گەولوگيالىق زەرتتەۋلەر ورتالىعى قۇرىلماق

«نازارباەۆ ۋنيۆەرسيتەتىندە» يندۋستريا جانە جاڭا تەحنولوگيا­لار مينيسترلىگى «قازگەولوگيا» اق باسقارما توراعاسى عالىم نۇر­­­جانوۆ پەن «Nazarbayev University Research and Innovation System» جەكەمەنشىك مەكەمەسىنىڭ باس ديرەكتورى قانات بايعارين قازاقستاننىڭ گەولوگيالىق زەرتتەۋلەر ورتالىعىن قۇرۋ تۋرالى مەموراندۋمعا قول قويدى. شاراعا پرەزيدەنت كومەكشىسى ەربول ورىن­باەۆ, پرەمەر-ءمينيستردىڭ ورىنباسارى يندۋستريا جانە جا­ڭا تەحنولوگيالار ءمينيسترى اسەت يسە­كەشەۆ جانە «نازارباەۆ ۋنيۆەر­سيتەتى» اق پرەزيدەنتى شيگەو كاتسۋ قاتىستى. مەموراندۋم ماقساتى ەلىمىز بەن الىس-جاقىن شەتەلدەردىڭ مينەرالدى جانە كومىرسۋتەگى شي­كى­زاتىنىڭ, قاتتى پايدالى قاز­بالاردىڭ, سونداي-اق جەراستى سۋلارىنىڭ كەشەندى گەولوگيالىق, گەوحيميالىق, مي­نە­رولوگيالىق, تاجىريبەلىك-ونەر­كاسىپتىك, ەكسپەريمەنتالدى جانە عىلىمي-قولدانبالى زەرتتەۋلەرىن جۇزەگە اسىرۋ ءۇشىن گەولوگيالىق زەرتتەۋلەر ورتالىعىن قۇرۋ اياسىندا ىنتىماقتاستىقتى ورناتۋ. اتالعان جوبا ەلباسىنىڭ ەلى­مىزدە گەولوگيالىق كلاستەردى دا­مىتۋ تۋرالى تاپسىرماسىنا سايكەس جۇزەگە اسىرىلۋدا. بۇرىن دا ايتىلعانداي, «نازارباەۆ ۋنيۆەرسيتەتى» جانىندا يننوۆا­تسيالىق-زياتكەرلىك كلاس­تەر قۇرى­لۋدا. ونىڭ نەگىزگى بولىگى عىلىمي پارك بولماق. ءوز كەزەگىندە اتالمىش پارك گەولوگيا, اكت, بيومەديتسينا سىندى سالالارداعى ءتۇرلى عىلىمي-تەحنيكالىق كلاستەرلەردەن تۇرادى. عىلىمي پاركتىڭ ەڭ باستى جوباسى گەولوگيالىق كلاستەر بولىپ تابىلادى. گەولوگيالىق زەرتتەۋلەر ورتالى­عىن قۇرۋ قازاقستاندا دۇنيە­جۇزىلىك دەڭگەيدەگى ينفراقۇرىلىمدى, عىلىمي-زەرتتەۋ زەرتحانالارىن جاساۋعا مۇمكىندىك بەرمەك. بۇل ءوز كەزەگىندە, ەلىمىزدە تالداۋلار ءجۇر­گىزۋ ەسەبىنەن گەولوگيالىق ماتەريالداردى وڭدەۋگە بولىنەتىن قارجى شىعىندارى مەن ۋاقىتتى ايتارلىقتاي قىسقارتادى. مەملەكەت باسشىسىنىڭ تاپسىرماسى بويىنشا قۇرىلعان «قازگەولوگيا» ۇلتتىق گەولوگيالىق بارلاۋ كومپانياسى مينەرالدىق-شيكىزات بازاسىنىڭ ورنىن تو­لىق­­تىرۋعا, ەل ەكونوميكاسىن ورنىق­تى دامىتۋعا كومەكتەسۋ ءۇشىن گەولو­گيالىق بارلاۋعا ينۆەستيتسيالار, يننوۆاتسيالىق تەحنولوگيالاردى تارتۋعا باعىتتالعان. ءابدىراحمان قىدىربەك, «ەگەمەن قازاقستان».