تاپسىرمالار ناقتى ورىندالۋى ءتيىس

كەشە پرەمەر-مينيستر سەرىك احمەتوۆتىڭ توراعالىعىمەن ۇكىمەت وتىرىسى ءوتتى. وندا ەلباسىنىڭ توراعالىعىمەن 14 اقپاندا وتكەن ۇكىمەتتىڭ كەڭەيتىلگەن وتىرىسىندا بەرىلگەن تاپسىرمالار جان-جاقتى قارالىپ, ولاردى ورىنداۋعا بايلانىستى ناقتى شەشىمدەر قابىلداندى.  مەملەكەت باسشىسى وسى ايدىڭ 14 اقپانى كۇنى بولعان كەڭەيتىلگەن وتىرىستا, ەلىمىزدىڭ الەۋمەتتىك-ەكونوميكالىق دامۋىنا قاتىستى وتكەن جىلى اتقارىلعان جۇ­مىس­تاردىڭ قورىتىندىسى بويىنشا ۇكىمەتتىڭ ەسەبىن تىڭدادى. ءسويتىپ, اعىمداعى جىل مەن ءدال وسى كەزەڭگە بايلانىستى بىرقاتار ماڭىزدى تاپسىرمالار جۇكتەدى. بۇگىن وسى تاپسىرمالاردى زەردەلەپ, ولاردى ناقتى ورىنداۋ شارالارىن قاراستىرامىز, دەپ باس­تادى ءسوزىن س.احمەتوۆ. ۇكى­مەت مۇشەلەرىنىڭ نازارىن ءبى­رىنشى كەزەكتە تەڭگە باعامىنىڭ وزگەرۋىنە بايلانىستى ماسەلەگە اۋداردى. بۇل تۇرعىدا ءبىز تاۋارلار باعاسىنىڭ وسۋىنە جول بەرمەستەن, ونى ءجىتى باقىلاۋدا ۇستاۋعا ءتيىسپىز. ودان ءارى باعانىڭ تۇراقتانۋىن قام­تاماسىز ەتەمىز. اسىرەسە, الەۋ­مەتتىك ماڭىزى زور ازىق-ت ۇلىك تاۋارلارى مەن كۇندەلىكتى تۇتى­ناتىن جانار-جاعارماي باعا­سى باستى نازارعا الىنسىن. سون­داي-اق, ءدارى-دارمەكتىڭ دە نار­قىن قىمباتتاتپاۋدىڭ امالى قا­راس­تىرىلسىن. اسىرەسە, الەۋ­مەتتىك ماڭىزى زور ونىمدەر مەن تاۋارلار تاپشىلىعى مۇلدە ورىن الماسىن. وعان ءبىزدىڭ ءمۇم­كىندىكتەرىمىز بار. مۇنىمەن قاتار, مونوپوليستەردىڭ تاراپىنان كورسەتىلەتىن قىزمەتتەردىڭ ءتاريفى دە قاتاڭ باقىلاۋدا بولسىن, دەدى ۇكىمەت باسشىسى. پرەمەر-مينيستر جەرگىلىكتى استىق كاسىپورىندارىندا ۇن باعاسىنىڭ تۇراقتى بولۋى ءۇشىن بارلىق مۇمكىندىكتەردى قاراستىرۋ كەرەكتىگىن اتاپ ءوتتى. سونداي-اق, وسى جىلدىڭ ءبىرىنشى مامىرىنا دەيىن كوممۋنالدىق قىزمەتتەرگە قاتىستى تولەمدەردىڭ وزگەرمەيتىنى ءمالىم بولدى. «قازىر ناقتى شارالار بەلگىلەنىپ بولدى. ەندى ولاردى جۇزەگە اسىرۋ ءىسىن قاتاڭ باقىلاۋعا الۋ قاجەت», دەدى س.احمەتوۆ. ۇكىمەت باسشىسى سونداي-اق, بىرىڭعاي زەينەتاقى جيناقتاۋ قورىنىڭ قىزمەتى تۋرالى دا اڭگىمە قوزعادى. ۇكىمەتتىڭ شەشىمىمەن بىرىڭعاي زەينەتاقى جيناقتاۋ قورى قۇرىلدى. قازىرگى كەزدە وعان ازاماتتاردىڭ زەينەتاقى جيناقتارىن بەرۋ بويىنشا بەلسەندى جۇمىستار جۇرگىزىلىپ جاتىر. بىرىڭعاي قور جۇمىسىن تولىققاندى باستاۋ ءۇشىن بۇل ۇدەرىستەردى جەدەلدەتۋ كەرەك. ونىڭ سىرتىندا, بۇل جۇمىستار تۋرالى حالىقتى بارىنشا اقپاراتتاندىرۋ قاجەت, دەدى س.احمەتوۆ. سونداي-اق ول, وكىلەتتى مەملەكەتتىك ورگاندارعا يندۋستريالاندىرۋدىڭ باسىم باعدارلامالارىن قارجىلاندىرۋدىڭ, وڭدەۋ كاسىپورىندارىنىڭ جوبالارىن, ونىمەن بىرگە شاعىن جانە ورتا بيزنەستى نەسيەلەندىرۋدىڭ ناقتى تەتىكتەرىن دايىنداۋدى تاپسىردى. مۇنىمەن قاتار, كاسىپكەرلىك سالاسىنداعى اكىمشىلىك پروتسەدۋرالاردى وڭايلاتۋ ماقساتىندا كاسىپكەرلىكتى رەتتەيتىن, بارلىق نورماتيۆتىك-قۇقىقتىق اكتىلەرگە وسى جىلدىڭ 1 ماۋسىمىنا دەيىن رەۆيزيا جۇرگىزۋ كەرەكتىگىن شەگەلەدى. سونداي-اق, ەل ەكونوميكاسىنا ينۆەستيتسيا تارتۋدىڭ قولدانىستاعى شارتتارىن قايتا قاراۋ مىندەتتەلدى. ءبىزدىڭ قولىمىزدا شەتەلدىك جانە وتاندىق ينۆەستيتسيالاردى تارتۋدىڭ ايقىن جوسپارى بولۋى ءتيىس. ءاربىر باسىم سەكتورعا ۇزدىك ترانسۇلتتىق كومپانيالار ءتىزىمىن انىقتاپ جانە ولاردىڭ ارقايسىسىن تارتۋ بويىنشا ستراتەگيا دايىنداۋ قاجەت. ينۆەستورعا كەدەرگى كەلتىرەتىن بارلىق بوگەتتەردى الىپ تاستاۋ كەرەك, دەدى س.احمەتوۆ. ۇكىمەت مۇشەلەرىنىڭ نازارىن كەن بارلاۋ جۇمىسىن دامىتۋدىڭ ماڭىزدىلىعىنا دا اۋداردى. يندۋستريا جانە جاڭا تەحنولوگيالار مينيسترلىگى مەن مۇناي جانە گاز مينيسترلىگىنە بۇل سالاعا جەتەكشىلىك ەتەتىن جەكە مەملەكەتتىك ورگان قۇرۋ بويىنشا ۇسىنىس ەنگىزۋدى تاپسىردى. بۇلارمەن بىرگە, وكىلەتتى مەملەكەتتىك ورگاندارعا مەملەكەت باسشىسىنىڭ بارلىق تاپسىرمالارىن ورىنداۋعا باعىتتالعان باسقا دا بىرقاتار نۇسقاۋلار بەردى. تۇتاستاي العاندا, ەلباسىنىڭ قاتىسۋىمەن وتكەن كەڭەيتىلگەن ۇكىمەت وتىرىسىنىڭ قورىتىندىسى بويىنشا, ناقتى ورىنداۋشىلار مەن مەرزىمدەر انىقتالىپ, ءتيىستى حاتتاماعا قول قويىلاتىن بولادى, دەپ تۇيىندەدى ءسوزىن س.احمەتوۆ. نۇرباي ەلمۇراتوۆ, «ەگەمەن قازاقستان».