اكىمشىلىك سوتتاردىڭ مىندەتى – مەملەكەتپەن داۋلاردا زاڭدى جانە جەكە تۇلعالاردىڭ قۇقىقتارىن قورعاۋ بولسا, سوتتىڭ بەلسەندى ءرولى, قۇقىقتاردىڭ باسىمدىق قاعيداتى, مەملەكەتتىك ورگانداردىڭ ءوز اكتىلەرىنىڭ نەمەسە ارەكەتتەرىنىڭ زاڭدىلىعى مەن نەگىزدىلىگىن دالەلدەۋ مىندەتى, قۇقىقتى قورعاۋ – باستى قاعيداتتارى بولىپ سانالادى. جاڭا پروتسەستىڭ نەگىزگى ەرەكشەلىگى – اكىمشىلىك ورگانمەن نەمەسە ونىڭ لاۋازىمدى تۇلعاسىمەن تاتۋلاسۋ مۇمكىندىگى ەكەنىن ايتىپ وتكەن ق.مۋسين: «بۇرىن ەگەر ادام مەملەكەتپەن داۋلاسسا, ول كوبىنەسە ۇتىلاتىن. جەڭگەن كۇننىڭ وزىندە بۇل كورسەتكىشى 15 پايىزدان اسپايتىن ەدى. قازىرگى كەزدە حالىق پەن مەملەكەتتىك ورگاندار وكىلدەرى تاتۋلاسۋدى تاڭدايتىنىن بايقاپ وتىرمىز. وتكەن 4 ايدا 546 ءىس تاراپتاردىڭ تاتۋلاسۋىمەن اياقتالىپ, سۋديالار 546 بىتىمگەرشىلىك كەلىسىمىن بەكىتتى. ولار بويىنشا مەملەكەتتىك ورگاندار, اكىمشىلىك ورگاندار ازامات قۇقىعىن ىسكە اسىرۋ تۋرالى ماسەلەگە قايتا ورالدى جانە ازاماتتىڭ قۇقىقتارىنا نۇقسان كەلتىرەتىن ءوز اكتىلەرىنىڭ كۇشىن جويدى», دەدى.
سوت جۇيەسى ءۇشىن ەڭ باستى ماقسات – قوعامنىڭ سوتقا دەگەن سەنىمىن ارتتىرۋ ەكەنىن اتاپ وتكەن جوعارعى سوتتىڭ رەسمي وكىلى ايدوس سادۋاقاسوۆ 2018 جىلدان باستاپ سوت جۇيەسىنە جوبالىق مەنەدجمەنت ەلەمەنتتەرى ەنگىزىلگەنىن اتاپ ءوتتى. «ەڭ الدىمەن, سوت ۇيىم رەتىندە قاراستىرىلدى. كەز كەلگەن ۇيىم سەكىلدى وندا دا 3 كەزەڭ بار: «كىرىس – پروتسەسس – شىعىس». كىرىس – سوتقا تۇسەتىن ىستەر, جاڭا سۋديالىق كادرلاردىڭ كەلۋى, سوتتاردىڭ ينفراقۇرىلىمى مەن سەرۆيسى, پروتسەسس – سوت ءىسىن جۇرگىزۋ كەزەڭى. شىعىس – قورىتىندى سوت اكتىلەرى. ساراپشىلارمەن بىرلەسىپ, وسى ءۇش كەزەڭ بويىنشا جان-جاقتى, ەگجەي-تەگجەي تالداۋ جۇرگىزىلدى», دەگەن ول سوت جۇيەسىندە بولاتىن وزگەرىستەرگە دە جان-جاقتى توقتالدى. ماسەلەن, قىلمىستىق پروتسەسس بويىنشا مەملەكەت باسشىسىنىڭ تاپسىرماسىمەن قىلمىستىق سوت تورەلىگىنىڭ ءۇش بۋىندى مودەلى ەنگىزىلۋدە: تەرگەۋ, پروكۋراتۋرا, سوت. مۇنداي مودەل ازاماتتاردىڭ كونستيتۋتسيالىق قۇقىقتارىن ءتيىمدى قورعاۋعا جانە زاڭسىز قۋدالاۋدان قۇتقارۋعا مۇمكىندىك بەرەدى. ەڭ باستى مىندەت – ايىپتاۋ مەن قورعاۋدىڭ اراسىنداعى شىنايى جاراسپالىلىقتى قامتاماسىز ەتۋ. وسى ورايدا جاڭا ءتاسىل بويىنشا سوتقا قازىرگىدەي بارلىق ءىستى ەمەس, تەك ايىپتاۋ اكتىسى مەن قورعاۋ اكتىسىن بەرۋ ۇسىنىلادى.
«سونىمەن قاتار قازىرگى تاڭدا سوتتاردى قارجىلاندىرۋ جۇيەسى قايتا قارالىپ جاتىر. پارلامەنتتە قارالىپ جاتقان زاڭ جوباسىنا سايكەس سوتتاردىڭ بيۋدجەتى بۇدان بىلاي ءابسوليۋتتى تسيفر تۇرعىسىندا ەمەس, بارلىق مەملەكەتتىك ورگانعا بولىنەتىن شىعىننىڭ پايىزدىق ۇلەسى تۇرىندە انىقتالاتىن بولادى. ەندى سوت جۇيەسى بيلىكتەن تاۋەلسىز بولادى», دەگەن ا.سادۋاقاسوۆ جوعارعى سوتتىڭ بۇل باعىتتاعى كەشەندى جۇمىستاردى جالعاستىراتىنىن اتاپ ءوتتى.
