«كۇدىككە ىلىنگەندەردىڭ 40 پايىزدان استامى – مەملەكەتتىك ورگانداردىڭ وكىلدەرى. وندىرىستە جاتقان 192 قىلمىستىق ءىستىڭ ىشىندە 82 پايىزى بويىنشا تەرگەۋ اياقتالدى. ونىڭ 45-ءى سوتقا جولداندى. قىلمىستىق ىستەر بويىنشا قابىلدانعان شەشىمدەر اياسىندا مەملەكەت بيۋدجەتىنە 2 ملرد تەڭگەدەن استام قاراجات ءوندىرىلدى», دەدى دەپارتامەنت باسشىسى.
شىڭعىس قابدۋلا نۇر-سۇلتاندا جەمقورلىق قىلمىستارى قاي سالادا ءجيى تىركەلەتىنىن ايتتى.
«بۇل ساندى سالالارعا جىكتەسەك, ەڭ كوپ قىلمىس قۇقىق قورعاۋ بلوگىنا تيەسىلى. بۇل سالادا 28 فاكتى انىقتالدى. دەنساۋلىق ساقتاۋ سالاسىندا – 10, قۇرىلىس سالاسىندا – 6, ەنەرگەتيكا سالاسىندا - 8, ءبىلىم بەرۋدە – 3 قىلمىس تىركەلدى. سالىق جانە مادەنيەت سالاسىندا دا وسىنداي تەندەنتسيا بايقالىپ وتىر. جالپى قىلمىستىق جاۋاپقا 47 تۇلعا تارتىلدى. ونىڭ ىشىندە رەسپۋبليكالىق ماڭىزداعى 3, قالا دەڭگەيىندەگى 2 لاۋازىمدى تۇلعا بار. قالا دەڭگەيىندەگى 30 ادامعا باس بوستاندىعىنان ايىرۋ, ايىپپۇل سياقتى ءتۇرلى جازالار تاعايىندالدى. ونىڭ اراسىندا 20 ادام سىبايلاس جەمقورلىق قىلمىس جاساعانى ءۇشىن سوتتالدى», دەپ تولىقتىردى ول.
