ونەر • 09 قاراشا، 2021

تاۋەلسىزدىك الۋ – باقىت، باياندى ەتۋ – جاۋاپكەرشىلىك

144 رەت كورسەتىلدى

ءان الەمىنە قوسقان ولشەۋسىز ەڭبەگىنەن وزگە، زەردەلى زەرتتەۋلەر ارقىلى تاريحتىڭ شاڭ باسقان قويناۋىنان ەلەۋسىز قالعان اندەردى سىلكي ارشىپ، بىزگە ساف التىنداي جارقىراتىپ تاۋىپ بەرگەن رياسىز ەڭبەگى ارقىلى ەگەمەندىكتىڭ ەڭسەلى بولۋىنا قىزمەت ەتىپ كەلە جاتقان ەل ازاماتىنىڭ ءبىرى دە بىرەگەيى – يليا جاقانوۆ.

حالقىنا «اسىلىم»، «جايلاۋكول كەشتەرى»، «ەدىل مەن جايىق»، «اسەلىم» سىندى عالامات اندەر سىيلاعان كومپوزيتور، ونەر زەرتتەۋشى، سۋرەتشى سىندى ماماندىقتاردى بويىنا جيعان ول ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆپەن ونەر ادامى رەتىندە تىعىز بايلانىستا بولىپ، ەرەكشە سىيلاسقانىن ايتادى.

– ايگىلى پولياك كومپوزيتورى فرەدە­ريك شوپەننىڭ ء«سوز بىتكەن جەردەن ساز باستالادى» دەگەن ۇلى ءسوزى بار. ءسوز قۇدىرەتىمەن جەتكىزە الماي، دىتتەگەن ويىمدى شىعارا الماي تىعىرىققا تىرەلگەن ساتتە مۋزىكانى ىزدەيمىن. مەنىڭ اندەرىم وڭاشادا، تىنىشتىقتا نەمەسە جول ۇستىندە تۋادى. شابىت كەلگەندە كولىگىمە وتىرىپ، كلاسسيكالىق مۋزىكانى قوسىپ قويىپ، جايىقتىڭ بويىن جاعالاپ كەتەمىن. ال اننەن «ارتىلعان» سەزىم سۋرەتكە تۇسەدى. ماسەلەن، «تولاعاي» دەگەن ءانىم سولاي تۋدى. ارقا ساپارىنان كەلە جاتقان جولدا كوك مۇنارعا بوككەن كوركەم تاۋ كوز الدىمنان كەتپەي قويدى. ءسويتىپ، شابىت شىرقاۋىنا جەتىپ، «تولاعاي» كەلدى ومىرگە. ال كەيىنىرەك ول تاۋدى كارتينا عىپ جازدىم. ءان جەتكىزبەگەن جەرگە بوياۋ­دى بەردىم ءسويتىپ. مىنە، مەندەگى ونەردىڭ بارلىعى وسىلايشا ءبىر-ءبىرىن تولىقتىرىپ وتىرادى. مەنىڭ مۋزام، شابىتىمنىڭ قوزعاۋشى كۇشى وسى ۇشەۋى – ءسوز، مۋزىكا جانە اسەر.

– وسى «تولاعاي» دەگەن ءانىڭىزدى ەلباسى نۇرسۇلتان نازارباەۆ ەرەكشە جاقسى كورەدى دەسەدى...

جەكە ءوز باسىم تۇڭعىش پرەزي­دەن­تىمىز نۇرسۇلتان ابىش ۇلىمەن ونەر ادامى رەتىندە وتە تىعىز بايلانىستا بولدىم، ءبىر-ءبىرىمىزدى ەرەكشە سىيلادىق. ول كىسى مەنىڭ اندەرىمدى وتە جاقسى كورەدى. ويتكەنى ول اندەردى حالىق جاقسى كورەدى. وسىدان ءبىراز ۋاقىت بۇرىن ەلباسىمىز تۋرالى تۇسىرىلگەن كوپسەريالى دەرەكتى فيلمدە نۇرەكەڭ ءوزىنىڭ وتباسىنىڭ ورتاسىندا دومبىرامەن مەنىڭ «تولاعاي» دەگەن ءانىمدى ايتىپ وتىرعانىن كورگەندە، جۇرەگىم ەرەكشە تولقىدى. ەلباسىنىڭ ونەرگە دەگەن تالعامىن ەل جاقسى بىلەدى. سول جوعارى تالعام ۇدەسىنەن شىققانىما كومپوزيتور رەتىندە ءبىر مارقايىپ قالدىم.

سول ۇلكەن سىيلاستىق، شىعار­ماشىلىق بايلانىستارىڭىزدىڭ تاعى ءبىر دانەكەرى – «تەمىرتاۋ ءتۇنى» دەپ اتالاتىن تاماشا ءانىڭىز ەمەس پە؟! جالپى، بۇل ءان قالاي تۋعان ەدى؟

ءيا، بۇل ءاننىڭ تۋ تاريحى ەرەكشە. 2001 جىلدىڭ قوڭىر كۇزىندە ىسساپارمەن تەمىرتاۋعا جول ءتۇستى. مۇندا مەنى قادىرلەس دوسىم تىلەۋكەن سماعۇلوۆ دەگەن ازامات قۇراق ۇشا قارسى الدى. سول كۇنى كەشكە تىلەۋكەننىڭ ۇيىندە كەلىستى وتىرىس بولدى. ارقانىڭ «جيىرما بەسى»، «ەكى جيرەنى»، «دۋدارايى»، «قاراكەسەگى»، «اۋپىلدەگى»، ء«لايلىمى»، «بالقاديشاسى»، «قورلانى» ورىندالدى. ارقايسىسى ءبىر-ءبىر حيكايا. تەك سول اندەر عانا ما، ءبىزدىڭ زامانىمىزدىڭ «قارلىعاش»، «كەستەلى ورامال»، «جاس قازاق»، «اقەركە» سەكىلدى اندەرىن دە سۇيسىنە ءسوز ەتتىك. ولاردى ساعىنىشتى جۇرەكتىڭ لۇپىلىمەن ەمىرەنە اندەتتىك. وتىرىس ۇزاققا سوزىلدى. ءتۇننىڭ ءبىر ۋاعىندا ءبارىمىز تىسقا شىقتىق. تىم-تىرىس تىنا قالعان دۇنيە... قالا شۋى باسىلعان. اعاراڭداپ تاڭ دا اتىپ قالعانداي ما، اي تۋىپ، جۇلدىزدار بيىكتەي باستاپتى. كۇزدىڭ سالقىن لەبى ەسىپ تۇر. وقىستان تىلەۋكەن زامانداس ءسوز باستادى: – مىنە، ءبىزدىڭ اۋلا. بۇل جەرگە ءبىز جاقىندا عانا كوشىپ كەلدىك. ەسكى ءۇيدى بالالارعا قالدىردىق. انە، ەكى قاتارلى ءۇي... شامى دا سونبەپتى. سول ۇيدە نۇرسۇلتان نازارباەۆ تۇردى. كوزىمىزگە ىستىق كورىنەدى. كەزىندە وسى ۇيدە اندەتىپ، دۇرىلدەتىپ جاتۋشى ەدىك. سودان بەرى ارادا قانشا جىل ءوتتى. نۇرسۇلتان ءابىش ۇلى تەمىرتاۋعا كەلسە بولدى، بۇل ۇيگە سوقپاي كەتپەيدى. تاريحي ءۇي! – دەدى جىلى سەزىممەن. ەرتەڭىندە تىلەۋكەن ماعان تەمىرتاۋدى ارالاتتى. جاستىق شاعى، ەلباسىنىڭ ءومىر جولى تۋرالى ۇزاق اڭگىمەلەدى. سىرعا تولى قىزىقتى ەستەلىكتەرمەن ءبولىستى.

...ەكى كۇننەن كەيىن مەن «قاراعاندى – الماتى» پويىزىندا كەلە جاتتىم. وتاربانىڭ ءبىر سارىندى ءجۇرىسى... مۇنداي ساتتە ادامدى قىم-قيعاش وي قاۋمالايدى. كوڭىل تۇكپىرىندەگى ءار جاي كينو لەنتاسىنداي كوز الدىڭنان وتە بەرەدى. ەلەس ءبارى... مەن تىلەۋكەننىڭ ۇيىندە شەرتىلگەن اڭگىمەنىڭ ءبارىن ەسكە ءتۇسىردىم. تەمىرتاۋدىڭ ماقپال ءتۇنىن ەلەستەتتىم. كۇلكىسى، اندەرى شالقىعان جاستار... وسى كورىنىستەر ىشتەي تامىلجىتتى. مەن پويىزدان تۇسكەندە جۇرەگىمە جىبەكتەي ەسىلگەن ءبىر سىرلى اۋەزدىڭ تولعانىن سەزدىم...

– جاستىق شاعىنان سىر شەرتەتىن جاڭا ءاندى ەلباسى قالاي قابىلدادى؟ ءوزىڭىز ورىنداپ بەردىڭىز بە؟

– اتىراۋدا توكەن جۇماعۇلوۆ دەگەن ءبىر تەكتى ازامات بار. ونى جۇرتتىڭ ءبارى «توكەن تانا ۇلى» دەيدى. ۇزاق جىل جاقسى سىيلاس، سىرلاس بولدىق. سول كىسى 2003 جىلى تاڭەرتەڭ ۇيگە تەلەفون شالدى. ءوزىنىڭ پرەزيدەنت باستاعان كاسىپكەرلەر دەلەگاتسياسىمەن شۆەيتسارياعا بارا جاتقانىن ايتتى. وزىمەن بىرگە مەنىڭ «تەمىرتاۋ ءتۇنى» ءانىن الا كەتىپ، سول ساپاردا ەلباسىنا تابىس ەتپەك نيەتى بارىن جەتكىزدى. سودان نە كەرەك، سىرقاتتانىپ جاتقانىما قاراماستان ءبارىمىز جابىلىپ ءجۇرىپ ءاندى جازدىرىپ، تاسپاعا ءتۇسىرىپ ساپارعا دايىنداپ قويدىق. ەلدەن بارعان دەلەگاتسيا اۋەلى جەنەۆادا، ودان كەيىن تسيۋريح قالاسىندا وتكەن كونفەرەنتسياعا قاتىسادى. تسيۋريحتاعى بەدەلدى جيىندى ەلباسى نۇرسۇلتان ءابىش ۇلى كىرىسپە سوزبەن اشىپ، قازاقستاننىڭ بۇگىنگى جانە بولاشاقتاعى مۇمكىندىگى جونىندە جارقىن مىسالدار كەلتىرەدى. مەملەكەتىمىزدى جان-جاقتى قىرىنان تانىستىرعان سول جيىن­نان كەيىن توكەن تانا ۇلى اتىراۋدان بارعان سالەمدەمەنى ەلباسىنىڭ قولىنا تابىستايدى. ونى توكەن تانا ۇلىنىڭ ءوزى بىلاي بايانداپ بەردى: – نۇرسۇلتان ءابىش ۇلى، سىزگە اتىراۋدا تۇراتىن كومپوزيتور يليا جاقانوۆ سالەم حات بەرىپ ەدى. مىنا قورجىننىڭ ىشىندە وزىڭىزگە ارنالعان «تەمىرتاۋ ءتۇنى» ءانى جانە ءسىز ءسۇيىپ تىڭدايتىن «ەدىل-جايىق» ءانىنىڭ تاريحى جازىلعان كىتاپشا مەن كومپوزيتوردىڭ سىزگە دەگەن لەبىزى دە بار. قابىل الىڭىز، – دەدىم. ەلباسى ءجۇزى جادىراپ: – جاقسى، توكەن تاناەۆيچ، ءسىز بەن ءبىز دوس-كوڭىلدەس جاندارمىز. جاس كەزىمىزدە ىلەكەڭنىڭ اندەرىن ايتىپ وستىك، ول كىسىنى ەرەكشە سىيلايمىن. مىنا جولداعان ءانىن تىڭدايمىن، ارينە، كىتاپشاسىن دا وقيمىن، وزىنە ريزاشىلىق سەزىمىمدى كەيىن حات ارقىلى بىلدىرەمىن، – دەپتى ەلباسى.

سودان ارادا ءبىراز ۋاقىت ءوتتى. 2004 جىلى تاۋەلسىزدىك كۇنى قارساڭىندا مەملەكەت باسشىسىنىڭ بۇيرىعىمەن ءبىر توپ زيالى قاۋىم وكىلىمەن بىرگە مەنى دە «پاراسات» وردەنىنە لايىق دەپ تانىپتى. وسى قۋانىش ۇستىندە پرەزيدەنت نۇرسۇلتان ءابىش ۇلى نازارباەۆ ءدۇيىم جۇرتتىڭ الدىندا ماعان وسى وردەنمەن قوسا ءبىر كونۆەرت ۇسىندى. جۇرت بۇعان ەلەڭ ەتە قالدى. سالدەن سوڭ جۇرەگىم تولقىپ، كونۆەرتتى اشىپ قاراسام، پرەزيدەنتتىڭ ءوز قولىمەن جازىلعان حاتى ەكەن. حاتتا بىلاي دەپتى: «قۇرمەتتى كومپوزيتورىمىز يليا جاقانوۆقا! لەكە، ءوزىڭىزدى جانە اندەرىڭىزدى اسا قۇرمەتتەيتىنىمدى ءسىز بىلەسىز. قۋانىشى دا، اۋىرلىعى دا مول وسى تاۋەلسىزدىك جىلدارىندا ءار ۋاقىتتا قولداۋ كورسەتىپ، جانىمدا بولدىڭىز. زور راحمەت! بۇل ءسىزدىڭ ەلگە، وتانىمىزعا ىستەگەن ەڭبەگىڭىز دەپ بىلەمىن. اندەرىڭىز باسىلعان تاباقشانى الدىم. «تەمىرتاۋ ءتۇنى» ءانىن بىزگە (وتباسىمىزعا) ارناپسىز. راحمەت! امان-ساۋ بولىڭىز. ءالى دە تالاي تاماشا اندەردى كۇتۋشى ن.نازارباەۆ. 15.12.2004 ج. استانا». وسى حاتتا قانشاما جان جىلىلىعى بار، ىزگى جۇرەكتىڭ ءلۇپىلى... اركەز كوزىمە وتتاي باسىلادى.

– مىنە، ودان بەرى دە ارادا 20 جىلعا جۋىق ۋاقىت زىمىراپ وتە شىعىپتى. بيىل سول قاسيەتتى دە قاستەرلى تاۋەلسىزدىگىمىزدىڭ 30 جىلدىعى. ۇلىق مەيرام قارساڭىندا كوڭىلىڭىزدى قانداي كۇي كەرنەيدى؟

تاۋەلسىزدىك – ۇلىق مەيرام، تاۋەل­سىزدىك – باقىت. قازاق حالقى وسى كۇندى عا­سىرلار بويى اڭسادى. سول ءۇشىن كۇرەستى. تالاي تاۋقىمەتتى باسىنان وتكەردى. بىراق وسىناۋ ۇلى كۇنگە دەگەن ءۇمىتى مەن سەنىمى ءبىر ءسات تە مۇقالعان جوق. اتا-بابالارىمىزدىڭ اڭساعان سول ارمانىنا مىنا ءبىز وسىدان تۋرا 30 جىل بۇرىن قول جەتكىزىپ، تاۋەلسىز ەل بولدىق. بىلە بىلگەنگە بۇل – ەشقانداي بايلىققا بالانبايتىن ۇلى باقىت. ءيا، ءبىز – باقىتتى ۇرپاقپىز! تاۋەلسىزدىك الۋ ءبىر باقىت، ال ونى باياندى ەتۋ ارقايسىمىزعا ودان دا زور جاۋاپكەرشىلىك جۇكتەيدى. ەگەمەندىك العاننان كەيىن ۇلت الدىنداعى سول جاۋاپكەرشىلىكتى تەرەڭ سەزىنىپ، تاۋەلسىزدىكتىڭ بۇكىل ءىرى ماقساتتى ىستەرىنىڭ بارلىعىن الەم الدىندا تولىق جۇزەگە اسىرعان تۇلعا – نۇرسۇلتان نازارباەۆ، ءبىزدىڭ تۇڭعىش پرەزيدەنتىمىز بولدى. ءوزىنىڭ قاراپايىم، قاراپايىم بولسا دا بىلىكتى، ءبىلىمدى تىرلىگىمەن حالىقتىڭ ۇلكەن العىسىنا بولەندى. قازاقستان دامۋدىڭ بارلىق سالاسىندا ىلگەرىلەپ، نۇرلى كۇندەرگە، جاقسى كۇندەرگە كەتىپ بارا جاتىرمىز. سوعان تاۋبە دەيىك! قاي سالادا بولسىن قازاق حالقىنىڭ، قازاقستاننىڭ بەدەلى ارتىپ، ابىرويى اسقاقتاپ كەلەدى. سوعان شۇكىر دەيىك. ۇلتىمىز امان، ەلىمىزدى باستايتىن مارعاسقا ازاماتتار امان بولسىن دەيمىن. لايىم تاۋەلسىزدىگىمىز تۇعىرلى، ەلدىگىمىز باياندى بولعاي. سول ۇلى مۇراتتاردى جۇزەگە اسىرۋ جولىندا اللا ەلباسىمىزعا اماندىق، پرەزيدەنتىمىز قاسىم-جومارت كەمەل ۇلى توقاەۆقا ابىروي مەن قايىسپاس قاجىر بەرسىن. باستىسى، تاۋەلسىزدىگىمىز ماڭگىلىك بولعاي! مەنىڭ بار تىلەگىم – وسى!

– ءاۋمين، اعا! ءاماندا سولاي بولعاي. وسى ورايدا تاعى ءبىر ساۋال تۋىنداپ وتىر. اعا، بۇگىندە ءوزىڭىز سوناۋ احمەت جۇبانوۆ، مۇقان تولەباەۆ، باقىتجان بايقاداموۆ، قاپان مۋسين، سىدىق مۇحامەدجانوۆ، ماكالىم قويشىباي، ءشامشى قالداياقوۆ، اسەت بەيسەۋوۆ سىندى ۇلى تۇلعالاردىڭ كوزىن كورگەن، ءان الەمىندەگى سارا جولىن جالعاپ قانا قويماي، سول زاماننىڭ بۇكىل رۋحاني ازىعىن ارقالاپ اكەلىپ بۇگىنگى تاۋەلسىزدىك رۋحانياتىنا تابىس ەتكەن كوزى ءتىرى اڭىز ادامنىڭ ءبىرىسىز. جاڭا عاسىردىڭ ءان ونەرىن قالاي باعالايسىز؟ كوڭىلىڭىز تولا ما؟

– اۋەلى مىنا ءبىر جايتتى ايتقىم كەلەدى. سەندەر، جاستار، قازاقتىڭ ءداستۇرلى ءان كوريفەيلەرىنىڭ كىمنەن باستالاتىنىن بىلمەيسىڭدەر. قازاقتىڭ كلاسسيكالىق اندەرىنىڭ ۇلى اتاسى كىم دەگەندە، ءبىرجان سالدان باستاۋ كەرەك. ءبىرجان سالدان سوڭ اقان سەرى، ودان كەيىن اقان سەرىگە شاكىرت بولعان ۇكىلى ىبىرايلار كەتەدى. ەندى ناقتى سۇراققا كەلەيىك، قازاق حالقىنىڭ باسىنا تۇسكەن نەشە ءتۇرلى قايعى-قاسىرەت، قيلى-قيلى كەزەڭ، اۋىر سىندار بولدى. قالماقتارمەن كۇرەس 200 جىلعا سوزىلىپتى. سونىڭ ەڭ اپوگەيى – «اقتابان شۇبىرىندى، القاكول سۇلاما» تراگەدياسىن تۋدىرعان «ەلىم-اي» ءانى. مىنە، «ەلىم-اي» ءانى قازىر قازاقتىڭ ۇلتتىق گيمنىنە اينالدى.

بۇل ءان – بولاشاق ۇرپاقتىڭ كيەلى ءبىر تىرەگى ىسپەتتى. ەل بولۋدىڭ، تۇتاس­تى­عىمىزدى ساقتاۋدىڭ، ۇلت بولىپ ءومىر ءسۇرۋدىڭ جارقىن ۇلگىسى وسى – الكەي مارعۇلان تاپقان «ەلىم-اي» نۇسقاسىندا كەرەمەت ساقتالعان. قايدا قىرىلمادىق، قايدا جوسىلمادىق ءبىز. ول جاي عانا ءان ەمەس، مۇقىم حالىقتىڭ ءدىتى مەن ءدىلى، جۇرەگى، بۇكىل قايعى-قاسىرەتى، بۇگىنگى ءومىرى، كەلەشەگى قامتىلعان ۇلكەن تولعاۋ جىر. مۇنى ايتىپ وتىرعان سەبەبىم، قانداي ءبىر اۋىر كەزەڭدى وتپەيىك، ەشۋاقىتتا قازاق ءانى ءدال وتكەن عاسىردىڭ 70-جىلدارىنان باستاپ بۇزىلعانىنداي، بۇزىلعان جوق ەدى. ەسترادا – قازاقتىڭ بولمىسىنا، دىتىنە، بۇكىل تابيعاتىنا جات قۇبىلىس. ەسترادالىق ءان ەشۋاقىتتا قازاقتا بولعان ەمەس. بۇل – باتىستىڭ مۋزىكالىق ەكسپانسياسى. ءار حالىق بولمىسىن، ءوزىنىڭ ۇلتتىق مۋزىكالىق ءدىتى مەن ءدىلىن ساقتاسا، مۇنداي سۇمدىق بولمايدى. بىراق ءبىز اۋىر جىلداردى باستان كەشىردىك. باتىستان اعىلىپ جەتكەن جاعىمسىز اسەرلەر جاستارىمىزدىڭ ساناسىن ۋلادى، ءالى دە ۋلاپ كەلەدى. تەلەۆيدەنيە، عالامتور، كومپيۋتەر ارقىلى بەرىلىپ جاتقان سۇمدىقتاردىڭ بارلىعى قازاقىلىقتىڭ قاينارىن لايلاپ ءبىتتى. جاستاردىڭ قيالىن ۇرلاپ جاتىر. كەلەشەكتە قانداي ءان بولادى دەپ سۇراپ جاتىرسىڭ، حح عاسىردىڭ ەكىنشى جارتىسىنان باستالعان ءب ۇلىنۋ ەندى ەشۋاقىتتا تۇزەلمەيدى. ەندى ەشۋاقىتتا قازاقتىڭ ۇلتتىق كومپوزيتورى بولمايدى. وسى ەستەرىڭدە بولسىن.

كەشەگى كەڭەستىك كەزەڭدەگى كەرەمەت مۋزىكا تۋدىرعان احمەت جۇبانوۆ، مۇقان تولەباەۆ، ۇلتى باسقا بولسا دا لاتيف حاميدي، ەۆگەني گريگورەۆيچ برۋسيلوۆسكيلەر، باقىتجان بايقاداموۆ، قاپان مۋسيندەر، ولاردىڭ بەرگى جاعىندا رومانستان باستاپ، وپەراعا دەيىن تولعاعان سىدىق مۇحامەدجانوۆ، سولاردان كەيىنگى ماكالىم قويشىباي، ناعىم مەڭدىعاليەۆ، كەنجەبەك كۇمىسبەكوۆ، تەمىرجان بازار­باەۆ، مىڭجاسار ماڭعىتاەۆ، مانسۇر ساعاتوۆتار ۇلتتىق ونەرگە ۇلكەن ولجا سالعان بولاتىن. سوناۋ ىقىلىم زاماننان كەلە جاتقان ءداستۇردى احمەت جۇبانوۆ رۋحىمەن جالعاعان كومپوزيتورلار قاي جانردا جازسا دا ۇلتتىق كولوريتپەن، ۇلتتىق ناقىشپەن جازدى. بىراق سول تاماشا ءداستۇر 70-جىلدارعا كەلگەندە نىلدەي بۇزىلدى. ءبىز – ءشامشى قالداياقوۆ، يليا جاقانوۆ، اسەت بەيسەۋوۆ، «ماحاببات ۆالسىمەن» شىققان بەكەن جاماقاەۆ بۇل دۇربەلەڭنەن بۇرىن ءسال ەرتەرەك شىعىپ، 60-جىلداردىڭ كومپوزيتورى بولىپ، ءوزىمىزدىڭ الدىمىزداعى اتتارىن اتاپ وتكەن احمەت جۇبانوۆ، ەۆگەني برۋسيلوۆسكيلەر جاساعان، لاتيف حاميديلەر تۋدىرعان ۆالستەردەن اۋىتقىعانىمىز جوق. سول ۇلگىدە ءان جازدىق، ءالى دە جازىپ كەلە جاتىرمىز.

ال ەندى سىزدەر ارمانداپ وتىرعان، ۇلتتىق كومپوزيتور دەگەنىڭىز ەندى مىنا زاماندا بولمايدى. بۇل – ءبىزدىڭ زاماننىڭ، بۇگىنگى كۇننىڭ، ەرتەڭگى كۇننىڭ قاسىرەتى. قازىر وزدەرىڭ قانداي ءان تىڭدايسىڭدار؟ جارق-جۇرق ەتكەن ءمان-ماعىناسىز اندەردىڭ جەتەگىنەن شىعا الماي كەلەسىڭدەر. حالىققا ۇسىنىلار، ساحنادا ورىندالار اندەر ەشقانداي دا تالعام تالقىسىنا سالىنبايدى، كەڭەستىك يدەولوگيانىڭ تۇسىنداعى جۇيە، كوركەمدىك كەڭەس دەگەن جوق. كىم بولسا، نە بولسا سول كەتىپ جاتىر. ارتىق كەتسەم كەشىرەرسىز، ەفيردەگىنىڭ دەنى قوقىس. ال كەيبىرەۋلەر، ءتىپتى مۋزىكاداعى «بومج» سياقتى ءجۇر. بۇل دەگەن سۇمدىق قوي. قازاق ءوز بولمىسىن، جاراتىلىسىن، تاريحىن اندە قالدىرعان. ال بۇگىنگى اندەردەگى قازاقتىڭ كەلبەتىن ەلەستەتۋگە بولا ما؟ ارينە، جوق! وسىنى بول­دىر­ماۋ كەرەك. تاۋەلسىزدىكتىڭ ءتول پەرزەن­تى – جاستارىمىزدىڭ بويىنا ناعىز ۇلت­جان­دىلىق ءدانىن سەۋىپ، سول رۋحتا تاربيەلەسەك، ۇلت رەتىندە كوپ نارسەدە ۇتامىز. وسىنى ۇمىتپايىق. ەندىگى ءۇمىت – تاۋەلسىزدىكتىڭ ۇلاندارىندا! ۇلى ماعجان ايتپاقشى، مەن جاستارعا سەنەمىن!

اڭگىمەڭىزگە راحمەت.

 

سوڭعى جاڭالىقتار

15169 ادام كوروناۆيرۋس جۇقتىردى

كوروناۆيرۋس • بۇگىن، 09:17

ۇقساس جاڭالىقتار