كاسىپكەرلىك دامىسا, يگىلىك ەسەلەنەدى

الەۋەتى بارعان سايىن ارتىپ, بۇگىندە ەل ەكونوميكاسىنىڭ لوكوموتيۆىنە اينالىپ كەلە جاتقان استانانىڭ وندىرىستىك قۋا­تىن ارتتىرۋدا شاعىن جانە ورتا بيزنەس سۋبەكتىلەرىنىڭ ۇلەسى زور. باس قالامىزدىڭ قالىپتاسا باستاعان العاشقى كۇنىنەن ورتا كاسىپكەرلىكتىڭ دامۋىنا بارىنشا جاعداي جاسالىپ كەلەدى. وسى رەتتە ەلباسى نۇرسۇلتان نازارباەۆتىڭ  جولداۋىندا «شاعىن جانە ورتا بيزنەستى دامىتۋ – ءححى عاسىرداعى قازاقستاندى يندۋستريالىق جانە الەۋمەتتىك جاڭعىرتۋدىڭ باستى قۇرالى. مۇنداعى مەنىڭ ۇستانىمىم ايقىن ەكەنىن بىلەسىزدەر, ونى تالاي ايتقانمىن. ەكونوميكامىزدا شاعىن جانە ورتا بيزنەس ۇلەسى ارتقان سايىن, قازاقستاننىڭ دامۋى دا ورنىقتى بولا تۇسەدى», دەپ اتاپ كورسەتكەنىن ەرەكشە باسىمدىقپەن ايتۋعا بولادى. ەلوردادا جەكە كاسىبىمەن اينالىساتىن ازاماتتارعا جان-جاقتى جاعداي جاسالۋىنا بايلانىس­تى ولاردىڭ قاتارى سوڭعى كەزدە  اي­تار­­­لىقتاي ارتىپ كەلەدى. 2014 جىلدىڭ 1 قاڭتارىنداعى دەرەك بويىنشا, قالاداعى شاعىن جانە ورتا سۋبەكتىلەر سانى 55,4 مىڭ بىرلىكتى قۇراپ وتىر. ەگەر 2009 جىلى استانادا تىركەلگەن  25,8 شاعىن جانە ورتا بيزنەس سۋبەكتىلەرىندە 122,8 ادام ەڭبەك ەتسە, قازىر بۇل سالادا 189,3 مىڭ ادام ەڭبەك ەتەدى. بۇل بۇرناعى جىلمەن سالىستىرعاندا, 111,6 پايىزدى قۇرايدى. وتكەن جىلى ەلورداداعى شاعىن جانە ورتا بيزنەس سۋبەكتىلەرى 1 185 779 ميلليون تەڭگەنىڭ ءونىمىن ءوندىرىپ, قىزمەتىن كورسەتتى. مەملەكەت باسشىسىنىڭ شاعىن جانە ورتا بيزنەس سۋبەكتىلەرىنە قولداۋ كورسەتۋ جونىندەگى تاپسىرماسى نەگىزىندە استانا قالاسىنىڭ اكىمدىگى ورتا كاسىپكەرلىكتىڭ جۇمىسىن دامىتۋ ماقساتىندا «بيزنەستىڭ جول كارتاسى-2020» باعدارلاماسى اياسىندا كەشەن­دى شارالاردى ءىس جۇزىنە اسىرىپ كەلەدى. وسى باعدارلاما نەگىزىندە جۇمىس ىستەيتىن ۇيلەستىرۋ كەڭەسى ءۇيد باعدارلاماسى اياسىندا 109 جوبانى ماقۇلدادى. جالپى سوماسى 18 835,7 ميلليون تەڭگە نەسيەمەن قار­­جىلاندىرىلاتىن 106 جوبا بويىنشا بانك/ليزينگ كومپانيالارى نەسيە ستاۆكالارىنا سۋبسيديا جاسايتىن بولدى. ورتا كاسىپكەرلىكتى دامىتۋ نەگى­زىندە استانالىقتاردى تۇراقتى جۇمىس ورنىمەن قامتاماسىز ەتۋ ماسەلەسى دە شەشىمىن تاۋىپ وتىر. 2013 جىلى ەلوردادا 17 787 جاڭا جۇمىس ورنى اشىلعان بولسا, ونىڭ 11 840-ى شاعىن جانە ورتا كاسىپكەرلىك سۋبەكتىلەرىنىڭ نەگىزىندە قامتاماسىز ەتىلدى. قالا بيۋدجەتىنىڭ كىرىس بولىگىن تولىقتىرۋدا دا ورتا كاسىپكەرلىك سالاسىنان تۇسەتىن سالىق مولشەرى جىلدان-جىلعا ارتىپ كەلەدى. حالىقارالىق ساراپشىلاردىڭ رەيتينگى بويىنشا, قازاقستان بيزنەستى جۇرگىزۋگە ەڭ قولايلى جاعداي جاسالعان ەلدەر قاتارىنان لايىقتى ورنىن الىپ وتىر. ال ەلىمىز بويىنشا ورتا كاسىپكەرلىكتى دامىتۋ ۇردىسىندە استانا قالاسى ءوزىنىڭ كوشباسشىلىق بەلسەندىلىگىن كورسەتۋدە. جىلقىباي جاعىپار ۇلى, «ەگەمەن قازاقستان».