بۇل – شىندىققا جاناسپايتىن قاۋەسەت

ەل اراسىندا ءدارى باعاسى 100 پايىزعا قىمباتتايدى دەگەن قاۋەسەت تارادى. ءتىپتى, ينتەرنەت سايتتاردا جاريالانعان مۇنداي اقپارلاردا باعانى وسىرۋگە دەنساۋلىق ساقتاۋ مينيسترلىگىنىڭ ءوزى كەلىسىم بەرگەن دەپ جازىلعان. الايدا, بۇل حابار شىندىققا سايكەس كەلمەيدى. كەشە دەنساۋلىق ساقتاۋ مينيسترلىگى مەديتسينالىق جانە فارما­تسەۆتيكالىق قىزمەتتى باقىلاۋ كوميتەتىنىڭ ءتورايىمى لاۋرا احمەتنيازوۆا بۇل مالىمەتتىڭ شىندىققا جاناسپايتىنىن العا تارتتى. ونىڭ ايتۋىنشا, تەك شىعىس قازاقستان وڭىرىندە عانا ءدارى باعاسىن نەگىزسىز ءوسىرۋدىڭ ەكى فاكتىسى تىركەلگەن. الايدا, بۇل وقيعا بويىنشا دەرەۋ شارا قولدانىلىپ, باعا رەتتەلگەن. «بيىلعى جىلدىڭ 13 اقپانىندا دەنساۋلىق ساقتاۋ مينيسترلىگى مەن كاسىبي اسسوتسياتسيالار اراسىندا ءدارى-دارمەك باعاسىن تۇراقتى ۇستاپ تۇرۋ تۋرالى مەموراندۋم جاسالدى. ونىڭ ماقساتى – تەگىن مەديتسينالىق كومەكتەن بولەك, حالىق كوپ پايدالاناتىن دارىلەردى تىركەپ, ونىڭ باعاسىن وسىرمەۋ», دەدى ل. احمەتنيازوۆا. ايدار ورىسباەۆ, «ەگەمەن قازاقستان».