پيك باسشىلارى تۇرعىنداردان جينالاتىن اقشانى قالاۋىنشا جۇمساپ, ەشقانداي ناقتى ەسەبى بولماعان سوڭ تۇرعىن ۇيلەرگە جوندەۋ جۇمىستارىن باقىلاۋ دا ءتيىمسىز ەدى. ال جاڭا قۇرىلىمدا ناقتىلىق بولعان سوڭ تۇرعىندار اقشاسىنىڭ قايدا جۇمسالىپ جاتقانىنا ەسەپ بەرۋ مەن باقىلاۋ ارتۋعا ءتيىستى بولاتىن.
پيك-تەر 2022 جىلدىڭ 1 شىلدەسىنە دەيىن وزگەرتىلىپ, ورنىنا ميب-تەر نەمەسە قاراپايىم سەرىكتەستىكتەر (قس) قۇرىلۋعا ءتيىستى بولاتىن. قاراپايىم سەرىكتەستىكتەر دەگەنىمىز – ازاماتتىق كەلىسىم نەگىزىندە جالپىۇيگە تيەسىلى م ۇلىكتەردى بىرلەسە باسقارۋ مەن ءۇيدى ۇستاۋ.
بۇگىنگى تاڭدا پەتروپاۆل قالاسىندا 1 070 كوپقاباتتى تۇرعىن ءۇي بار. بۇگىنگى تاڭدا سونىڭ 50-دە عانا ميب تىركەلگەن. 475-دە قس قۇرىلعان. قالعان 545 ءۇي ەسكى ادىسپەن باسقارىلۋدا. وسىنىڭ ءوزى قالالىق اكىمدىكتىڭ تۇرعىن ءۇي-كوممۋنالدىق شارۋاشىلىعى ءبولىمىنىڭ ءتيىمدى جۇمىس ىستەي الماي وتىرعانىن كورسەتىپ تۇر. ميب-تەردىڭ ءالى كۇنگە ءورىس الماعانى حالىق ءۇشىن ءتيىمدى باسقارۋ ءادىسىنىڭ تۇرعىنداردىڭ ۇعىمىنا جەتپەي جاتقانىندا ەكەنى داۋسىز.
قىلىشىن سۇيرەتكەن قىسقا قالا كوشەلەرى مەن جولدارىنىڭ دايىندىقتارى دا جوعارى دەڭگەيدە بولماي تۇر. 2021 جىلدىڭ 5 قاڭتارىندا بەكىتىلگەن كەلىسىمشارتقا سايكەس قالانى 2021 جىلدىڭ 31 جەلتوقسانىنا دەيىن 12 كاسىپورىن قاردان تازالاپ, اۆتوجولداردىڭ دۇرىس, تازا بولۋىن قاداعالاۋعا ءتيىستى ەدى. وسى 12 كاسىپورىننىڭ قاراماعىندا اۆتوگرەيدەر, تراكتورلار, بۋلدوزەرلەر, قۇم توسەگىشتەر سياقتى 135 بىرلىك تەحنيكا بار دەپ جاريالانعان. الايدا بىلتىرعى قىستا قار شىعارۋ, جولداردى ارشۋ وتە ناشار بولىپ, حالىقتىڭ اشۋ-ىزاسىن تۋعىزدى. قالىڭ قار تالاي جولدى باسىپ قالىپ, كولىك قوزعالىسىنا كەدەرگى كەلتىردى. ەندى سول كاسىپورىندار بيىلعى قىستىڭ ورتاسىنا دەيىن دە قالانى قاردان تازالاماق. «اۋزى كۇيگەن ۇرلەپ ىشەدى» دەگەندەي حالىق بۇلاردىڭ جۇمىسىنا قاناعاتتانباي وتىر. بىلتىرعىداي قالانىڭ ورتالىق كوشەلەرى عانا تازالانىپ, باسقا اۋدانداردىڭ تۇرعىندارى ازاپ شەكپەسە بولدى.
قاردان جانە اياق استىنداعى كوكمۇزداقتان تازارتىلاتىن وبلىس ورتالىعىنىڭ اۋماقتارى 10 مارشرۋتقا بولىنگەن. قالانىڭ بارلىق 323 كوشەسى مەن 366 شاقىرىمداي بولاتىن تاس جانە قۇمتوپىراق جولدارى باقىلاۋعا الىنباق. وندا تازالىق جۇرگىزەتىن تەحنيكالار كۇنىنە 9 ساعاتتان جۇمىس ىستەيدى دەپ بەلگىلەنگەن. بۇدان باسقا 20 بىرلىك تازالاعىش تەحنيكالارى بار «كوممۋنحوز-پەتروپاۆلوۆسك» جشس تروتۋارلار مەن ايالداما پاۆيلوندارىن تازالاپ, كوكتايعاق بولماس ءۇشىن قۇم ارالاسقان تۇز سەۋىپ وتىرادى. قالالىق تۇرعىن ءۇي-كوممۋنالدىق شارۋاشىلىعى ءبولىمى تۇرعىندار جۇرەتىن بارلىق جول حالىققا كەدەرگى بولماۋى ءۇشىن تەك تۇنگى مەزگىلدەردە تازارتىلاتىنىن جانە قار شىعاراتىن تەحنيكالار دا تۇندە جۇمىس ىستەيتىنىن ايتادى. بۇل جۇمىستارعا ءاربىر ءتۇنى 90 بىرلىك تەحنيكا شىعارىلماق.
سونىمەن قاتار جاياۋ جۇرگىنشىلەر جولىنا توسەلەتىن 500 تەكشە مەتر قۇمدى تۇز قازىردىڭ وزىندە دايار تۇر. بۇل جۇمىسپەن ارنايى اينالىساتىن ءۇش كاسىپورىن بار. ولاردىڭ ءبارى دە ارناۋلى تەحنيكالارمەن جابدىقتالعان. كوكتايعاقتى جوياتىن ارنايى «لەدورۋب – ەكو» ماتەريالىنىڭ دا قاجەتتى مولشەرى دايىندالعان.
ءسويتىپ قالا كوشەلەرى مەن تۇرعىندار جولدارىن تازارتۋعا كوممۋنالدىق قىزمەتتەر دايىن ەكەندىگىن ءسوز جۇزىندە ايتىپ تۇر, ەندى تەك ءىس جۇزىندە بەلگىلەنگەن جۇمىستارى ساپالى بولسا ەكەن دەيسىڭ.
پەتروپاۆل
