فورۋمعا قوناق رەتىندە ارنايى شاقىرىلعان اباي اۋدانىنداعى قاراعاندى اۋىلدىق وكرۋگىنىڭ 26 جاستاعى اكىمى ۆلاديسلاۆ كيرەي قازىر جاستاردىڭ دامۋى مەن مانساپتىق ءوسۋى ءۇشىن بارلىق مۇمكىندىكتەردىڭ بار ەكەنىن ءوزىنىڭ ءومىرىن مىسالعا كەلتىرە وتىرىپ, اسەرلى اڭگىمەلەپ بەردى.
– مەن قاراپايىم وتباسىندا تۋىپ ءوستىم. بالا كەزىمنەن قوعامدىق ءىس-شارالارعا بەلسەندى قاتىسىپ ءجۇردىم. قازتۇتىنۋوداعى قاراعاندى ەكونوميكالىق ۋنيۆەرسيتەتىن «مەملەكەتتىك جانە جەرگىلىكتى باسقارۋ» بىلىكتىلىگى بويىنشا تامامداعان سوڭ, ءبىلىم الۋدى ماگيستراتۋرادا جالعاستىردىم. ماسكەۋدە وقۋ وتىلىمىنەن ءوتتىم. اباي اۋدانىنىڭ جاستار رەسۋرستىق ورتالىعىندا جۇمىس ىستەدىم, ول ۇيىمدى باسقاردىم. مىنە, بيىل Nur Otan پارتياسى اتىنان اۋىل اكىمدەرىنىڭ سايلاۋىنا ءوز كانديداتۋرامدى ۇسىنىپ, جەڭىپ شىقتىم. قازىر اكىم لاۋازىمىندا قىزمەت ەتىپ جۇرگەنىمە ءۇش اي بولدى, – دەگەن ول ەلىمىزدە تالپىنعان جاسقا ەش كەدەرگى جوقتىعىن باسا ايتتى.
ال «بولاشاق» پرەزيدەنتتىك باعدارلاماسىنىڭ تۇلەگى, PhD دوكتورى لاۋرا جولداسوۆا ومىردە بەلگىلى ءبىر ماقساتقا جەتۋ ءۇشىن كوپ وقىپ, ەرىنبەي ەڭبەك ەتۋدىڭ قاجەت ەكەنىنە جاستاردىڭ نازارىن اۋداردى.
– مەن ۇلىبريتانيانىڭ بريستول ۋنيۆەرسيتەتىنىڭ تۇلەگىمىن. ونى تامامداعاننان كەيىن م.نارىكباەۆ اتىنداعى قازگزۋ جوعارى قۇقىق مەكتەبىندە دەكاننىڭ ورىنباسارى بولىپ ەڭبەك ەتتىم. قازىر ە.بوكەتوۆ اتىنداعى قاراعاندى ۋنيۆەرسيتەتىندە زاڭ فاكۋلتەتىنىڭ كافەدراسىن باسقارامىن. سوندىقتان ماقساتقا جەتۋ ءۇشىن ەڭ ءبىرىنشى كەزەكتە بىلىمگە, ەڭبەككە سۇيەنۋ كەرەكتىگىن ايتقىم كەلەدى, – دەپ اتاپ ءوتتى ول.
سونىمەن قاتار فورۋم قوناعى – تەلەجۋرناليست جانە تاۋەلسىزدىكتىڭ قۇرداسى جانبوتا راحمەتوللا ۇلى ەرىنبەي ەڭبەك ەتۋ مەن تالماي ىزدەنۋدىڭ قانداي تىعىرىقتان بولسا دا الىپ شىعاتىن الەۋەتتى كۇش ەكەنىن ايتا كەلىپ, جاستاردى الدىعا ماقسات قويىپ, سوعان جەتۋ جولىندا تاباندىلىق تانىتۋعا شاقىردى.
سونداي-اق فورۋمدا ءسوز العان باسقا دا سپيكەرلەر تاڭداعان كاسىبىن قانداي جولمەن تاپقاندارىن, مانساپ پەن جەكە دامۋدا بەلگىلى ءبىر بيىكتەرگە قالاي جەتكەندەرىن ايتىپ بەردى. ولاردىڭ ارقايسىسى وزدەرىنىڭ مىسالىندا ادام ومىرىندەگى ساتتىلىكتىڭ ەڭبەكقورلىق پەن تاباندىلىقتىڭ ارقاسىندا عانا مۇمكىن بولاتىنىن ايتتى.
جوعارى وقۋ ورىندارىنىڭ ستۋدەنتتەرى, ەرىكتىلەر, كاسىپكەرلەر, جۇمىسشى جاستار جانە تاۋەلسىزدىكتىڭ قۇرداستارى قاتىسقان فورۋمدا تاۋەلسىزدىگىمىزدىڭ ءتورتىنشى ونجىلدىعىنا قادام باسقان قازاقستاننىڭ بۇگىنگە دەيىن قول جەتكىزگەن تابىستارى تۋرالى ايتىلدى. بولاشاققا دەگەن جوسپار قۇرىلدى.
جيىن سوڭىندا قاراعاندى وبلىسىنىڭ جاستار ساياساتى ماسەلەلەرى جونىندەگى باسقارما باسشىسى ءبىرجان ءالىمجانوۆ باستاعان ۇيىمداستىرۋشىلار بيزنەس-يدەيالار بايقاۋىنىڭ جەڭىمپاز ون ستۋدەنتىن ماراپاتتادى. كوزگە ءتۇسىپ, نازار اۋدارتقان جوبالاردىڭ قاتارىندا ءتىستى اعارتۋ ستۋدياسى, شينالىق سەرۆيس, يننوۆاتسيالىق تەحنولوگيالاردى پايدالانا وتىرىپ, پيتستسا شىعاراتىن تسەح, اككۋمۋلياتورلىق باتارەيالاردى سىمسىز زاريادتاۋعا ارنالعان قۇرىلعىلاردى, پلاستيكالىق بۇيىمداردى, اعاشتان ۇلتتىق ستيلدەگى تۇرمىستىق زاتتاردى شىعاراتىن اۆتوماتتاندىرىلعان شاعىن تسەح سياقتى وزىق يدەيالار بولدى.
قاراعاندى وبلىسى
