قابىلدانعان كۇنى قوزعالىس رەسمي تۇردە تاراتىلدى, الايدا ايىپتاۋ بويىنشا توني چۋن سەپاراتيستىك قىزمەتپەن اينالىسۋدى جالعاستىردى», دەيدى ايىپتاۋشىلار.
سونىمەن قاتار, ايىپتاۋشىلاردىڭ سوزىنە سەنسەك, ستۋدەنت ەلەكتروندى ءامياندار ارقىلى سەپاراتيستىك قىزمەتتى قارجىلاندىرۋ ءۇشىن زاڭسىز اقشا جيناۋمەن اينالىسقان.
توني چۋن گونكونگتىڭ ۇلتتىق قاۋىپسىزدىك تۋرالى جاڭا زاڭىن بۇزعانى ءۇشىن تۇرمەگە جابىلعان ءۇشىنشى تۇرعىن بولدى. وسى جىلدىڭ شىلدەسىندە سوت پوليتسيا توبىنا موتوتسيكلمەن باسىپ كىرگەن 24 جاستاعى بەلسەندىنى توعىز جىلعا سوتتادى. قاراشا ايىنىڭ باسىندا 31 جاستاعى بەلسەندى سەپاراتيزمگە شاقىرعانى ءۇشىن بەس جىل توعىز ايعا باس بوستاندىعىنان ايىرىلدى.
